Dit sent Norechten, waut de Veeende Nazionen (UNO) rutjeef:

•   Bie dän Kjrich en Israel un Gaza kjeemen vom 7. bat dän 23. Oktooba 2023 mea aus 6,400 Menschen todood un äwa 15,200 worden velatst. Von dee wieren de mieeschte nich Soldoten, oba gaunz jeweenelje Menschen. Buta daut musten noch Dusende äa Tus veloten.

•   Bat dän 24. Septamba 2023 storwen en dän Kjrich tweschen Russlaunt un de Ukraine 9,701 Menschen, waut nich Soldoten wieren, un en de Ukraine worden 17,748 velatst.

 Waut vonne Hopninj kaun de Schreft deejanje jäwen, waut wäajen Kjrich lieden motten?

 De Schreft sajcht, daut Gott “en aule Welt met aulem Kjrich een Enj” moaken woat (Psalm 46:10, PB). Hee woat een Kjennichrikj, ooda eene Rejierunk em Himmel oppstalen un dee woat enne Städ aul de menschelje Rejierungen sennen (Daniel 2:44). Gott sien Kjennichrikj woat daut bat doa brinjen, daut kjeen Mensch mea lieden mott.

 Dit es, waut Jesus Christus, de Kjennich von Gott sien Kjennichrikj, doonen woat:

•   “Hee woat de oame raden wan dee schrieen, uk de unjadrekjte, dee kjeenen Helpa haben. Hee woat äwa de schwake un oame Metleet haben, un de oame woat hee vom Doot raden. Hee woat an von dee raden, dee an unjadrekjen” (Psalm 72:12-14, PB).

 Derch sien Kjennichrikj woat Gott met aul dän Schoden un daut Lieden een Enj moaken, waut Kjrich un grausome Menschen aunjerecht haben.

•   “Gott woat an aule Tronen von de Uagen weschen. Doa woat kjeen Doot ooda Trua ooda Hielen ooda Weedoag mea sennen, wiels waut verhäa wia, es veschwungen” (Openboarunk 21:4, PB).

 Derch Gott sien Kjennichrikj woat daut oppe Ieed boolt groote Endrungen jäwen. De Schreft säd fa onse Tiet verut, daut wie wudden “von Kjrich hieren un von Norechten äwa Kjrich” (Matäus 24:6). Dit un aundret, waut wie nu enne Welt seenen kjennen, wiest ons, daut wie “en de latste Doag” läwen, ooda enne latste Tiet von de menschelje Rejierungen (2. Timotäus 3:1, PB).