27. APRELL 2022
UKRAINE
Äwanämende Breeda fieren needje Sachen no Städen von de Ukraine, wua Kjrich es, un halpen aundre to flichten
Dän 24. Feebawoa 2022 funk de Kjrich en de Ukraine aun. Dusende von Jehova siene Zeijen sent noch emma opp soone Städen von daut Launt, wua sea jebomt woat. 21 Breeda von de ukrainische Städa Krementschuk un Poltawa wiesen woare Leew fa äare Breeda un Sestren. Dee sent reed, no soone Städen to foaren, wua sea Kjrich es toom äare Gloowesbreeda von doa to raden un needje Sachen hantofieren.
De Breeda sent en sas Wäakj rom 80 Mol han un trigj jereist un fuaren aul rom 50 000 Kilomeeta (31 000 Miel). Dee fuaren no soone Städen, wua sea Kjrich es, biejlikj no de Staut Charkiw, un haben aul kunt rom 400 Breeda un Sestren von doa ruthalpen.
Eenje Vekjindja un Kjinja, waut von de Staut Charkiw fuatjebrocht worden
Bat nu haben dee 23 Tonnen Ätwoa doahan jefieet un uk Medizien, Gesslien un aundre Sachen. Ea dee loosfoaren, kjikjen dee sea, woonen Wajch dee nämen wellen, daut dee kjennen secha reisen un soone Städen utem Stich gonen, wua sea Kjrich es. Eene Reis kaun soo bie 19 Stund dieren, wäajens de Breeda hinjawäajes foaken stellhoolen motten, wiels äare Koaren derchjesocht woaren.
Hinjawäajes flieejen Kjriejeszhets äwa an un dee seenen Hiesa, waut gaunz vestieet sent un Kjrichsfoatieja un Koaren, waut vebomt sent. Eenjemol kjennen de Breeda daut uk selfst späaren, woo daut scheddat, wan de Bommen dicht bie an oppdäwren.
Dän 2. Aprell 2022 muak Brooda Roman jroz de Sachen reed toom no de Breeda un Sestren no de Staut Charkiw fieren, aus plazlich oppe Gaussen sea jebomt wort. Hee brocht sikj en een Jebied dicht bie en Sechaheit. Un eene haulwe Stund lota kunn hee seenen, daut de Gauss, wua hee delenjd foaren wull, gaunz vebomt wia.
Brooda Volodymyr, eena von de friewelje Helpa, säd äwa soone jefäadelje Loagen: “Wie bäden foaken to Jehova un froagen am no Weisheit, soo daut wie kjennen goode Entscheidungen moaken.”
Brooda Oleksandr un siene Fru Valentyna wonden en Charkiw met siene Elren toop, waut aul ella sent. Dee kunnen tus von ut äa Fensta seenen, woo doa jebomt wort. Daut wia nich mea aus 100 Meeta (330 Schoo) wiet auf von äa Tus. Un wiels dee nich eene Koa hauden, kunnen dee sikj nich von doa fuatbrinjen.
Dan kjeemen de Breeda toom an uthalpen. Oleksandr säd: “Wie bäden sea to Jehova un dankten am, daut de Breeda jekomen wieren toom ons halpen.”
Brooda Vasyl un siene Fru Natalia un dee äare dree Kjinja vestuaken sikj miere Doag em Kjala von äa Hus. Dän 29. Feebawoa 2022 däwad eene Bomm gaunz dicht bie äa Hus opp, aus see em Kjala wieren. Daut Jedäwa wia soo stoakj, daut äa Hus gaunz vestieet wort. Vasyl denkjt daut noch, woo lud daut Jedäwa wia un daut aule Lichta em Kjala utjinjen.
Vasyl un Natalia met äare Kjinja em Kjala von äa Hus, ea daut venicht wort
Aus de Bommen een bät noleeten, socht de Famielje Schutz em Kjala von äare Nobasch. Dän 3. Moaz 2022 fungen de Breeda de Famielje un kunnen dee halpen, no eene sechre Städ em Launt to komen.
Brooda Vasyl säd, woo hee sikj feeld, aus se an fungen un no eene sechre Städ fieeden: “Wie sent Jehova soo dankboa. Ons späad sikj daut no Wäakjen, waut wie emma musten en Angst läwen. Nu kunn wie toom ieeschte Mol wada en Fräd Owentkost haben un brukten ons nich Sorjen moaken, daut onse Kjinja waut woaren kunn.”
Fa Brooda Oleksandr, eent von de friewelje Helpa, sent dise Reisen toom de Breeda uthalpen een Bewies doafäa, woo veeent Jehova sien Volkj es. Hee sajcht: “Derch dit kunn ekj seenen, woo bekjemmat Jehova om sien Volkj es. Un to seenen, woo dankboa miene Breeda un Sestren sent, jeft mie groote Freid.”
Wie sent dise äwanämende Breeda sea dankboa un wie bäden to Jehova, daut hee an säajnen mucht fa aul de Leew, waut dee wiesen (Reema 12:10).
