Dän 24. Feebawoa 2022 kjeemen de rusche Soldoten met Jewault en de Ukraine nenn, un doaderch wort daut sea schlemm en daut Launt un millionende Menschen wieren en Jefoa un proowden, haustich daut Launt to veloten. a

 “Doa däwaden Bommen opp un wie hauden soo Angst, daut eena daut nich mol utspräakjen kaun. Aus wie enworden, daut doa een Zuach wia, waut de Menschen metneemen, wort wie ons eenich to veloten. Wie musten aules trigjloten – jieda Mensch kunn bloos eene kjliene Tausch metnämen. Wie kunnen bloos onse Papieren, Medizien, Wota un een bät waut toom gnoagen metnämen. Wie veleeten aules un randen nom Zuach-Stäschen aus de Bommen rom ons oppdäwaden” (Nataliia von Charkow, Ukraine).

 “Wie dochten bat de latste Minut, daut daut nich werkjlich wudd Kjrich jäwen. Un dan hieed ekj waut däwren irjentwua en de Staut un de Fenstren scheddaden. Dan wort ekj mie eenich to veloten un bloos daut needichste mettonämen. Ekj veleet Klock 8 zemorjes un neem eenen Zuach, waut no Lwiw (ooda Lemberg) fua un dan eene Boss no Poolen” (Nadija von Charkow, Ukraine).

Waut wie en disen Artikjel seenen woaren

•  Waut es de werkjelja Grunt, daut de Menschen flichten motten?

•  Wua kjennen de Menschen, waut flichten motten, Hopninj finjen?

•  Kaun de Schreft de Menschen, waut flichten motten, vondoag dän Dach halpen?

 Waut es de werkjelja Grunt, daut de Menschen flichten motten?

 Daut de Menschen nu von de Ukraine flichten motten, es doawäajen, daut de rusche Soldoten doa met Jewault nenkjeemen. Oba de Schreft wiest ons noch jratre Jrind, wuarom daut soont jeft, daut de Menschen flichten motten:

•   Menschelje Rejierungen oppe gaunze Welt haben de Menschen nich kunt daut jäwen, waut dee werkjlich fält. De Rejierungen brucken foaken äare Macht toom de Menschen kontrollen un dee schlajcht behaundlen (Liera 4:1; 8:9).

•   Soton, de Beesa Fient, es dee, “dee äwa dise Welt rejieet,” un dee haft de Menschen to soo väl schlajchtet veleit, daut de Schreft sajcht, daut “de gaunze Welt vom beesen beharscht woat” (Johanes 14:30, PB; 1. Johanes 5:19, PB).

•   De Menschen haben aul fa hundade Joaren väl Trubbels jehaut, oba bowenenn läw wie nu uk noch en eene Tiet, wua de Schreft von sajcht, daut “en de latste Doag jreslich schwoare Tieden sennen woaren” (2. Timotäus 3:1, PB). Un Tieekjens von dise latste Doag wudden sennen: Kjrich, Owwadasch, Hungaschnoot un Pestilenz ooda Krankheiten – un dit sent Sachen, wuarom de Menschen äa Tus veloten motten (Lukas 21:10-11).

 Wua kjennen de Menschen, waut flichten motten, Hopninj finjen?

 De Schreft wiest, daut ons Schepfa Jehova b een Gott es, waut Metjefeel haft fa soone Menschen, waut flichten motten un äa Tus veloten (5. Mose 10:18). Dee haft daut vespräakjen, daut hee derch siene himlische Rejierunk aul de Trubbels fiksen woat, waut soone Menschen nu haben, waut flichten motten. Siene himlische Rejierunk woat “Gott sien Kjennichrikj” jenant. Un lota woat daut bloos noch dit Kjennichrikj jäwen un nich mea menschelje Rejierungen (Daniel 2:44; Matäus 6:10). Jehova woat derch sien Kjennichrikj uk Soton, dän Beesen Fient, äwatsied schaufen (Reema 16:20). Daut Kjennichrikj woat eene Rejierunk sennen äwa de gaunze Welt un daut woat uk de Jrensen von de Lenda wajchnämen. Aule Menschen woaren sikj eenich sennen, soo aus eene groote Famielje oppe gaunze Welt. Kjeena woat mea brucken sien Tus veloten, wiels de Schreft vesprakjt: “Oba jieda eena woat bie siene Wienrank setten, ooda unja sienen Fiejenboom, un kjeena woat an doa enjsten. Dit es waut de HAR, dee aules rejieet, jesajcht haft” (Micha 4:4, PB).

 Bloos Jehova kaun de Trubbels fa emma wajchnämen, waut dee Menschen vondoag dän Dach haben, waut von äa Tus flichten motten. Un daut woat hee derch sien Kjennichrikj doonen. Well wie mol een poa Biespels seenen:

•   Kjrich. Jehova es dee, waut “en aule Welt met aulem Kjrich een Enj moakt” (Psalm 46:10, PB). Toom seenen, woo Gott woat een Enj moaken met Striedarieen oppe Welt, läs dän Artikjel “Was ist der einzige Weg zum Weltfrieden?”

•   Unjadrekjen un Jewault eewen. “[Jehova] woat an von dee raden, dee an unjadrekjen un vejewaultjen” (Psalm 72:14, PB). Toom vestonen, woo Menschen äare schlajchte Enstalunk endren kjennen, wan see dee uk aul lang jehaut haben, läs de Artikjels von daut Woat waka! met daut Teema “Met dän Hauss een Enj moaken”.

•   Oamoot. “Wiels hee [Jehova] woat de oame raden wan dee schrieen” (Psalm 72:12, PB).Toom seenen, woo Gott aul daut woat wajchnämen, von wua Oamoot kjemt, see dän Artikjel “Wirtschaftliche Ungerechtigkeit – en Ende in Sicht?”

•   Hungaschnoot. “Doa woat jenuach Jeträajd oppe Ieed sennen” (Psalm 72:16, NW).Toom seenen, woo Gott sikj doarom kjemren woat, daut kjeena mea woat brucken hungren, see dän Artikjel “Eine Welt ohne Hunger?”

 Kaun de Schreft de Menschen, waut flichten motten, vondoag dän Dach halpen?

 Jo. De Schreft jeft dee nich bloos eene Hopninj fa lota oba dee jeft dee uk Rot, nu aul met äare Schwierichkjeiten foadich to woaren.

 Waut de Schreft sajcht: “Sorcht junt om nuscht. Lot Gott met bäden un prachren un dankscheen sajen aules weeten waut junt fält! Un Gott sien Fräd, dee wiet äwa aules jeit waut Menschen vestonen kjennen, woat june Hoaten un Jedanken … bewoaren!” (Filippa 4:6-7, PB).

 Waut daut bediet: Froag Gott no ennalichen Fräd, endoont, waut du nu jroz derch motst. See dän Artikjel “Philipper 4:6, 7 – ‘Macht euch um nichts Sorgen.’”