Vondoag dän Dach jeft daut bie 70 Millionen doowe Menschen oppe Welt. Daut jeft uk äwa 200 veschiedne Finjasproaken, un väl Doowe brucken eent von dee. Oba dauts truarich, daut väl doowe Menschen ojjerajcht behaundelt woaren. Hia twee Biespels:

•   “Äwa de gaunze Welt es daut soo, daut de Doowe un dee, waut schlajcht hieren kjennen, foaken nich respakjt woaren” (National Association of the Deaf, U.S.).

•   “De Doowe en de oamre Lenda sent vonne oamste Menschen oppe Welt. Fa dee es daut schwoa, daut dee kjennen no eene paussende School gonen, Oabeit finjen ooda sikj waut nosieekjen” (World Federation of the Deaf).

 Woo denkjt Gott äwa de doowe Menschen? Waut sajcht de Schreft äwa de Doowe? Un woo halpen Jehowa siene Zeijen dee vondoag dän Dach?

Woo Gott äwa de Doowe denkjt

 De Schreft lat ons weeten, daut Jehowa a Gott om de doowe Menschen bekjemmat es. Hee well haben, daut dee sellen jerajcht behaundelt woaren un daut dee uk von am lieren kjennen.

 Bibelvarsch: “Du saust nich eenen Fluch opp eenen doowen utspräakjen” (3. Mose 19:14, PB).

 Bibelvarsch: “Gott [moakt] kjeenen Unjascheet” (Aposteljeschicht 10:34).

 Bibelvarsch: “Jesus  . .  prädijd de goode Norecht von daut Kjennichrikj” (Matäus 9:35).

 Bibelvarsch: Jesus muak “mau rajcht de Doowe em hieren un de Stomme em räden” (Markus 7:37).

 Bibelvarsch: “Dee, dee doof sent, woaren de Uaren opgonen” (Jesaja 35:5, PB).

 Waut daut bediet: Jehowa säd verut, daut de Doowe woaren hieren kjennen (Jesaja 29:18).

Woo Jehowa siene Zeijen de Doowe bie dise Tiet halpen

 Jehowa siene Zeijen jäwen doowe Menschen oppe gaunze Welt eene Hopninj, wiels dee äant de goode Norecht von Gott prädjen. Waut doo wie, om daut to volbrinjen? Wie äwasaten de Schreft un moaken Videos toom de Bibel studieren en mea aus 100 Finjasproaken. Wie halpen aundre uk, de Schreft bäta to vestonen un haben christelje Toopkomes opp Finjasproak. Aul dit kaun jieda eena, waut Gott siene Help aunnämen well, emsonst haben. Wuarom emsonst? Wäajen Jesus säd: “Jie haben emsonst jekjräajen un dan jäft uk emsonst” (Matäus 10:8).

 Aul dit, waut wie rutjäwen, kaust du em Internet haben ooda hiasoo raufloden:

 JW.ORG. Om waut opp eene jewesse Finjasproak to finjen, drekj oppe Websied gaunz bowen opp daut Tieekjen fa de Sproak nopp un läs die de Finjasproak ut, waut du sieekjst.

 JW Library Sign Language-App. Moak die dise App emsonst em Fon nenn. Doa kaust du die de Videos opp Finjasproak raufloden ooda äwa Internet kjikjen.

Waut hab wie aules opp Finjasproak toom von de Schreft lieren?

 De Schreft opp Finjasproak. De Niee-Welt-Äwasatunk opp de stätsche Finjasproak wia de ieeschte Äwasatunk oppe Welt, waut gaunz opp Finjasproak to haben wia. De Niee-Welt-Äwasatunk jeft daut nu gaunz ooda Poatjes doavon opp väl Finjasproaken, un jieda Joa komen mea doatoo. (En daut Hokje “ De Niee-Welt-Äwasatunk opp Finjasproak” kaust du eene List von de Finjasproaken finjen ooda de Schreft em Internet opp Video seenen.)

•   Kjikj daut Video De Niee-Welt-Äwasatunk es gaunz opp de stätsche Finjasproak to haben, wan du mea äwa de Oabeit weeten west, waut doa jedonen woat, om de Schreft opp Finjasproak ruttojäwen.

•   Wan dien Bibelläsen mea enhoolen saul, dan moak die de JW Library Sign Language-App en dien Fon nenn. En dise App kaust du die Varzhen utläsen un dee dan opp eene Finjasproak seenen.

•   Dmytro un Vita sent doowe Elren, oba äare Kjinja kjennen hieren. See, woo dee daut aus Famielje togood kjemt, daut dee jieda Dach opp Finjasproak de Schreft kjikjen.

 Videos, wua eena waut vonne Schreft lieet. Jehowa siene Zeijen haben Videos opp Finjasproak rutjejäft, waut eenem halpen, dän gooden Rot von de Schreft notokomen, biejlikj fa . . .

•   Ehelied un Famieljes

•   Junge Menschen

•   Kjinja

 De Schreft studieren met eenen Bibelliera. Lia opp Finjasproak, waut de Schreft sajcht – krakjt soo bosich, aus die daut fält un met eenen ieejnen Liera. Daut es gaunz emsonst. Wan du weeten west, woo daut krakjt schauft, kaust du die hia aunjäwen.

 Jeson Senajonon wont opp de Filippinen. See, woo am soon Bibelstudium holp, een gooda Frint met Gott to woaren.

 Mario Antúnez wia een Prädja en Honduras. En siene Jeschicht met daut Teema “Ich hatte ja selbst noch so viele Fragen” vetald hee, woo hee de Auntwuaten opp siene Froagen äwa de Schreft funk.

 Veschiedne Toopkomes. Wie haben oppe gaunze Welt Vesaumlungen un Gruppen opp Finjasproak. Doa komen jieda Wäakj doowe Menschen toop toom lieren un Jehowa aunbäden. Jieda Joa hab wie uk jratre Toopkomes opp Finjasproak, wua eena mea von de Schreft lieren kaun. Fa deejanje, waut doof uk blint sent, jeft daut bie aul dise Toopkomes wäm, waut äant enne Henj Tieekjens moakt. Wie moaken uk Bieekja opp Blinjeschreft, un eena kaun dee emsonst haben.

•   Finj eene Vesaumlunk dicht bie die.

•   Lia mea äwa onse jratre Toopkomes, waut wie jieda Joa haben.

•   Wank no daut Aundenkjen aun Jesus sienen Doot – ons wichtichstet Toopkomen em Joa.

 José Luis Ayala wont en Mexiko. Hee es von Jeburt aun doof jewast un wort lota uk noch blint. See, woo am jeholpen wort, een gooda Bibelliera to woaren.