De Watch Tower Bible and Tract Society of Pennsylvania es nich eene Haundelsjesalschoft, waut opp Jelt vedeenen es. Jehova siene Zeijen brucken dise Jesalschoft fa äa Woakj oppe gaunze Welt, biejlikj om Biblen un biblische Bieekja ruttojäwen. Dee wort aune 1884 no de Jesazen von de Prowins Pennsylvanien (Stäts) no oppjestalt.

 Aus dise Jesalschoft oppjestalt wort, wort oppjeschräwen, wuaropp dee schaufen wudd. Dee sull de Menschen “em Gloowen halpen, lieren un christelje Leew wiesen”. Dee schauft besonda doaropp, daut “daut Evangelium von Gott sien Rikj met Jesus Christus aus Kjennich jeprädicht un jelieet woat”. Eena kaun bloos een Poat von dise Jesalschoft sennen, wan eena enjelot woat, un nich, wiels eena een deel Gowen jejäft haft. Dee, waut to dise Jesalschoft jehieren, un de Väaschte, waut doa sent, unjastetten dän Väastaunt von Jehova siene Zeijen.

 Buta de Watch Tower Bible and Tract Society of Pennsylvania haben Jehova siene Zeijen en veschiedne Lenda noch een schoof aundre Jesalschoften. Eenje von dise Jesalschoften haben en äaren Nomen uk “Watch Tower” ooda “Watchtower” bennen ooda de Äwasatunk von dise Wieed.

 Dise Jesalschoften haben ons jeholpen, veschiednet to doonen, biejlikj:

•   Bieekja schriewen un rutjäwen. Wie haben aul soo bie 220 Millionen Biblen rutjejäft un ojjefäa 40 dusent Millionen biblische Bieekja un daut opp mea aus 900 Sproaken. Opp de Websied jw.org kjennen de Menschen de Bibel emsonst opp mea aus 160 Sproaken läsen. Dee kjennen doa uk Auntwuaten opp äare Froagen finjen, soo aus “Waut es Gott sien Kjennichrikj?”

•   Schoolen oppstalen. Wie haben veschiedne Schoolen, wua de Menschen von de Schreft belieet woaren. Biejlikj vonne 1943 aun sent doa mea aus 9000 von Jehova siene Zeijen en de Gilead-Bibelschool fa Missionoaren utjelieet worden, om aus Missionoaren to deenen ooda daut Woakj oppe gaunze Welt sestwoo to unjastetten. Un jieda Wäakj woaren millionende Menschen uk soone, waut nich Jehova siene Zeijen sent, bie onse Toopkomes belieet. Wie halpen de Menschen uk, läsen un schriewen to lieren. Doatoo hab wie eene School uk een Buak, waut opp 120 Sproaken äwasat es.

•   Christelje Leew wiesen. Wan doa waut schlemmet passieet es, dan halp wie deejanje, waut doarunja lieden motten, endoont aus daut nu von Menschen veuasoakt es ooda aus daut veleicht derch een Owwada ooda een Ieedbäben jeworden es. Soo deed wie daut biejlikj, aus aune 1994 en Ruanda soo väl Menschen omjebrocht worden un uk aus aune 2010 en Haiti daut Ieedbäben wia.

 Wan wie derch de Jesalschoften, waut wie oppjestalt haben, uk väl tostaund jebrocht haben, henjt ons Woakj oba nich von dee auf. Jieda Christ es daut schuldich, Gott sien Jeboot notokomen un de goode Norecht to prädjen un to lieren (Matäus 24:14; 28:19-20). Wie sent ons secha, daut Gott ons Woakj unjastetten deit un daut hee deejanja es, “dee daut waussen moakt” (1. Korinta 3:6-7, De Plautdietsche Bibel).