Dän 24.Feebawoa 2022 kjeem Russlaunt met Jewault en de Ukraine nenn. En de Ukraine jeft daut mea aus 129 000 Jehova siene Zeijen un noch dee äare Kjinja. Daut Betel haft 27 Nootfaulkommitees aunjestalt, om onse Gloowesbreeda em tieteljen uttohalpen. De breedaliche Leew es doaraun to seenen, daut de Breeda un Sestren en dise schwoare Tiet aules doonen, waut mäajlich es, om sikj unjarenaunda uk äare Nobasch em tieteljen un met äare Jefeelen to halpen.

De mieeschte von de Breeda un Sestren sent en daut Launt jebläwen, un eenje haben de Entscheidunk jemoakt, von doa to flichten. Dee, waut flichten deeden, musten aun de Jrensen bat dree ooda vea Doag en lange Rieejen luaren; eenje von de Rieejen wieren bat 30 Kilomeeta (18 Miel) lank. De Vekjindja en dee Jäajent sochten no äare Gloowesbreeda, waut doa en de Rieejen luaden un jeewen dee waut toom drinkjen un Ätwoa un holpen dee uk em tieteljen. Aus de Breeda un Sestren schlieslich derch de Jrensen kjeemen, wieren oppe aundre Sied uk wada Zeijen, waut an met jw.org Zeins bejreessen deeden toom an Troost jäwen un an em tieteljen to unjastetten.

• Daut es truarich, oba dän 1. Moaz 2022 storf een doowa Brooda von de Staut Charkiw, aus de Bommen oppdäwaden. Siene Fru wort iernstlich velazt

• Noch 3 aundre Sestren worden velazt

• Mea aus 5 000 Vekjindja musten äare Hiesa veloten

• 2 Hiesa worden gaunz vestieet

• 3 Hiesa haben väl Schoden jekjräajen

• 35 Hiesa haben een bät Schoden jekjräajen

• 2 Vesaumlungshiesa haben Schoden jekjräajen

• Väl Vekjindja haben nu nich emma Fia, Hettinj un Tellefon. Dee haben uk nich jenuach Wota

• 27 Nootfaulkommitees worden en de Ukraine aunjestalt

• 867 Vekjindja kjrieejen Help von de Nootfaulkommitees, om Städen to finjen, waut sechra sent

• De Nootfaulkommitees halpen deejanje, waut daut aun needje Sachen fält, soo aus Äten un Wota

Dise Zolen hia bowen sent von de ieeschte Berechten von doa.

Wie bäden, daut onse Breeda un Sestren woaren de Weisheit un daut Vestentnis haben toom en dise onsechre Tiet de Schwierichkjeiten uthoolen, un daut dee wieda breedaliche Leew bewiesen kjennen (Spricha 9:10; 1. Tessalonicha 4:9).