Brooda Femi Durodola un siene Fru Yana wuaken Klock fief zemorjes opp, wäajen een Eltesta von äare Vesaumlunk an fonen deed. Yana sajcht: “De Eltesta säd, wie sullen ons nich Sorjen moaken, oba wie sullen ons reedmoaken, wäajen de rusche Soldoten no Kiew kjeemen! Aus hee daut säd, feeld ekj mie sea aunjeholt.”

Dit Poa Lied, waut fresch befriet sent, trocken sikj aun un muaken sikj en dit Hus noch äaren latsten Koffe reed un läsden dän Varsch fa dän Dach. De Varsch wia: “Wan jie . . . ruich bliewen . . . un vetruen hoolen, woa jie stoakj sennen” (Jesaja 30:15, PB). Femi bäd iernstlich to Jehova. Siene Fru Yana, waut von de Ukraine es, un Femi, waut von Nigeria es, neemen äare Nootfaultauschen un veleeten aules, waut see hauden, om no Hollaunt to flichten.

Soo aus dit haft väl Breeda un Sestren daut jegonen, waut no dän 24. Feebawoa 2022 sikj eenich worden, de Ukraine to veloten, aus Russlaunt met Jewault en de Ukraine nenkjeem. En de Ukraine sent rom 130 000 Jehova siene Zeijen. Bat nu sent sikj äwa 36 000 Zeijen eenich jeworden, äa Hus to veloten un äwa 16 000 sent no aundre Lenda jeflicht. Väle haben must äa Hus, äare Oabeit un uk äare Vesaumlunk trigjloten. Wäajen dän Kjrich haben de Mana en de Ukraine, waut tweschen 18 un 60 Joa oolt sent, nich de Frieheit, daut Launt to veloten. Buta wan een Maun Papieren haft von een aundret Launt, dan kaun dee veloten.

Dee, waut veloten, kjennen sikj bloos een poa von de wichtichste Sachen metnämen. Dee reisen met eenen Zuach ooda eene Boss, om no soone Städen to komen, waut sechra sent. Daut es eene schwoare Reis un eenjemol weeten dee verheipts nich, wua de Reis hanjeit. Dee äa stoakja Gloowen aun Jehova jeft an de Krauft, von doa to veloten, wua Kjrich es, onen to weeten, aus see noch mol wada woaren trigjkomen.

Yana sajcht: “Wie haben aules trigjeloten. Bloos een poa Sachen kunn wie metnämen. En dise Loag sent wie enjeworden: Ons Frind sennen met Jehova es daut eensje, waut werkjlich wichtich es.”

Sesta Lilia Antoniuk wond en Kiew. See hieed de Woarnunk fa Bommen un dan hieed see dee uk oppdäwren. Oppe Gaussen wieren vebrende Foatieja un uk Bieta von Hiesa un Brigjen, waut vebomt wieren.

Lilia un äare 17-joasche Mejal Oleksandra worden sikj eenich, de Ukraine to veloten. Miere Doag reisden see en eenen stiew vollen Zuach no Poolen. See hauden sea weinich to äten un musten fa Stunden stonen. De Sestren feelden sikj een bät bäta, aus see ieescht en Przemyśl, Poolen aunkjeemen.

Lilia sajcht: “Aus wie de Breeda met de JW.ORG-Zeins sagen, wist wie, dee wudden sikj om ons kjemren.” Toieescht brochten se de Sestren no een Vesaumlungshus, daut dee sikj oppwoamen, äten un vereiwen kunnen, un dan brochten see dee no Städen, wua dee bliewen kunnen.

Lilia es nu en Dietschlaunt un see sajcht wieda: “Wie feelden, woo Jehova fa ons sorjd, un daut stoakjt ons onsen Gloowen. Ekj sie sea dankboa fa Jehova siene Leew un uk fa de Breeda un Sestren, waut reed sent, en schwoare Tieden uttohalpen.”

Sesta Anastasiia Kovalyova sajcht, daut de Soldoten de Staut Saporischschja von de Loft aunjriepen deeden. Von doa, wua see wond, sach see, woo daut doa oppdachen deed, wan dee scheeten deeden, un hieed uk, woo de Bommen oppdäwaden. Daut hieed nich opp met däwren, un de twee Kjinja von Anastasiia äa Jeschwista, waut säwen un dree Joa oolt sent, wieren sea enjegrult. Un doawäajen wort de Famielje sikj eenich, von doa to veloten. Anastasiia vetalt: “Wäajen wie nich väl Sachen metnämen kunnen, fäld ons daut aun Kjleeda un uk aun aundre Sachen. De Breeda kjemmaden sikj om aules. Wie hauden aules, waut ons fäld, un soogoa noch mea aus waut ons fäld.” Anastasiia un äare Schwieesesta Anya un de Kjinja, reisden derch Poolen no Dietschlaunt.

Sesta Anastasiia Shchukina un äare Mame, Sesta Olha Lysenko, vestuaken sikj jiedatsmol en äa kjlienet Hus en dän kolden Kjala, aus dee de Woarnunk hieeden, daut doa wudd jebomt woaren. Dee sent beid Pionia un deenden doa, wua Help fäld, en de kjliene Staut Brajiliw en de Oblast Winnyzja. See wisten meist nich, aus see veloten sullen, oba aus daut doa schlemma wort, worden see sikj eenich to veloten. See neemen bloos daut needichste met un reisden twee Doag met dän Zuach un hauden sea weinich kunt schlopen. Fa Olha wia daut nich leicht to flichten, wäajen see es 58 Joa oolt un schaubich. Dee kjeemen Klock twee de Nacht en Rzeszów, Poolen aun. Eenje Breeda un Sestren wieren doa toom an oppnämen. Anastasiia sajcht: “Wan daut uk sea lot de Nacht wia, luaden de Breeda doa no ons. Wie sent Jehova un de Breeda un Sestren sea dankboa.”

Brooda Andrzej Chyba, waut von Poolen es, un siene Fru Elizabeth, waut von Enjlaunt es, wonden en de Staut Sumy. Dee vestuaken sikj met fief aundre toop en dän Kjala von eenen Brooda. See kunnen de Kjriejeszhets hieren un uk de Scheetarie un de Bommen. De Breeda kjrieejen Moot aus see daut lange Video von de Bibeltiet Jehova, ekj vetru opp die kjikjten. Doa jeit daut om de Jeschicht von dän Kjennich Hiskia, aus de assierische Soldoten Jerusalem wullen aunjriepen.

Andrzej, waut nu met siene Fru toop en Poolen es, säd: “De Breeda schekjten ons väl Bibelvarzhen. Dee muntaden ons biejlikj opp, dän 27. Psalm to läsen.”

Wie sent ons gaunz secha, daut Jehova onse Breeda, waut “aules veloaren” haben, säajnen woat (Filippa 3:8, JHF). Dise Breeda jleewen faust doaraun, daut daut en de Tookunft kjeenen Kjrich mea jäwen woat.