Nä, Jehova siene Zeijen sent nich eene Sekt. Wie sent Christen un wie bemieejen ons sea, Jesus sien Biespel notodoonen un no daut to läwen, waut hee jelieet haft.

 Nich aule kjennen daut Wuat “Sekt” äwareen vestonen. Well wie hia mol tweeatlei seenen, woo de Menschen daut jeweenlich vestonen kjennen. Dan woat kloa woaren, daut Jehova siene Zeijen nich eene Sekt sent.

•   Eenje haben daut soo tohoolen, daut eene Sekt een niea ooda framda Gloowen es. Jehova siene Zeijen haben nich eenen nieen Gloowen oppjemoakt. Enne Städ daut well wie Gott soo aunbäden, aus de ieeschte Christen daut deeden. Von dee äa Biespel un dee äare Lieren kjenn wie en de Schreft läsen (2. Timotäus 3:16-17). Un es de Schreft nich uk daut Buak, waut ons sajcht, woo eena Gott deenen saul?

•   Eenje jleewen uk, daut eene Sekt eene jefäadelje Grupp es, waut eenen Mensch nofoljen deit. Jehova siene Zeijen gonen nich irjent eenen Mensch hinjaraun. Em Jäajendeel, wie komen daut no, waut Jesus to siene Nofolja säd: “Jie haben eenen Meista, daut es Christus” (Matäus 23:10, De Plautdietsche Bibel).

 Jehova siene Zeijen sent nich eene jefäadelje Sekt; dee äa Gloowen es an selfst un uk aundre toom gooden. Toom Biespel haft ons Woakj aul väle jeholpen, von schlajchte Aunjewanheiten loostokomen, soo aus Droggs brucken ooda supen. Wie lieren uk oppe gaunze Welt dusende Menschen läsen un schriewen. Un wan wua een Owwada ooda Ojjlekj passieet, sent wie emma reed uttohalpen. Wie bemieejen ons sea, aundre goots to doonen, krakjt soo aus Jesus siene Nofolja daut jeboden haft (Matäus 5:13-16).