Jo. Wie sent emma reed, de Menschen uttohalpen, wan wua waut passieet. Wie halpen nich bloos dee, waut Jehova siene Zeijen sent, oba uk aundre, wiels en Galata 6:10 sajcht daut, wie sellen “aun aule Menschen goodet doonen, un besondasch aun dee, dee met ons toop em Gloowen stonen” (De Plautdietsche Bibel). Wie proowen deejanje, waut derch een Owwada ooda Ojjlekj Schoden lieden, uk Troost to jäwen un em jeisteljen bietostonen, wiels daut es daut, waut dee besonda needich fält (2. Korinta 1:3-4).

 Wan een Ojjlekj ooda Owwada wua Schoden aunjerecht haft, proowen de Eltestasch doa met jieda eenen von äare Vesaumlunk to räden om to seenen, woo aules steit ooda aus dee Help brucken. Dan doonen de Eltestasch de Offiz von Jehova siene Zeijen en dee Omjäajent daut to weeten, woo de Loag es un waut see aul haben kunt doonen.

 Wan de Schoden soo groot es, daut de Vesaumlungen doa nich auleen met foadich woaren, woat de Väastaunt von Jehova siene Zeijen fa mea Help sorjen. De Offiz von Jehova siene Zeijen en dise Jäajent woat dan een Helpkommitee oppstalen, waut de Äwasecht äwa aule needje Oabeit haft. Uk Jehova siene Zeijen von aundatwäajen brucken jieren von äare Tiet, Krauft un Jelt, om dise Oabeit to unjastetten (Spricha 17:17). Soo deeden de ieeschte Christen daut uk, aus äare Gloowesbreeda bie eene Hungaschnoot Help fäld (1. Korinta 16:1-4).

 Von de Gowen, waut no de Offizen von Jehova siene Zeijen jeschekjt woaren, woat een Poat doatoo jebrukt, om doa to halpen, wua een Owwada ooda Ojjlekj passieet es (Aposteljeschicht 11:27-30; 2. Korinta 8:13-15). Un wiels de Helpa fa äare Oabeit nuscht nämen, kaun aul daut Jelt, waut doa es, doatoo jebrukt woaren, deejanje to unjastetten, waut Help fält. Wie seenen uk doano, daut aule Gowen rajcht jebrukt woaren (2. Korinta 8:20).