Dän 1. Aprell 2022 fungen Jehova siene Zeijen wada aun, en de Vesaumlungshiesa tooptokomen. Wan uk eenje Breeda un Sestren ieeschtlich een bät besorcht doaräwa wieren, hauden dee oba bosich doavon vejäten aus dee ieescht toop lachten un von Hoaten onse Leeda sungen; un doa kulladen mau rajcht Tronen fa Freid.

Fa eenje wia daut daut ieeschte Mol, daut dee en een Vesaumlungshus wieren.

Brooda Krzysztof Hoszowski von Poolen sajcht: “Dit wia daut ieeschte Mol, daut ekj bie een Toopkomen en een Vesaumlungshus wia. Ekj lieed de Woarheit äwa Internet kjanen un miene Doop wort äwa Zoom jewäsen. Ekj wist aul een bät, woo de Toopkomes en de Vesaumlungshiesa wieren, wiels ekj haud een deel Videos doaräwa jekjikjt. Oba ekj wia soo schaftich, wiels nu kunn ekj de Leew selfst beläwen, waut de Breeda unjarenaunda haben un uk dee äare Freid un woo oppnäment dee sent.”

Nodäm daut de COVID-19-Krankheit sikj en Moaz 2020 äwa de gaunze Welt vespreet haud, fungen Jehova siene Zeijen aun, äare Toopkomes äwa Internet to haben. Wan doa wäa nich kaun no de Toopkomes en de Vesaumlungshiesa wanken, kaun dee doawäajen noch äwa Internet doabie sennen.

Brooda Neil Campbell von Edinburgh, Schottlaunt sajcht: “Aus daut Spell aunfunk un wie daut ieeschte Leet sungen, kunn ekj soone groote Freid späaren un ekj wia soo dankboa, daut ekj no twee Joa wada kunn met miene Breeda toop sennen.”

Wie danken Jehova doafäa, daut hee daut haft jesäajent, daut wie wada kjennen en de Vesaumlungshiesa toopkomen (Psalm 84:11).