Dän 12. August 2022 wia de ieeschte Halft von daut 1. Poat von de Rieej Videos “De goode Norecht äwa Jesus” foadich. Boolt woa wie met de latste Halft von dit ieeschte Video aunfangen un daut saul en Oktooba 2022 foadich sennen.

Wie hieeden aul ea en eenen Berecht, daut de Breeda dän 20. Mei 2022 aunfungen met daut Video “De goode Norecht äwa Jesus” opptoschnaken, un daut deeden se mieeschtens bennen. To dee Tiet musten dee noch en bät wachten, wäajen de Papieren noch nich gaunz reed wieren fa daut Jebied, waut se fa äare Oabeit brukten un fa de ieeschtemmasche Jebieda, waut se jebut hauden toom filmen. Dän 15. Juli 2022 wieren de Papieren dan foadich un de Aufdeelunk fa daut Buwoakj em Betel von Australasien kunnen dan de Video-Grupp von äare Jäajent aules enhendjen. Nu kjennen dee aule Jebieda brucken toom de Rieej Videos moaken.

Äwa 500 friewelje Oabeida kjeemen von Australien un Nie-Seelaunt, om bie daut Buwoakj fa dän Film mettohalpen. Dise friewelje Oabeida buden väl Jebieda un aundret fa dän Film, waut soo aus ieeschtemma lat. Aules toop wieren daut äwa 7 000 Meeta em Veakaunt (ooda 75 347 Schoo). Brooda Russell Grygorcewicz, de Plona von dit Bukommitee, sajcht: “Wan wie uk väl Schwierichkjeiten hauden met dit Buwoakj, kunn wie oba gaunz kloa seenen, woo Jehova ons halpen deed, soo daut wie kunnen wiedakomen. Wie sent ons gaunz secha, daut dit bloos mäajlich wia met Jehova sienen heiljen Jeist.”

Brooda Ronald Curzan, een Helpa vom Liakommitee, wia doa, aus se met dit ieeschte Video aunfungen. Hee säd: “Daut wia sea besonda, woo dee friewelje Buoabeida un Betelfamielje aula soo schaftich toopschauften. Fa Joaren hab wie dit Buwoakj jeplont un nu frei wie ons sea to seenen, woo aules jebut es un jebrukt woat. Daut jeft ons sea väl Moot, woo de Breeda un Sestren en Australasien dit Buwoakj unjastetten. Wie sent ons gaunz secha, daut dise 18 Poats von dit besondre Video äwa Jesus woat väl Menschen äwa de gaunze Welt sea to Hoaten gonen.”

Brooda Kenneth Cook vom Väastaunt wia doa fa de latste poa Doag, aus se daut 1. Poat muaken. Hee säd: “Daut wia kloa to seenen, woo Jehova ons halpen deed met dit Video. Wie sent Jehova sea dankboa un uk aul dee, waut soone goode Enstalunk hauden un halpen deeden met daut buen un met daut Video moaken. Wie bäden, daut dit besondre Video väle halpen woat, von Jesus sien Biespel to lieren un uk Jehova bäta kjanen to lieren.”