En Iqaluit, Nunavut, Kanada haft de Vesaumlunk von Jehova siene Zeijen nu äa ieeschtet Vesaumlungshus jekjräajen. Aum 14. Oktooba 2022 hauden de friewelje Buoabeida daut Vesaumlungshus foadich, waut fa 50 Menschen es. Von aule Vesaumlungshiesa en Kanada es dit daut wietste em Nuaden nenn. De Iqaluit-Vesaumlunk wort mol aune 2010 oppjestalt un dee hauden äare Toopkomes bat nu en een Jebied von eene School.

Iqaluit meent “Städ von väl Fesch”, un dee Staut es opp de Baffin-Insel bie de Frobisher-Bay. Wäajen de COVID-19-Krankheit musten se daut Buwoakj fa twee Joa oppschuwen. Aus se dan ieescht aunfungen, kjeemen doa veschiedne Schwierichkjeiten opp, woo se aules doa hanbrinjen kunnen. Eena kaun doa bloos met een Äarplän ooda met een Schepp hankomen, un doa opp de Insel kaun eena uk nich Toorot kjeepen toom buen. Doawäajen musten se aul de Sachen fa daut Buwoakj doa hanschekjen, wua dee daut Vesaumlungshus buen wudden. Un wäajen daut kole Wada doa kunnen dee bloos tweschen August un Oktooba buen.

Ieescht deeden dee bie een Kongresshus en Ontario aul dän Toorot un daut Jereetschoft reedmoaken – aules toop 127 Tonnen (140 stätsche Tonnen). Aul daut deeden dee dan en 12 Kontäners un dree sea groote heltane Kaustes nenn. Dan brochten se daut no eenen Howen dicht bie Montreal, Quebec. Von doa neem een Schepp daut met, un daut fua derch dän St. Lawrence-Riefa, een Enjskje derch daut Atlantik-Mäa un tolatst en de Frobisher-Bay nenn. Wäajen doa nich soon Howen es, wua groote Schäp bie kjennen, musten dee dise Kaustes un Kontäners opp plaute Schäp nopploden. Dan deeden dee dise plaute Schäp met Boots en flaket Wota schlapen, un aus daut Wota aune Kaunt Mäa ieescht läach jenuach wia, deeden dee dise Kontäners met dän Loder aufloden.

En Iqaluit deit de Ieed emma wada enfrieren un oppdeiwen. De Winta biejlikj es daut em Derchschnett 30 Grod Celsius unja Null (22ºF unja Null). Doawäajen musten se daut Vesaumlungshus soo buen, daut daut nich Schoden kjricht.

Doa kjeemen rom 40 friewelje Buoabeida von sas Prowinsen no dise Städ, waut soo wiet auf em Nuaden es, toom doa halpen. Eent von dee wia Brooda Jason McGregor. Hee sajcht: “Wan daut uk schwierich wia, de Sachen toom buen soo wiet nom Nuaden to brinjen un wan doa uk onverhofs Trubbels oppkjeemen, deed Jehova dit Buwoakj oba sea säajnen. Daut haft onsen Gloowen jestoakjt, wiels daut jieda Dach doamet wiedajinkj.”

Wie freien ons met onse Breeda en Kanada met, daut dee een nieet Vesaumlungshus jekjräajen haben. Secha woaren dee en dise “Städ von väl Fesch” wieda eene goode Oabeit doonen aus “Menschenfescha” (Matäus 4:19, PB).