Ons Woakj oppe gaunze Welt drajcht sikj hauptsechlich derch friewelje Gowen von Jehova siene Zeijen. a Bie onse Toopkomes jeft daut Gowenkaustes, un bie “Gowen jäwen” opp onse Websied es aunjejäft, woo eena sest noch kaun Gowen jäwen. Jieda eena kaun entscheiden, aus hee Gowen jäwen well fa de Onkosten von daut Vesaumlungshus ooda fa daut Woakj oppe gaunze Welt ooda fa beides.

 Bie Jehova siene Zeijen brukt kjeena dän Tieenden betolen un doa woat uk von kjeenem velangt, eene jewesse Somm entolajen ooda een jewesset Poat von siene Ennom (2. Korinta 9:7). Bie onse Toopkomes brukt nuscht betolt un doa woat uk nich Jelt jekollakjt. Un doa doaf uk nuscht fäa betolt, wan sikj doa wäa deepen lat ooda sikj befrieen deit ooda wan doa een Bejrafnis es ooda sest een Toopkomen. Wie doonen uk nich doaderch Jelt fa ons Woakj toopkollakjten, daut wie biejlikj Kjieekj, Äten, Lessa ooda aundre Sachen vekjeepen ooda daut wie een Fast moaken ooda om Jelt spälen, un wie froagen uk kjeenem no Jelt. Doa woat uk nich bekauntjemoakt, wäa waut enjelajcht haft (Matäus 6:2-4). Wie doonen opp onse Websieden un en onse Bieekja uk nich Sachen toom vekjeepen aunbeeden, om doaderch Jelt to kjrieen.

 En de Vesaumlungen von Jehova siene Zeijen jeft daut jieda Moonat bie de Toopkomes eenen Berecht äwa de Gowen un de Onkosten, waut jieda eena seenen kaun. Doa woat uk pinkjlich nojeseenen, waut jieda Vesaumlunk fa Onkosten haft un woo väl Jelt doa enjelajcht woat, om secha to moaken, daut de Gowen rajcht jebrukt woaren (2. Korinta 8:20-21).

•   Gowenkaustes: Eena kaun Jelt ooda Schekjzadels en de Gowenkaustes nenlajen, waut en onse Vesaumlungshiesa, Kongresshiesa ooda opp aundre Städen sent, wua wie Toopkomes haben.

•   Äwa Internet: En väl Lenda kaun eena de Sied “Donate to Jehovah’s Witnesses” brucken, om biejlikj derch Kjreditkoaten ooda Debitkoaten Gowen to jäwen ooda daut de Gowen jlikj von de Bankräakjninj aufjetrocken woaren ooda sestwaut. b Eenje von Jehova siene Zeijen haben sikj daut doa soo oppjeleint, daut de Gowen gaunz von veselfst aufgonen, un opp dee Wajch doonen dee jieda Moonat waut “auntsied lajen” (1. Korinta 16:2, PB).

•   Em verut plonen, Gowen to jäwen: Bie jewesse Gowen mott eena daut aul em verut plonen ooda wäm no Rot froagen, waut sikj met Jesazessachen weet. En eenje Lenda doaf eena mau rajcht weinja Taks tolen, wan eena daut fein plonen deit. Un väle es daut aul togood jekomen, daut see doa goot omwisten, woo eena nu kunn Gowen jäwen ooda waut no äaren Doot met äare Sachen jedonen sull. Froag bie de Offiz von Jehova siene Zeijen en dien Launt, wan du wurscht wellen eent von dise Sachen aus Gowen jäwen, waut hia aunjejäft sent:

  •   Bankräakjninjen

  •   Vesechrungen un Auldpenschen

  •   Launt ooda Hiesa

  •   wan eena Poat aun eene Kompanie haft

  •   een Tastament ooda wan eena wua waut goot haft

 Wan du noch mea doaräwa weeten west, woo du en dien Launt Gowen jäwen kaust, dan besee die de Sied “Donate to Jehovah’s Witnesses”.