Von dän 13. bat dän 15. Nowamba 2021 kjeem en British Columbia, waut en Wast-Kanada es, een Wada opp, waut “atmospheric river” jenant woat. Daut es toopjesaumeldet Wota, waut soo aus een Riefa enne Loft schwamt. Dis “atmospheric river” brocht butajeweenlich väl Räajen en eenje Jäajenden. Opp twintich veschiedne Städen kjrieejen dee soo väl Räajen en eenen Dach, aus noch nienich ea. Opp eenje Städen räajend daut mea aus 250 Millimeeta (10 Zoll) en de dree Doag, waut daut doa räajend. Wäajen disen Räajen jeef daut doa Äwaschwamungen un soogoa daut doa Ieed von de Boaj oppem Heiwä rutscht, daut dee de Heiwäs toomoaken musten. Eenje kunnen doaderch nich wieda reisen un aundre musten äare Hiesa veloten.

• Kjeena von dee haft Schoden jekjräajen

• 144 Vekjindja musten äa Tus veloten

• Oppet weinichste 35 Hiesa haben Schoden jekjräajen

• Daut Betel von Kanada stald een Nootfaulkommitee aun

• Deejanje, waut von äa Tus veloten musten, sent von Frintschoft ooda Breeda oppjenomen worden, en soone Städa dicht bie, wua daut nich jefäadlich wia

• Kjreisoppsechtasch un Eltestasch en dise Jäajenden spräakjen de Famieljes Moot too

• En dee Jäajenden, wua de Rejierungsbeaumte jesajcht han, daut et aul wada secha es, schaufen de Nootfaulkommitees met de Aufdeelunk fa daut Buwoakj (LDC) toop. Dee unjasieekjen de Hiesa, om to seenen, woo väl Schoden daut doa jejäft haft

• Bie aules, waut doa jedonen woat toom em Nootfaul uthalpen, woaren de COVID-19-Sechaheitsräajlen beacht

Väl Breeda un Sestren beläwden bloos dree Moonat ea sea dautselwje, aus en August 2021 een grootet Fia nich jinkj to kontrollen. Dise Breeda musten uk äa Tus veloten. Wäajen daut emma mea un schlemre Owwadasch jeft, es väl Breeda un Sestren daut aul sea togood jekomen, de Aunwiesunk notokomen, eene Nootfaultausch reed to haben.

Schwierichkjeiten un Owwadasch kjennen veleicht emma pinkjelja un oaja woaren, oba wie woaren ons opp Jehova veloten, dee ons raden woat (Habakuk 3:17-18).