Nä. Jehova siene Zeijen sent Christen un aul dee äare Lieren stetten sikj oppe Bibel. De Schreft lieet nich, daut eene jewesse Rejierunk, een Volkj ooda een Launt bäta es aus daut aundre. Eenje Relijionen lieren, daut biblische Profezeiungen doaropp handieden, daut de Juden en de vondoagsche Tiet wada wudden äa ieejnet Launt en Palestina haben. Jehova siene Zeijen jleewen daut nich. Soo aus wie de Schreft vestonen kjennen, es doa soont nich verutjesajcht. De Woaktorm, Jehova siene Zeijen äare wichtichste Tietschreft, sajcht gaunz kloa: “De Schreft lieet nich dän polietischen Zionismus”.

 En de Encyclopædia Britannica woat jesajcht, waut Zionismus es. Daut es eene “nazionale judische Bewäajunk, waut daut Ziel haft, en Palestina een Launt fa de Juden to moaken un dit Launt to unjastetten”. De Zionismus stett sikj opp polietische Iedeeen un haft uk met Relijion to doonen. Jehova siene Zeijen stalen sikj opp kjeenem siene Sied, wan daut om polietischen Zionismus jeit, un dee haben uk nich dän Zionismus aus eent von äare Glooweslieren.

 Daut eensje Ziel von Jehova siene Zeijen es, Gott to deenen. Wie unjastetten kjeene polietische Iedeeen un Bewäajungen, uk nich dän Zionismus. Daut es wiet un breet bekaunt, daut Jehova siene Zeijen sikj en de Politikj opp kjeenem siene Sied stalen, un en eenje Lenda sent dee doawäajen aul sea vefolcht worden. Wie sent ons gaunz secha, daut bloos Gott sien himlischet Rikj hia oppe Ieed werkjlich fa Fräd sorjen woat; kjeene menschelje Rejierunk ooda Bewäajunk kaun daut doonen.

 Eene Sach, waut wie aus Jehova siene Zeijen sea iernst nämen, es, daut wie ons aun de Jesazen von daut Launt hoolen, wua wie läwen. Wie stalen ons nich jäajen de Rejierunk, un wie nämen uk nich daut Jewäa en de Haunt.