Jehova siene Zeijen hoolen sikj soo enj aus mäajlich aun de christelje Lia, waut Jesus bekauntmuak un wua uk de Apostel no läwden. En disen Artikjel woat von eenjet jerät, waut wie jleewen.

1.   Gott. Wie bäden dän eensich woaren un aulmajchtjen Gott aun, waut aules jemoakt haft. Dän sien Nomen es Jehova (Psalm 83:18, NW; Openboarunk 4:11). Hee es dee Gott, dän Abraham, Moses un Jesus aunbäden deeden (2. Mose 3:6; 32:11; Johanes 20:17).

2.   De Schreft. Wie sent ons secha, daut Gott derch de Schreft to ons Menschen rät (Johanes 17:17; 2. Timotäus 3:16). Onse Lieren stetten sikj opp aule 66 Bibelbieekja; daut “Oole Tastament” uk daut “Niee Tastament”. De Professa Jason D. BeDuhn säd daut gaunz rajcht, aus hee schreef, daut Jehova siene Zeijen “äare Glooweslieren un Woakjen opp de biblische Lieren [stetten], onen dee proowen eene aundre Bediedunk to jäwen.” a

    Wie jleewen aun aules, waut de Schreft sajcht, oba wie sent nich Fundamentalisten. Daut meent, wie jleewen nich, daut aules en de Schreft buakstäwlich to vestonen es. Jewesset es en Jlikjnisen ooda Bildasproak jeschräwen (Openboarunk 1:1, NW).

3.   Jesus. Wie hoolen ons aun Jesus Christus siene Lieren un aun sien Biespel. Wie seenen am uk aus onsen Heilant, ooda Rada, un aus Gott sienen Sän (Matäus 20:28; Aposteljeschicht 5:31). Doawäajen sent wie Christen (Aposteljeschicht 11:26). No de Schreft no es Jesus nich de aulmajchtja Gott. De Schreft lieet uk nich, daut Gott, Jesus un de heilja Jeist mau eene Persoon sent (Johanes 14:28).

4.   Gott sien Kjennichrikj. Daut es eene Rejierunk em Himmel un nich waut, waut Christen em Hoat haben. Dit Rikj woat enne Städ von de menschelje Rejierungen harschen un woat daut towäaj schaufen, waut Gott met de Ieed em Senn haud (Daniel 2:44; Matäus 6:9-10). Dit woat boolt komen, wiels de Profezeiungen en de Bibel wiesen, daut wie en “de latste Doag” läwen (2. Timotäus 3:1-5, De Plautdietsche Bibel; Matäus 24:3-14).

    Jesus es de Kjennich von Gott sien Kjennichrikj em Himmel. Hee haft 1914 aunjefongen to harschen (Openboarunk 11:15).

5.   Radunk. Doaderch, daut Jesus sien Läwen aus Leesjelt jejäft haft, kjenn wie von de Sind un dän Doot friekomen (Matäus 20:28; Aposteljeschicht 4:12). Oba daut ons dit Leesjelt waut halpen kaun, mott wie aun Jesus jleewen, ons Läwen endren un ons deepen loten (Matäus 28:19-20; Johanes 3:16; Aposteljeschicht 3:19-20). Eenem sien Gloowen wiest sikj derch Woakjen (Jakobus 2:24, 26) De Radunk kaun eena sikj oba nich vedeenen, daut es mau derch “Gott siene Jnod” (Galata 2:16, 21, De Plautdietsche Bibel).

6.   Himmel. Jehova Gott, Jesus Christus un de true Enjel läwen em Himmel (Psalm 103:19-21; Aposteljeschicht 7:55). b Eene kjliene Grupp Menschen, 144000, woat vom Doot oppjewakjt toom em Himmel läwen un doa met Jesus Christus toop en Gott sien Kjennichrikj harschen (Daniel 7:27; 2. Timotäus 2:12; Openboarunk 5:9-10; 14:1, 3).

7.   De Ieed. Gott haft de Ieed jemoakt, daut de Menschen doa fa emma bowen wonen kjennen (Psalm 104:5; 115:16; Liera 1:4). Gott woat aul dee Menschen beloonen, waut sikj aun siene Jebooten hoolen. Dee woaren kjennen fa emma em Paradies oppe Ieed läwen un gaunz jesunt sennen (Psalm 37:11, 34).

8.   Daut schlajchte un daut Lieden. Daut funk aun, aus een Enjel sikj jäajen Gott stald (Johanes 8:44). Nodäm daut dee daut jedonen haud, wort dee “de Soton” un “de beesa Fient” jenant. Dee veleid de ieeschte beid Menschen, sikj uk jäajen Gott to stalen. Daut haft fa dee äare Nokomen grooten Schoden jebrocht (1. Mose 3:1-6; Reema 5:12). Om dän Twiewel oppem kloaren to brinjen, waut de Soton oppbrocht, lat Gott daut Lieden un daut schlajchte fa eene jewesse Tiet too. Oba daut woat nich fa emma sennen.

9.   De Doot. Wan de Menschen ieescht jestorwen sent, dan sent dee nich mea (Psalm 146:4; Liera 9:5, 10). Dee woaren nich em Halenfia jekjwält.

    Gott woat dusende Millionen Vestorwne wada toom Läwen brinjen (Aposteljeschicht 24:15). Oba dee, waut dan nich wellen no Gott horchen, woaren fa emma venicht woaren un kjennen dan nich mea vom Doot oppstonen (Openboarunk 20:14-15).

10.   De Famielje. Soo aus Gott daut von Aunfank aun väajeseenen haud, es de Ehestaunt een Bunt tweschen eenen Maun un eene Fru, un doaraun hool wie ons. De eensja Grunt toom sikj scheeden loten es jeschlajchtelje Onmoral (Matäus 19:4-9). Wie sent ons secha, daut de weisa Rot ut de Schreft eene Help es, daut de Famielje daut scheen jeit (Efeesa 5:22 bat 6:1).

11.   Ons Deenst fa Gott. Wie bäden nich daut Kjriez aun ooda sest irjent Bilda (5. Mose 4:15-19; 1. Johanes 5:21). Hia es eenjet, waut to onsen Deenst fa Gott jehieet:

    •   To Gott bäden (Filippa 4:6).

    •   De Schreft läsen un studieren (Psalm 1:1-3).

    •   Doaräwa nodenkjen, waut wie ut de Schreft lieren (Psalm 77:13).

    •   Ons vesaumlen toom bäden, de Schreft studieren, sinjen, äwa jeisteljet räden un toom onse Gloowesbreeda un aundre Moot toospräakjen (Kolossa 3:16; Hebräa 10:23-25).

    •   “Daut Evangelium von Gott sien Rikj” prädjen (Matäus 24:14, De Plautdietsche Bibel).

    •   Dee halpen, waut daut fält (Jakobus 2:14-17).

    •   Vesaumlungshiesa un aundre Jebieda buen un unjahoolen, waut wie fa ons biblischet Liawoakj oppe gaunze Welt brucken (Psalm 127:1).

    •   Methalpen, wan doa wua waut schlemmet jeworden es, soo aus een Owwada ooda Ieedbäben (Aposteljeschicht 11:27-30).

12.   Onse Organisazion. Wie sent en veschiedne Vesaumlungen aufjedeelt un en jieda Vesaumlunk es eene Grupp Eltestasch, waut dee leiden deit. Daut sent nich Menschen, waut besondre Kjleeda brucken ooda noch besonda aunjerät motten, un dee kjrieen uk nich betolt (Matäus 10:8; 23:8). Wie velangen nich dän Tieenden un bie onse Toopkomes woat uk nich Jelt toopjekollakjt (2. Korinta 9:7). Ons gaunzet Woakj woat von friewelje Gowen betolt un doa woat nich jesajcht, wäa waut enjelajcht haft.

     De Väastaunt von Jehova siene Zeijen es eene kjliene Grupp erfoarne Christen, waut en onse Hauptoffiz deenen. Dee leiden daut Woakj von Jehova siene Zeijen oppe gaunze Welt (Matäus 24:45).

13.   Onse Eenichkjeit. Wie sent oppe gaunze Welt em Gloowen veeent (1. Korinta 1:10). Wie sent aula veschieden, komen von veschiedne Velkja, Raussen un sent uk nich äwareen oppjewossen, oba wie schaufen sea doaropp, daut wie ons aula eenich sent (Aposteljeschicht 10:34-35; Jakobus 2:4). Doamet es oba nich jesajcht, daut eenem krakjt väajesajcht woat, waut eena doonen saul. Jieda eena schoapt sien Jewessen met de Schreft opp un deit dan fa sikj selfst entscheiden (Reema 14:1-4; Hebräa 5:14).

14.   Ons Läweswaundel. Wie wellen en aules, waut wie doonen, de woare Leew wiesen (Johanes 13:34-35). Wie wellen uk nuscht doonen, waut Gott nich jefelt. Biejlikj lot wie ons nich Bloot enlakjen, wiels Gott nich well, daut wie daut orrajcht brucken (Aposteljeschicht 15:28-29; Galata 5:19-21). Wie sent frädelje Menschen un haben uk nuscht met Kjrich to doonen (Matäus 5:9; Jesaja 2:4). Wie achten de Rejierunk von daut Launt, wua wie läwen, un hoolen ons aun dee äare Jesazen, soo lang aus dee nich jäajen Gott siene Jebooten sent (Matäus 22:21; Aposteljeschicht 5:29).

15.   Woo wie to aundre sent. Jesus säd: “Du saust dienen Noba jrod soo goot sennen aus die selfst.” Hee säd uk, daut Christen “nich von dise Welt” sent (Matäus 22:39; Johanes 17:16; De Plautdietsche Bibel). Wie proowen, “aun aule Menschen goodet [to] doonen”, oba wie jäwen ons nich met polietische Sachen auf un stonen ons uk nich met aundre Kjoakjen toop (Galata 6:10, De Plautdietsche Bibel; 2. Korinta 6:14). Doamet es oba nich jesajcht, daut wie doajäajen schaufen, wan aundre daut doonen wellen (Reema 14:12).

 Wan du noch mea weeten west, waut Jehova siene Zeijen jleewen, dan kaust du opp onse Websied kjikjen, bie eent von onse Offizen froagen, no eent von onse Toopkomes komen, waut en diene Omjäajent es, ooda wäm von Jehova siene Zeijen froagen, waut du bejäajenst.