Wie talen bloos dee fa Jehowa siene Zeijen, waut jieda Moonat de goode Norecht von Gott sien Rikj prädjen (Matäus 24:14). Daut sent soone, waut sikj haben aus Jehowa siene Zeijen deepen loten, un uk soone, waut noch nich jedeept sent, oba aul de Frieheit jekjräajen haben, prädjen to gonen.

 Nä. Gowen haben nuscht doamet to doonen, aus eena to eent von Jehowa siene Zeijen talt ooda aus dee en onse Organisazion eene besondre Oppgow ooda een besondret Aumt kjricht (Aposteljeschicht 8:18-20). Bie de mieeschte Gowen weet wie nich mol, wäa dee jejäft haft. Jieda eena von Jehowa siene Zeijen jeft von siene Tiet, Krauft un waut dee sest noch haft, om ons Woakj oppe gaunze Welt to unjastetten. Jieda eena jeft daut, waut hee jäwen kaun un well (2. Korinta 9:7).

 Jehowa siene Zeijen jäwen jieda Moonat eenen Berecht von äaren Prädichtdeenst aun äare Vesaumlunk un daut es friewellich.

 De Berechten woaren aula toopjetalt un dan schekjen de Vesaumlungen dee Zolen no de Offiz von Jehowa siene Zeijen, waut äwa äa Launt aunjestalt es. De Offiz schekjt de volle Sommen von daut Launt ooda de Jäajent dan no onse Hauptoffiz.

 Aum Enj von jieda Deenstjoa a woat daut nojeseenen, woont daut hechste Numma von Jehowa siene Zeijen en jieda Launt jewast es. Dee Nummasch woaren toopjetalt un dan weet wie, woo väl Jehowa siene Zeijen daut oppe gaunze Welt jeft. Opp onse Websied bie “Oppe gaunze Welt” finjt eena fa jieda Launt dän Berecht von daut Prädichtwoakj. Daut to läsen jeft ons Moot. Biejlikj soo wia daut bie de ieeschte Christen (Aposteljeschicht 2:41; 4:4; 15:3).

 Wan wie soone uk nich aus Jehowa siene Zeijen talen, sent dee oba sea welkom en onse Vesaumlungen. De mieeschte von dee komen biejlikj no daut Aundenkjen aun Jesus sienen Doot, waut wie jieda Joa haben. Wie weeten ojjefäa, woo väl von dee doa hankomen, wan wie daut tooptalen, woo väl doa met aules toop wieren, un dan de Zol auftrakjen, woo väl Jehowa siene Zeijen daut jeft. Aune 2023 wieren bie daut Aundenkjen aun Jesus sienen Doot 20 461 767.

 Wie doonen uk met aundre emsonst de Bibel studieren, un väle jleichen daut, wan dee uk nich no onse Toopkomes komen. En daut Joa 2023 worden doa em Derchschnett jieda Moonat 7 281 212 Bibelstudiums derchjefieet, un bie eenje Studiums wieren miere Persoonen bie.

 De Rejierungen talen daut jeweenlich aundasch aus wie, wiels dee de Menschen bloos froagen, to woone Jemeent see jehieren. Biejlikj sajcht de stätsche “Census Bureau”, daut see de Menschen befroagen, “om uttofinjen, aus dee sikj to eene jewesse Jemeent talen”. Dee sajen uk, daut äare Zol, waut see kjrieen, sikj nich doano recht, wua de Menschen werkjlich bie Jemeent sent, oba doano, waut jieda eena von sikj selfst sajcht. Oba wie talen dee fa Jehowa siene Zeijen, waut prädjen un doavon eenen Berecht jäwen, un nich dee, waut bloos sajen, daut see eent von Jehowa siene Zeijen sent.