Daut Äten vondoag dän Dach es knaup – Waut sajcht de Schreft doaräwa?
“Kjeene Hungaschnoot.” Daut es, bat wua de Weltharscha daut kjrieen wellen. Dan woaren see eent von de jratste Trubbels enne Welt jeleest haben: daut jieda eena Äten kjricht. a Oba woat daut jeemols eene Tiet jäwen, wua kjeena woat Hunga lieden motten? Waut sajcht de Schreft doaräwa?
De Schreft säd verut, daut daut Äten wudd knaup sennen
De Schreft säd verut, daut en onse Tiet, aulsoo en “de latste Doag”, wudd daut Äten knaup sennen (2. Timotäus 3:1, PB). Gott haft ons weeten jeloten, daut daut Äten woat knaup sennen, oba daut es nich dän siene Schult (Jakobus 1:13). Räd wie mol von twee biblische Profezeiungen.
“Doa [woat] opp veschiedne Städen . . . Hungaschnoot” sennen (Matäus 24:7, PB). Dise biblische Profezeiunk säd verut, daut et opp veschiedne Städen Hungaschnoot jäwen wudd. Eenje Menschen, waut daut studieren, woo daut Äten jemoakt un utjedeelt woat, säden waut sea intressauntet en eenen Berecht. Dee säden: “En de Welt es Hungaschnoot un daut es schwoa jesundet Äten ooda jenuach Äten to kjrieen. Wan se uk proowen, doa een Enj met to moaken, woat daut oba bloos oaja.” b Hundade Millionen Menschen en veschiedne Lenda kjennen nich jenuach Äten towäaj kjrieen. Un daut es sea schod, daut väle doaderch stoawen motten.
“Ekj kjikjt, un sach ver mie een schwoatet Pieet. Un dee doabowen saut, haud eene Wichtschol en de Haunt” (Openboarunk 6:5, PB). En dise Profezeiunk stalt daut Pieet un de Ritta Hungaschnoot en de latste Doag väa. c De Wichtschol en dän Ritta siene Haunt es toom een beskje Äten wäajen, soo daut jieda eena een bät doavon kjricht. Aus dee opp daut Pieet rittat, sajcht eene Stemm, daut daut Äten wudd sea dia sennen un sajcht to de Menschen, daut see daut needichste Äten nich vekwosen sellen (Openboarunk 6:6). Dit wiest krakjt, woo schlemm daut vondoag dän Dach met daut Äten es. Doa sent dusende Millionen Menschen, waut nich jesundet Äten kjrieen kjennen ooda daut nich betolen kjennen.
Woo daut met Hungaschnoot een Enj nämen woat
Forscha sajen, daut de Ieed äwajenuach Äten jeft, daut jieda eena kaun goot to äten haben. Wuarom jeft daut dan Hungaschnoot? Waut sajcht de Schreft doaräwa, waut ons Schepfa Jehova d doonen woat toom disen Trubbel leesen?
De Trubbel: De Rejierungen kjennen nich een Enj moaken met Oamoot ooda met de Ojjerajchtichkjeit, wuaderch Menschen Hunga lieden motten.
De Leesunk: Gott sien Kjennichrikj – eene volkomne Rejierunk – woat enne Städ de Menschen äare onvolkomne Rejierungen harschen (Daniel 2:44; Matäus 6:10). Väl oame Menschen vondoag dän Dach kjennen nich emma Äten kjrieen, wiels daut fa dee too dia es. Oba wan Gott sien Kjennichrikj ieescht rejieet, woat daut nich mea soo sennen. Jesus Christus es de Kjennich von Gott sien Kjennichrikj, un von dän sajcht daut enne Schreft: “Hee woat de oame raden wan dee schrieen, uk de unjadrekjte, dee kjeenen Helpa haben. . . . Doa [woat] jenuach Jeträajd em Launt sennen, un de Boaj [woaren] bat bowen dicht voll stonen” (Psalm 72:12, 16, PB).
De Trubbel: Kjrich recht väl Schoden aun un sat de Wirtschoft too. Doaderch es väle daut schwoa, daut Äten to kjrieen, waut an fält.
De Leesunk: Jehova es dee, “dee en aule Welt met aulem Kjrich een Enj moakt; dee de Boages tweibrakjt un de Spiessen tweischleit un de Kjrichswoages met Fia vebrent” (Psalm 46:10, PB). Gott woat daut Kjrichsjereetschoft venichten un uk dee, waut Kjrich aunrechten. Dan woat daut fa jiedrem eenen leicht sennen, Äten to kjrieen, onen daut dee sikj doatoo enne Jefoa brinjen mott. De Schreft sajcht: “De Jerajchtichkjeit [woat] blieejen, un aules woat frädlich sennen” (Psalm 72:7, PB).
De Trubbel: Derch fonjet Wada un Owwadasch komen een deel Tieren todood un uk väle Arnten woaren venicht.
De Leesunk: Gott woat daut Wada kontrollen un doano seenen, daut doa goot Äten waussen kaun. De Schreft sajcht: “[Jehova] steld daut Owwada, daut de Walen sikj läden. Hee muak de Wiltnis wada rikj aun Wota, un daut utjedrieejde Launt voll Wotakjwalen. Doa brocht hee de hungaje han, toom doa läwen, . . . [see deeden] äare Lenda beseien un Wiengoades plaunten, dee an aule Joa eene Arnt brochten” (Psalm 107:29, 35-37, PB).
De Trubbel: Eenje Menschen, waut bejierich un onopprechtich sent, moaken soon Äten, waut nich jesunt es ooda hoolen daut Äten trigj von soone, waut daut werkjlich fält.
De Leesunk: Gott sien Kjennichrikj woat met aule onopprechtje Menschen een Enj moaken (Psalm 37:10-11; Jesaja 61:8). De Schreft sajcht, daut Jehova Gott “no de unjadrekjte äa rajcht sitt, un de oame to äten jeft” (Psalm 146:7, PB).
De Trubbel: Jieda Joa woat een Dreddel von aul daut Äten oppe Welt fuatjeschmäten ooda daut vekjemt.
De Leesunk: Unja Gott sien Kjennichrikj woat kjeen Äten vekwost woaren. Aus Jesus oppe Ieed wia, deed hee daut krakjt soo. Biejlikj deed hee derch een Wunda äwa 5,000 Menschen to äten jäwen. Lota säd hee to siene Jinja: “Saumelt de äwajebläwne Brocken toop, daut nuscht vekjemt” (Johanes 6:5-13, PB, von ons dunkel jemoakt).
Wäajen Gott sien Kjennichrikj met aul de Trubbels een Enj moaken woat, waut Hungaschnoot veuasoaken, woaren aul de Menschen äwajenuach goodet, jesundet Äten haben (Jesaja 25:6). Wan du mea doaräwa lieren west, wanea Gott sien Kjennichrikj aul dit doonen woat, dan läs dän Artikjel “Wanea woat Gott sien Kjennichrikj äwa de Ieed rejieren?”.
a De 2030 Agenda for Sustainable Development, waut aul de Lenda, waut Poat von de Veeende Nazionen sent, aune 2015 aunjenomen haben.
b Een Berecht von dise veschiedne Organisazionen: Food and Agriculture Organization of the United Nations, International Fund for Agricultural Development, United Nations Children’s Fund, United Nations World Food Programme un de World Health Organization.
c Wan du mea äwa de vea Rittasch von de Openboarunk weeten west, dan läs dän Artikjel “Die vier Reiter der Apokalypse: Wer sind sie?”.
d Jehova, ooda Jahwe, es Gott sien Nomen (Amos 9:6, JHF). See dän Artikjel “Wäa es Jehova?”.
Veleicht jleichst du uk dit
WAUT SAJCHT DE SCHREFT ÄWA ...?
Waut es daut Tieekjen von “de latste Doag” ooda daut Enj von de Welt?
De Bibel säd väl Sachen verut, waut aula toop wiesen wudden, daut wie enne latste Tiet läwen.
WICHTJE BIBLISCHE LIEREN
Waut es Gott sien Kjennichrikj?
Aus Jesus oppe Ieed wia, lieed hee aundre mea äwa Gott sien Kjennichrikj aus äwa aundret. Aul hundade Joaren haben siene Nofolja om dit Kjennichrikj jebät.
