Ekj wort en Calgary (Alberta, Kanada) jebuaren. Aus ekj noch kjlien wia, leeten miene Elren sikj scheeden. Miene Mame trock met mie toop no äare Elren. Miene Groofrasch leewden mie un miene Mame, un ekj haud eene sea scheene Kjintheit. Mie jeit daut noch emma scheen, wan ekj aun jane frädelje Joaren trigjdenkj.

 Aus ekj 7 wia, endad mien Läwen sea. Miene Mame befried sikj wada met mienen Voda un wie trocken no St. Louis (Missouri, Stäts). Ekj wort boolt en, woo grausom mien Voda sennen kunn. Aun mienen ieeschten Dach en de niee School wieren waut Schoolkjinja domm to mie. Aus mien Voda tus enwort, daut ekj mie nich doajäajen jewäat haud, wort hee sea doll un veheiwd mie noch dolla, aus de Schoolkjinja hauden! Dit wia mie eene Lia. Met 7 funk ekj aul aun, aundre to vekjielen.

 Miene Mame vebettad sikj doaräwa, daut mien Voda soo grausom wia. Miene Elren streeden sikj foaken un brelden sikj unjarenaunda ut. Aus ekj 11 wia, funk ekj aun, Droggs to brucken un to supen. Ekj wort emma hunjscha un deed foaken met aundre oppe Gauss feiten. Aus ekj ut de Schooljoaren wia, wia ekj aul een sea grausoma Mensch jeworden.

 Aus ekj 18 wia, jinkj ekj no daut stätsche Millitäa. Dort lieed ekj, aundre omtobrinjen, un ekj wort noch hunjscha. No 5 Joa veleet ekj daut Millitäa. Ekj wull bie eene Uniwersität Psiekologie studieren un lota bie daut FBI (eene Sort stätsche Poliezen) aunfangen to schaufen. Ieescht studieed ekj en de Stäts, oba lota trock ekj wada no Kanada un studieed dort wieda.

 En de Uniwersität feeld ekj mie emma dolla enteischt äwa de Menschen un äwa woo daut en de Jesalschoft dreit. Väle dochten emma bloos aun sikj selfst. Mie späad sikj daut soo, daut aules en de Welt soo foos wia un daut doa fa de Menschheit äare Trubbels kjeene Leesunk wia. Ekj velua de Hopninj, daut Menschen de Welt bäta moaken kunnen.

 Ekj sach meist kjeenen Senn mea em Läwen. Met de Tiet dreid sikj aules bloos noch om supen un Droggs un Jelt un Sex. Ekj wankt von een Fast no daut näakjste un wia dän Tiet äwa Frues hinjaraun. Miene Tiet bie daut Millitäa haud mie sea brow jemoakt, un ekj deed foaken met aundre feiten. Ekj docht, ekj wist selfst daut baste, waut rajcht un orrajcht wia, un fluach irjentwäm aun, waut aundre opp mienen deisent no ojjerajcht behaundeld. Oba werkjlich leet ekj mie emma dolla von de Jewault beharschen.

 Eenen Dach wia ekj met eenen Frint toop bie mie tus em Kjala. Wie muaken Pakjes met Marihuana reed toom vekjeepen un brukten bieaun Droggs. Mien Frint fruach mie, aus ekj aun Gott jleewd. Ekj säd: “Wan Gott doafäa veauntwuatlich es, daut doa soo väl Menschen lieden motten, dan well ekj nuscht met dän to doonen haben!” Dän näakjsten Dach – daut wia de ieeschta Dach opp miene niee Oabeit – fruach mie een Oabeitspoatna, waut eent von Jehowa siene Zeijen wia: “Jleefst du, daut Gott doafäa veauntwuatlich es, daut doa soo väl Menschen lieden motten?” Ekj must mie sea wundren, daut dee mie daut nu jroz fruach, un ekj wort nieschierich. En de näakjste 6 Moonat deed wie ons foaken unjahoolen. Hee wees mie de Auntwuaten ut de Schreft fa soone Froagen, waut ekj aul emma haud.

 To dee Tiet haud ekj eene Mejal un wie wonden toop. Oba see wull nich, daut ekj ar von daut vetald, waut ekj ut de Schreft lieed. Eenen Sindach säd ekj to ar, daut ekj de Zeijen no ons jekroacht hab fa een Bibelstudium. Aus ekj dän näakjsten Dach von de Oabeit no Hus kjeem, wia see utem Hus jetrocken un haud aules metjenomen, waut wie hauden. Ekj jinkj rut un road. Ekj bäd uk to Gott un prachad am no Help. Daut wia daut ieeschte mol, waut ekj Gott sienen Nomen, Jehowa, biem bäden brukt (Psalm 83:18, NW).

 Twee Doag lota studieed ekj toom ieeschte mol met de Zeijen de Schreft. Daut wieren een Poa Lied. Aus dee ieescht wajch wieren, läsd ekj wieda en daut Studia-Buak Du kannst für immer im Paradies auf Erden leben a. Dee Nacht läsd ekj daut noch gaunz derch. Mie jinkj daut sea to Hoaten, waut ekj äwa Jehowa Gott un sienen Sän, Jesus Christus, lieed. Ekj sach, woo metfeelent Jehowa es un daut am daut jaumat, wan wie lieden motten (Jesaja 63:9). Waut mie besonda to Hoaten jinkj, daut wia Gott siene Leew fa mie un daut Opfa, waut sien Sän fa mie jeef (1. Johanes 4:10). Ekj kunn vestonen, daut Jehowa jeduldich met mie wia, “wiels hee well, daut aulemaun sikj oppmoaken saul, un daut kjeena veloaren jeit” (2. Petrus 3:9). Ekj späad, daut Jehowa mie no sikj trock (Johanes 6:44).

 Dee Wäakj funk ekj aun, no de Toopkomes to wanken. Ekj haud lange Hoa un Uarenrinj, un soo aus mie sach, wia toom grulen. Oba de Zeijen behaundelden mie soo, aus wudden dee mie aul lang kjanen. Dee vehilden sikj aus woare Christen. Daut feeld sikj soo aus tus bie miene Groofrasch, bloos noch väl scheena.

 Daut dieed nich lang bat daut, waut ekj ut de Schreft lieed, mien Läwen veendad. Ekj deed miene Hoa aufschnieden, jeef mien schwienschet Vehoolen opp un hieed opp met Droggs un supen (1. Korinta 6:9-10; 11:14). Ekj wull Jehowa jefaulen. Wan ekj enwort, daut hee irjentwaut nich jleicht, waut ekj deed, spekjt mie daut deep em Hoat un ekj socht nich no eene Uträd. En mie docht ekj dan emma: “Soo aus dit kaun ekj nich wiedamoaken.” Un dan funk ekj fuaz aun, mien denkjen un mien haundlen to endren. Soo kjeem daut, daut ekj boolt enwort, woo goot mie daut deit, aules soo to doonen, aus Jehowa daut haben well. Dän 29. Juli 1989 – 6 Moonat nodäm aus ekj aunjefongen haud, de Schreft to studieren – leet ekj mie aus eent von Jehowa siene Zeijen deepen.

 De Schreft haft mie jeholpen, een aundra Mensch to woaren. Ea brukt ekj foaken Jewault, wan doa wäa onfrintlich to mie wia. Oba nu strenj ekj mie sea aun, “met aule Menschen Fräd to haben” (Reema 12:18). Daut kunn ekj nich ut mie selfst, oba bloos met Jehowa. Sien Wuat un sien heilja Jeist kaun Menschen veendren (Galata 5:22-23; Hebräa 4:12).

 Nu lot ekj mie nich lenja von Droggs, Jewault ooda schwiensche Jedanken beharschen. Enne Städ daut well ekj Jehowa Gott jefaulen un well am mien bastet jäwen. Un ekj well uk aundre halpen, am kjanen to lieren. Een poa Joa no miene Doop trock ekj no een aundret Launt, wua daut aun mea Help fäld, om doa biem prädjen mettohalpen. Met de Joaren kunn ekj met väl Menschen de Schreft studieren un hab jeseenen, woo äant daut em Läwen holp. Ekj frei mie uk sea, daut miene Mame uk eene von Jehowa siene Zeijen wort – un daut wia uk, wiels see seenen kunn, woo de Schreft miene Enstalunk un mien Läwen veendad haud.

 Aune 1999 jinkj ekj en El Salvador eene School derch, waut nu “School fa Kjennichrikjsvekjindja” heet. Doa lieed ekj, woo ekj biem prädjen veraungonen kaun un en de Vesaumlunk to lieren un aundre bietostonen. En dautselwje Joa befried ekj mie met miene leewe Fru Eugenia. Nu deen wie toop aus Voltietprädja en Guatemala.

 Nu sie ekj nich mea enteischt äwa daut Läwen; enne Städ daut sie ekj sea schaftich. No de Schreft to läwen haft mie jeholpen, von een schwienschet Läwen un von Jewault frietokomen un een Läwen voll woare Leew un Fräd to haben.