Aum 23. Mei 2023 deed eena von de väaschte von de Jesuntheitssachen enne Stäts de Menschen woarnen, daut junge Menschen daut sea schoden deit, wan dee Bilda em Internet nenndoonen un sikj doa met aundre unjahoolen. (En disen Artikjel nan wie daut “Social Media”.)

•   “Social Media haft fa eenje Kjinja un Jugentliche waut goodet, oba daut jeft sea väl Bewies doafäa, daut et aun de Kjinja un Jugentliche äare Jefeelen väl Schoden deit” (von dän Berecht Social Media and Youth Mental Health: The U.S. Surgeon General’s Advisory, 2023).

 En dän Berecht wort eenjet oppjerieecht, waut se utjefungen haben, waut eenem sea em nodenkjen moakt:

•   Jugentliche tweschen 12 un 15 Joa, “waut sikj jieda Dach mea aus 3 Stund met Social Media aufjäwen, hauden dobbelt soo foaken Trubbels met de Narfen, feelden sikj gaunz rauf ooda hauden eene groote Angst.”

•   Mank de 14-joasche wia daut soo, daut “je mea dee Social Media brucken deeden, je schlajchta kunnen dee schlopen, un de aundre em Internet hauden sikj uk foaken domm äwa an. Dee jleichten daut uk nich sea, woo an leet, feelden sikj nuscht wieet un foaken wieren dee uk sea truarich. Aul dit wia bie de Mejales foakna aus bie de Junges.”

 Woo kjennen Elren äare Kjinja fa dise Jefoaren beschitzen? De Schreft jeft gooden Rot doafäa.

 Unjastot junt daut. Daut wudd goot sennen, wan jie aus Elren doaräwa nodochten, waut doa fa Jefoaren sent fa jun Kjint, un dan entscheiden, aus jie jun Kjint woaren loten Social Media brucken ooda nich.

•   Waut de Schreft sajcht: “Lia een Kjint dän rajchten Wajch gonen” (Spricha 22:6, PB).

•   Wan du mea doaräwa weeten west, kaust du dän Artikjel läsen “Sull wie onse Kjinja loten Bilda em Internet nenndoonen un sikj doa met aundre unjahoolen?”.

 Wan jie jun Kjint loten Social Media brucken, dan mott jie oppaussen, waut vonne Jefoaren doa sent, un daut wudd uk goot sennen, wan jie doa omwisten, waut jun Kjint em Internet deit. Woo kjenn jie daut doonen?

 Beschizt jun Kjint fa schlajchtet em Internet. Lieet jun Kjint, daut selfst to moakjen, waut fa Bilda ooda Videos schlajcht sent un woo dee daut kaun utem Stich gonen.

•   Waut de Schreft sajcht: “Lot bie junt nich emol soo väl aus von Huararie, Orreinichkjeit ooda Jiez, de Räd sennen. Jie sellen nich schaundboare un noarenhauftje Räd [ooda schwienschet Spos] haben, uk nich Dommheit driewen” (Efeesa 5:3-4, PB).

•   Wan du weeten west, woo du daut krakjt doonen kaust, dan läs dän Artikjel “Em Internet Bilda nenndoonen ooda sikj doa met aundre unjahoolen – Jugentliche lieren, rajcht doamet omtogonen”.

 Jrensen saten. Jie wudden biejlikj Räajlen moaken kjennen, fa woo lang un wanea jun Kjint Social Media brucken kaun.

•   Waut de Schreft sajcht: “Siet väasechtich, daut jie derch dit Läwen gonen aus kluake Menschen . . . Un nuzt de Tiet ut” (Efeesa 5:15-16, PB).

•   Toom june Kjinja halpen vestonen, wuarom Jrensen wichtich sent, kjenn jie dit Waunttofel-Video brucken: Hast Frind em Internet, nemm dien Vestaunt uk met.