En de Norechten hieet eena daut Mieeschte von Kjrich un von Menschen, waut aundre sea beleidjen un hunjsch aunräden ooda grausom behaundlen, biejlikj wäajen dee von eene aundre Sort Menschen sent ooda sest aundasch sent.

•   “Wäajen dän Kjrich tweschen Israel un Gaza un soone Menschen, waut aundre bemotten wellen, krakjt soo to denkjen aus dee, es em Internet nu mea Hauss aus jeemols ea” (The New York Times, 15. Nowamba 2023).

•   “Vom 7. Oktooba aun es doa plazlich aulawäajen väl mea Hauss. De Menschen doonen sikj uk väl mea ut Hauss omzajcht beleidjen un grausom behaundlen. Daut jeft Uasoak, sikj to sorjen” (Dennis Francis, Väaschta von de Hauptvesaumlunk von de Veeende Nazionen, 3. Nowamba 2023).

 Kjrich, Grausomet un sikj omzajcht beleidjen es nuscht Nieet nich. De Bibel rät von soone Menschen, waut ieeschtemma “met äare jeftje Wieed aus met Feilen” scheeten deeden un no Kjrich un Grausomet ut wieren (Psalm 64:4, PB; 120:7, JHF; 140:2, JHF). Oba de Schreft sajcht uk, daut de Hauss, waut wie nu beläwen, noch een bät aundasch es.

 De Schreft rät von tweeatlei, wuarom de Menschen sikj bie dise Tiet soo spietich sent.

1.  1. De Schreft säd verut, daut doa eene Tiet komen wudd, wua “de Leew von de Mierheit kolt woaren” wudd (Matäus 24:12). Enne Städ sikj Leew to wiesen, wudden de Menschen em Auljemeenen dolla soo enjestalt sennen, daut doa Hauss oppkomen wudd (2. Timotäus 3:1-5).

2.  2. Daut et soo väl Hauss manke Menschen jeft, wiest, daut et äwaschlapt, woo grausom un bees de Soton es. De Schreft sajcht, “daut de gaunze Welt vom beesen beharscht woat” (1. Johanes 5:19, PB; Openboarunk 12:9, 12).

 Oba de Schreft sajcht uk, daut Gott boolt aul daut wajchnämen woat, waut dän Hauss veuasoakt. Hee woat mau rajcht aul daut Lieden wada goot moaken, waut wäajen dän Hauss kjeem. De Schreft vesprakjt:

•   “Gott woat an aule Tronen von de Uagen weschen. Doa woat kjeen Doot ooda Trua ooda Hielen ooda Weedoag mea sennen, wiels waut verhäa wia, es veschwungen” (Openboarunk 21:4, PB).