Waut sajcht de Schreft doaräwa, daut et äware gaunze Welt Trubbels met daut Wota jeft?
Ons aula fält daut aun reinet Wota toom läwen. Oba “wäajen daut oppe gaunze Welt aun emma mea Wota fält, woat daut eenen grooten Trubbel jäwen”, säd de Väaschta von de Veeende Nazionen, António Guterres. Dusende Millionen Menschen oppe Welt haben daut nu aul schwoa, jenuach reinet Wota toom drinkjen towäaj to schaufen.
Strdel/AFP via Getty Images
Woa wie irjentwanea mol jenuach Wota fa aulem haben? Ooda woa wie emma Trubbels met daut Wota haben? Waut sajcht de Schreft doaräwa?
Waut de Schreft äwa daut Wota vesprakjt
De Schreft vesprakjt ons, daut daut Wota eenen Dach nich mea woat knaup woaren. Doa woat mau rajcht äwajenuach reinet, freschet Wota sennen.
“Enne Wiltnis woat Wota väakomen, un en daut drieeje Launt woaren Riefasch ranen. Wua bloos heeta Saunt es, woat daut pudlich woaren, un wua daut too drieech es, woaren Kjwalen sennen” (Jesaja 35:6-7, PB).
Kjenn wie daut werkjlich jleewen? Well wie doatoo mol seenen, waut de Schreft äwa eenatlei sajcht, woo onse Ieed jemoakt es.
Waut de Schreft äwa de Ieed sajcht un woo daut doa met daut Wota enjerecht es
“[Gott haft] de Ieed nich ladich jeloten . . ., oba soo daut dee beläft es” (Jesaja 45:18, PB).
Wiels Gott de Ieed soo jemoakt haft, daut doabowen Läwen mäajlich es, haft hee daut uk aula soo enjerecht, daut doa emma jenuach reinet Wota sennen saul.
“[Gott] nemt daut Wota enne Loft nenn, un jitt daut em Räajen oppe Ieed; hee lat de Wolkjen äwaranen, fa aul de väle Menschen” (Hiob 36:27-28, PB).
Hia woat met eefache Wieed beschräwen, woo Gott daut enjerecht haft, daut daut Wota oppe Ieed wada reinjemoakt woat, soo daut wie emma jenuach Wota haben kjennen. Daut Wota vedonst vom Launt un uk vom Mäa un jeit no Hecht. De Donst kjemt von de Wolkjen aus Räajen wada rauf. Soo kjrieen de Menschen uk de Tieren emma wada reinet Wota (Liera 1:7; Amos 5:8).
“Ekj [woa] junt to de rajchte Tiet Räajen jäwen, un daut Launt saul eene goode Ennom brinjen un de Beem sellen Frucht droagen” (3. Mose 26:4, PB).
Hia jeit daut om de Israeliten von ieeschtemma, waut daut mieeschte Foarma wieren. Gott vespruak äant, daut dee wudden eene goode Arnt haben, wäajen hee äant räajelmässich Räajen jeef. Hee weet, daut et to de rajchte Tiet aun jenuach Räajen fält, wan eena well eene goode Arnt haben.
Waut Gott fa de ieeschtemmasche Israeliten deed, woat hee uk boolt fa de gaunze Ieed doonen (Jesaja 30:23). Oba nu jeft daut en väl Poats oppe Welt emma mea Trubbels met daut Wota, un daut et nich jenuach räajent, es bloos eent doavon. Waut sajcht de Schreft noch äwa de Leesunk fa dise Trubbels met daut Wota?
Woo woaren de Wota-Trubbels een Enj nämen?
De Schreft vesprakjt, daut Gott derch sien Kjennichrikj aule Trubbels fiksen woat, wua de Ieed unja lieden deit, biejlikj uk de Wota-Trubbels (Matäus 6:9-10). Gott sien Kjennichrikj es eene Rejierunk em Himmel, waut äwa de Ieed rejieren woat (Daniel 2:44; Openboarunk 11:15). Gott sien Kjennichrikj woat daut doonen, waut menschelje Rejierungen nich doonen kjennen – daut woat nich bloos de Wota-Trubbels fiksen, oba mau rajcht de Uasoak von de Trubbels wajchnämen.
Trubbel: Daut Wada veendat sikj un daut brinjt daut bat doa, daut et opp eenje Städen väl too drieech es, opp aundre Städen oba wada Äwaschwamunk es. Un de groote Äwaschwamungen komen von sea hunjsche Räajens ooda daut de Mäares-Spieejel hecha kjemt.
Leesunk: Gott sien Kjennichrikj woat aul dän Schoden enne Natua wada fiksen, soo daut de Ieed sikj kaun veholen. Gott haft vesproaken: “Kjikjt emol! Ekj moak aules nie” (Openboarunk 21:5, PB). Daut drieeje Launt woat äwajenuach freschet Wota haben un doa woat wada waut waussen opp soone Städen, wua wie nu nich mol wudden läwen kjennen (Jesaja 41:17-20). De Kjennich von Gott sien Kjennichrikj, Jesus Christus, woat de gaunze Natua unja Kontroll haben.
Aus Jesus oppe Ieed wia, beruijd hee eenen stoakjen Storm, un daut wees aul een beskje, woone groote Krauft Gott am jejäft haud (Markus 4:39, 41). Wan Jesus aus Kjennich von Gott sien Kjennichrikj äwa de Ieed harschen woat, woat daut nich mea Owwadasch jäwen. De Menschen woaren dan woaren Fräd un Sechaheit haben un derwen nich mea Angst haben fa irjent Owwadasch.
Trubbel: Menschen, waut nich äwa de Foljen von äa Haundlen nodenkjen, un bejieeje Kompanieen moaken de Riefasch, Likjen un Wotaloagen schwiensch. Uk doawäajen jeft daut emma weinja reinet Wota.
Leesunk: Gott woat de Ieed wada reinmoaken un dän Schoden fiksen von de Riefasch un Likjen, daut Mäa un daut Launt. De Ieed woat to een Paradies woaren. De Bibel beschrift daut soo schmock: “De Wiltnis un daut Drieechlaunt woaren sikj freien; daut drieeje Ollaunt woat jlekjlich sennen un met Bloomen dachen” (Jesaja 35:1, PB).
Waut woat met dee passieren, waut endoontich omgonen met de Natua un de Menschen? Gott haft vesproaken, dee “omtobrinjen, dee de Ieed vedorwen haben” (Openboarunk 11:18, PB; Spricha 2:21-22).
Trubbel: De Menschen vekwosen soon deel Wota un doawäajen woat daut väl bosja aula, aus waut de Ieed daut Wota wada fresch reinjen kaun.
Leesunk: Gott sien Kjennichrikj woat doafäa sorjen, daut Gott sien Wellen woat “oppe Ieed . . . jedonen woaren”, nich de Wellen von ekje Menschen (Matäus 6:9-10). Gott sien Kjennichrikj woat de Menschen dan uk de baste Belierunk jäwen, waut daut jeft. Jesaja 11:9 (JHF) sajcht, daut “de Ieed . . . voll de Erkjantnis Gottes sennen” woat. Dise goode Belierunk toop met de Leew fa Gott un de Leew fa aules, waut hee jemoakt haft, woat de Menschen halpen, sikj sea fein om de schmocke Ieed to kjemren un om aules enne Natua.
Om mea doaräwa to weeten, waut Gott sien Kjennichrikj doonen woat, see dän Artikjel “Waut woat Gott sien Kjennichrikj volbrinjen?”
En daut 35. Kapitel von daut Bibelbuak Jesaja kaust du die daut noläsen, woo de Ieed to een Paradies woaren woat.
Kjikj daut Video Wuarom haft Gott de Ieed jemoakt?, om mea doaräwa to lieren, waut Gott sikj fa de Ieed un de Menschen väajenomen haft.
Veleicht jleichst du uk dit
BLIEFT WIEDA WAKA!
Sea drieejet Wada – Waut sajcht de Schreft doaräwa?
Jeft daut Rot fa disen grooten Trubbel? Jeft daut noch Hopninj fa lota?
WICHTJE BIBLISCHE LIEREN
Waut es Gott sien Kjennichrikj?
Aus Jesus oppe Ieed wia, lieed hee aundre mea äwa Gott sien Kjennichrikj aus äwa aundret. Aul hundade Joaren haben siene Nofolja om dit Kjennichrikj jebät.
MEA ÄWA ONS
West du met ons räden?
Räd äwa eene biblische Froag ooda lia mea äwa Jehova siene Zeijen.
