Waut jesajcht woat: Jehova siene Zeijen loten sikj nich doktren, wan dee krank sent.

 Woo daut es: Wie seenen doano, daut wie fa ons un onse Famieljes goode Doktarieen haben. Wan ons waut schot, sieekj wie ons goode Doktasch, waut sikj uk doamet vestonen, onen Bloot to doktren un to opperieren. Un wie sent sea froo doaräwa, daut daut met de Doktarieen aul soo wiet veraunjekomen es. Väle Doktasch, waut sikj jelieet haben, Jehova siene Zeijen onen Bloot to doktren, kjennen daut nu uk bie aundre doonen. Soo haben de Menschen nu en väle Lenda de Jeläajenheit, daut see sikj kjennen met waut aundret doktren loten un de Jefoaren utem Stich gonen, waut Bloot enlakjen haft, biejlikj de Krankheiten, waut eena sikj kaun oppschlapen, de Fäla, waut doabie passieren kjennen, ooda daut de Kjarpa sikj jäajen daut enjelakjte Bloot wäat.

 Waut jesajcht woat: Jehova siene Zeijen jleewen, daut eena wada jesunt woat, wan eena bloos jenuach Gloowen haft.

 Woo daut es: Jehova siene Zeijen proowen nich, Kranke derch Wunda, bäden ooda Henj opplajen to heelen.

 Waut jesajcht woat: Daut kjemt sea dia, onen Bloot to doktren.

 Woo daut es: Em gaunzen jenomen kjemt daut ut, onen Bloot to doktren. a

 Waut jesajcht woat: Jieda Joa stoawen väle von Jehova siene Zeijen uk von dee äare Kjinja, wiels dee sikj nich loten Bloot enlakjen.

 Woo daut es: Daut stemt nich. En de vondoagsche Tiet jeft daut een Deel Doktasch, waut jeweenlich onen Bloot enlakjen opperieren, uk bie schwoare Oppereeschen, soo aus aum Hoat, aun de Knoakes ooda wan doa wäa biejlikj eene fresche Nia ooda sest waut kjricht. b Dee, waut onen Bloot doktren, komen jeweenlich krakjt soo goot ooda noch bosja wada oppe Been aus dee, waut sikj loten Bloot enlakjen, un bie Kjinja es daut krakjt soo. c Aulmols kaun kjeena daut secha sajen, daut een Kranka stoawen woat, bloos wäajen se dän nich Bloot enlakjen, ooda daut dee läwen blift, wan se dän met Bloot doktren.

 Daut haft dolla met dän Gloowen to doonen un nich soo sea met de Jesuntheit. En daut Oole uk en daut Niee Tastament woat ons gaunz kloa jesajcht, daut wie von Bloot wajchbliewen sellen (1. Mose 9:4; 3. Mose 17:10; 5. Mose 12:23; Aposteljeschicht 15:28-29). Un Gott sajcht uk, daut daut Bloot daut Läwen väastalt (3. Mose 17:14). Wie bliewen aulsoo von Bloot wajch, wiels wie Gott jehorchen wellen, dee ons daut Läwen jejäft haft.

 Eene Tiet trigj dochten de mieeschte, waut met Doktarieen schauften, daut daut sea jefäadlich wia, onen Bloot to doktren, un daut eena doabie mau rajcht sien Läwen opp Spell saten wudd. Oba nu haben väle äare Meenunk jeendat. Biejlikj stunt aune 2004 en eene Tietschreft fa Doktasch: “Väle Doktarieen, waut se rutjefungen haben om Jehova siene Zeijen to doktren, woaren en de komende Tiet uk fa aule aundre Kranke jebrukt woaren.” d En de Tietschreft Heart, Lung and Circulation säd daut aune 2010: “Eena wudd nich bloos sellen bie JZ [Jehova siene Zeijen] onen Bloot enlakjen opperieren, eena wudd daut sellen bie aulem doonen.”

 En de vondoagsche Tiet jeft daut aul dusende Doktasch oppe gaunze Welt, waut schwoare Oppereeschen moaken onen Bloot enlakjen. Mau rajcht en oame Lenda jeft daut Mäajlichkjeiten, onen Bloot to doktren, un uk väle Menschen, waut nich Jehova siene Zeijen sent, wellen sikj onen Bloot doktren loten.