BLIEFT WIEDA WAKA!

Forscha sajen, daut daut Weltenj dichta bie es un doawäajen wort de Doomsday Clock veroppjeschowen – Waut sajcht de Schreft doaräwa?

AUFSPÄLEN

Forscha sajen, daut daut Weltenj dichta bie es un doawäajen wort de Doomsday Clock veroppjeschowen – Waut sajcht de Schreft doaräwa?

Aun dän 24. Jaunewoa 2023 haben Forscha de Doomsday Clock a noda to Klock 12 enne Nacht jeschowen. Wan daut wudd Klock 12 wiesen, wudd daut bedieden, daut daut Weltenj bat hia es.

En de Norechten von AFP International Text Wire sajcht daut: “Aum Dinjsdach wort de Doomsday Clock jeschowen, soo daut dee nu noda to Klock 12 enne Nacht steit aus noch kjeenmol ea. Daut es wäajen dän Kjrich en de Ukraine, daut se Atomm-Bommen brucken kunnen un wäajen daut Wada sikj sea endat. Dise Klock saul de Jefoa väastalen, daut de Menschen sikj selfst venichten kunnen.”
En de ABC News sajcht daut: “Forscha säden aum Dinjsdach, daut daut opp de Doomsday Clock nu noch mau 90 Sekunden dieren woat, bat dee Klock 12 enne Nacht wiest. Daut meent, de Menschheit es noch kjeenmol ea soo dicht bie daut Weltenj jewast.”
En de Norechten von The Guardian sajcht daut: “Eene Grupp Forscha von veschiedne Lenda woarnen doafäa, daut daut noch kjeenmol ea soo schlemm jewast es, daut de Menschen sikj selfst wudden venichten kjennen.”

Woaren de Menschen un de Ieed boolt venicht woaren? Mott wie doafäa Angst haben, waut boolt komen woat? Waut sajcht de Schreft doaräwa?

Waut noch komen woat

De Schreft sajcht: “De Ieed blift emma stonen” (Liera 1:4, PB). Un dee sajcht uk, daut doa woaren Menschen sennen, waut “daut Launt oawen un eewich doabennen bliewen” woaren (Psalm 37:29, PB). De Menschen woaren nich kjennen de gaunze Ieed venichten ooda daut soo wiet brinjen, daut doa kjeena mea oppe Ieed läwen kaun.

Oba de Schreft rät uk doavon, daut doa een Enj komen woat. Biejlikj sajcht dee, daut “de Welt un waut dee auntobeeden haft [daut] woat vegonen” (1. Johanes 2:17, PB).

Wan du doaräwa lieren west, waut de Schreft met daut Weltenj meent, dan läs dän Artikjel “Woat de Welt vegonen? Wiest de Schreft, daut de gaunze Ieed venicht woat?”
Toom mea lieren, waut de Schreft doaräwa sajcht, waut noch aules passieren woat un wanea, läs dän Artikjel “Wann kommt das Ende der Welt?”

Wie kjennen Hopninj haben

De Schreft kaun ons halpen, mootich to bliewen, wan doa uk väl Trubbels enne Welt sent. Oba met waut kaun de Schreft ons halpen?

De Schreft jeft ons gooden Rot (2. Timotäus 3:16-17). Biejlikj kaust du soonen Rot en dän Artikjel finjen “Woo es daut mäajlich, sikj nich too väl Sorjen to moaken?” Dee woat die wiesen, woo de Schreft die halpen kaun, mootich to bliewen, wan doa uk väl Trubbels em Läwen sent.
De Schreft jeft ons eene Hopninj, wua opp to veloten es (Reema 15:4). De Schreft sajcht ons krakjt, waut en onse Tiet passieren woat un uk waut lota noch komen woat. Dit to weeten, halpt ons ruich to bliewen un no onse Hopninj to kjikjen, wan doa uk väl schlemmet enne Welt passieet.

Du wurscht vondoag aul aunfangen kjennen met eenen Bibelliera toop de Bibel to studieren, om noch mea von de Schreft to lieren.

a De Organisazion Bulletin of the Atomic Scientists sajcht: “De Doomsday Clock es nich werkjlich eene Klock. Oba daut es toom wiesen, woo dicht bie daut Weltenj es, wiels de Menschen de Ieed gaunz venichten met aul de jefäadelje Sachen, waut dee jemoakt haben un brucken. Dit es een Jlikjnis, waut ons denkjen halpt, daut wie daut fiksen motten, wan wie wieda oppe Ieed läwen wellen.”