Sesta Iryna Makukha es 46 Joa oolt un onbefriet. Aus de Kjrich en de Ukraine aunfunk, wort see sikj fuaz eenich, leewa von doa to veloten. See wankt no daut Zuach-Stäschen von Charkiw. Doa wia een grootet Derchenaunda un väl Menschen stieejen eefach en irjenteenen Zuach nenn, onen to weeten, wua dee hanfua. De Zuach, wua Iryna enstieech, haud de Ruten toojedakjt, daut se dän nich wudden soo leicht aunjriepen. Un mau ieescht hinjawäajes wort see en, daut de Zuach no daut Launt Sloowakei fua.

Iryna wont nu en een Nobalaunt, en de Tschechische Republikj. See kjeem dän 3. Moaz 2022 en Prag aun, waut de Hauptstaut es. See haft aul eene Oabeit jefungen, wua see deit reinmoaken. Un see wont met twee aundre ukrainische Sestren toop, waut uk Flichtlinja sent. Iryna lieet nu de tschechische Sproak, un deent wieda aus Pionia, waut aul fa 20 Joa daut wichtichste fa ar es.

Iryna säd: “Ekj hab daut selfst kunt beläwen, woo Jehova sikj derch de Breeda om ons kjemmat. Daut haft mienen Gloowen sea jestoakjt.”

Meist 23 000 Breeda un Sestren sent sikj eenich jeworden, en aundre Lenda Schutz to sieekjen. Wan daut doa uk sechra es, es daut doawäajen oba nich leicht fa an. Dee motten no eene Oabeit un uk no eene Woninj sieekjen, de Papieren von daut Launt moaken, äare Kjinja doa no de School schekjen un uk de Sproak lieren. Oba waut dee en dise schwoare Tiet sea halpt, es wieda em jeisteljen drock to bliewen, un uk de Help, waut dee von de leeftolje Breeda kjrieen.

De Famielje Perceac sent äare dree: Anatoli, Olena un de 17-joasche Alina. Dee fungen en Rumänien een nieet Läwen aun, wiels en de Oblast Mykolajiw-Jäajent, wua see ea wonden, wia välet gaunz vebomt. Dee kjeemen dän 6. Moaz 2022 en Rumänien aun. Un wiels Anatoli Papieren von Moldawien haft, leeten se am met siene Famielje toop no Rumänien trakjen. Olena säd, woo daut fa ar wia, wan eena von eenem sien Launt no een aundret trakjen mott. See säd, daut es soo, aus “wan eena eenen Boom met de Wartlen toop utgroft un dän opp eene gaunz aundre Städ saten deit.”

Met de Help von de Breeda von Rumänien haft de Famielje Perceacs aul eene Woninj jefungen. Anatoli un Olena haben uk aul beid eene Oabeit, un Alina kaun äare School en de Ukraine äwa Internet foadich moaken.

De Breeda un Sestren von Rumänien halpen an nich bloos em tieteljen, oba uk em jeisteljen un daut see kjennen foadich woaren met aul daut schwoare. Dee sent uk foaken met dee toop, daut dee sikj nich soo auleen feelen en daut framde Launt. Olena un Alina lieren flietich de rumänische Sproak derch de JW Language-App un uk doaderch daut see em Prädichtdeenst metmoaken en äare niee Vesaumlunk. Anatoli es met de rumänische Sproak oppjewossen.

Anatoli säd: “Von Aunfank aun sag wie, woo Jehova ons biestunt. Derch de Organisazion un de Unjastettunk von de Breeda un Sestren, späad wie, woo Jehova ons leeft.”

Dän 27. Feebawoa kjeem Alina Havryliuk, waut ver dän Kjrich Wätfru wort, met äaren 16-joaschen Sän Vladyslav no de Staut Suwalki en Poolen. See kjeemen von Vinnystia en de Ukraine. Alina säd: “Aum Aunfank muak ekj mie daut schwoa doamet, wua mien Sän un ekj wudden wonen un met waut wie wudden ons Läwen moaken. Oba ekj wia mie uk gaunz secha, daut Jehova ons wudd met aules halpen.”

Alina es 37 Joa oolt. Ar wia daut wichtich, eene Oabeit to finjen, waut ar nich wudd baudren, soo daut see kunn no de Toopkomes wanken. Un see funk eene Oabeit bie eene School, wua see reinmoaken deit. See säd: “Waut mie daut wichtichste es: Derch dise Oabeit hab ekj mea Tiet toom prädjen un kaun uk fa ons Läwen sorjen.”

Alina un Vladyslav lieren Poolnisch un sent beid Pioniahelpa en eene poolnische Vesaumlunk. Un Vladyslav haft uk aunjefongen, no eene Huachschool to gonen.

Onse Breeda un Sestren von de Ukraine beläwen väl schwoaret un väl Veendrungen. Oba met de butajeweenelje Krauft, waut see von Jehova kjrieen, kjennen see wieda foadich woaren. Soo aus daut en 2. Korinta 4:8 (PB) sajcht: “Wie woaren von aule Sieden hoat bedrenjt, oba wie sent nich aum enj. Wie komen en Veläajenheit, oba wie vezoagen nich.”