Wuarom doonen Jehova siene Zeijen nich Jeburtsdach fieren?

AUFSPÄLEN

Wie fieren nich Jeburtsdach, wiels wie jleewen, daut Gott daut nich jefelt. En de Schreft woat daut nich krakjt aufjesajcht, oba wie kjennen doa eenjet bennen finjen, waut ons wiest, woo Gott äwa Jeburtsdachsfasten denkjt. Well wie doatoo mol veatlei seenen:

Jeburtsdach fieren kjemt von faulsche Glooweslieren häa. Een Buak sajcht, daut Jeburtsdach fieren von de Glooweslia häakjemt, daut “de beese Jeista un Machten dänjanjen schoden kjennen, waut Jeburtsdach haft”, un daut “dän siene Frind dan sellen bie dän sennen un dän Jlekj wenschen, daut dee beschizt woat” (Funk & Wagnalls Standard Dictionary of Folklore, Mythology, and Legend). En een aundret Buak steit, daut de Menschen en de ieeschtemmasche Tiet daut fa sea wichtich talden, daut opptoschriewen, wanea wäa jebuaren wia. De Dotem wia “needich fa dee Sort Woasajarie”, waut sikj opp “de jeheemnisvolle Lia von de Stierndiedarie” stett. Dautselwje Buak sajcht wieda, daut “de Menschen dochten, de Taulchlichta opp dän Jeburtsdachskjieekj hauden Zaubakrauft, daut sikj daut erfeld, waut see sikj wenschten” (The Lore of Birthdays).

Oba soont aus Zaubakrauft brucken ooda Woasajarie un Zaubarie driewen es gaunz jäajen de Schreft (5. Mose 18:14; Galata 5:19-21). Waut wia biejlikj eene Uasoak, wuarom Gott de ieeschtemmasche Staut Babel strofen deed? Daut wia, wiels de Menschen sikj doa met Stierndiedarie aufjeewen, waut eene Sort Woasajarie es (Jesaja 47:11-15). Jehova siene Zeijen doonen nu nich dän tietäwa bloos noforschen, von wua jieda Fast ooda Jewanheit häakjemt, oba wiels de Schreft soo kloa jäajen Zaubarie rät, sent wie doa nich endoontich äwa.
De ieeschte Christen deeden nich Jeburtsdach fieren. En een Buak sajcht daut, de Christen em 1. Joahundat hilden “Jeburtsdach fieren fa waut, waut bie de Heiden Mood wia” (The World Book Encyclopedia). No de Schreft no sellen aule Christen de Apostel un de aundre Jinja nodoonen, waut von Jesus wieren belieet worden (2. Tessalonicha 3:6).
De eensja Aunjedenkjsdach, waut Christen hoolen sellen, es nich een Jeburtsdach, oba Jesus sien Doodesdach (Lukas 22:17-20). Un daut brukt eenem uk nich wundren, wiels de Schreft sajcht: “De Dach, wan eena stoaft, es bäta aus de Dach wan eena jebuaren es” (Liera 7:1). Jesus haud sikj bie Gott eenen gooden Nomen jemoakt, wiels dee batem Doot tru wia. Doawäajen wia dän sien Doodesdach bäta aus sien Jeburtsdach (Hebräa 1:4).
En de Schreft es noanich wua to läsen, daut Gott siene Deena Jeburtsdach jefieet haben. Haben dee daut met eenst bloos vejäten, opptoschriewen? Nä, wiels de Schreft rät von twee Menschen, waut Jeburtsdach fieeden, oba aulebeid wieren nich Gott siene Deena. Un Gott sien Wuat rät nich goot von dise Jeburtsdachsfasten (1. Mose 40:20-22; Markus 6:21-29).

Sent de Kjinja von Jehova siene Zeijen truarich, wiels dee nich Jeburtsdach fieren?

Krakjt soo aus aule feine Elren räakjnen Jehova siene Zeijen äare Kjinja sea väl; dee jäwen dee to irjenteenen Tiet Jeschenkja un vebrinjen scheene Tieden met dee. Dee wellen Gott sien volkomnet Biespel nodoonen, waut siene Kjinja emma wada goode Gowen jeft (Matäus 7:11). Doawäajen jleewen de Kjinja von Jehova siene Zeijen nich, daut see sikj waut loten derchgonen. Well wie mol seenen, waut eenje von dee sajen.

Tammy (12 Joa oolt) vetalt: “Daut jeft väl mea Freid, wan eena onverhofs een Jeschenkj kjricht!”
Gregory (11 Joa oolt) vetalt: “Toom Jeburtsdach kjrie ekj von Onse kjeen Jeschenkj, oba dee jäwen mie irjentwanea waut. Ekj jleich daut, wiels ekj mie doa dan nich opp reed jemoakt hab.”
Eric (6 Joa oolt) vetalt: “Bloos tieen Minuten een beskje Kjieekj äten un een Leet sinjen – daut es nich een Fast. Du motst mol no ons komen un kjikjen, woo scheen ons daut jeit, wan wie met Frind toop sent!”