Sesta Liudmyla Mozul un Sesta Kateryna Rozdorska haben wäajen dän Kjrich must väl schwoaret derchgonen. Oba met Jehova siene Help komen dee wieda. Dee äare Ehemana, Petro Mozul un Dmytro Rozdorskyi, wieren mank de ieeschte von Jehova siene Zeijen, waut wäajen dän Kjrich en de Ukraine todood kjeemen. Daut es sea truarich, daut doa bat nu aul 34 Breeda un Sestren en disen Kjrich jestorwen sent.

Petro un Liudmyla leeten sikj aune 1994 deepen. Dee wieren 43 Joa befriet.

Sesta Liudmyla sajcht: “Aule Dach spräakjen miene Gloowesbreeda mie Moot too. . . . Dee hieren nich opp, mie to fonen. Ekj kjrieech uk eenen sea scheenen Breef vom Betel von de Ukraine, waut mie soo to Hoaten jinkj, daut ekj mau rajcht must roaren.”

De Kjrich funk dän 24. Feebawoa 2022 aun. Petro storf dän 1. Moaz 2022, aus hee un siene Famielje proowden, von de Staut Charkiw to flichten, wua sea jebomt wort. Hee deend aus Deenstaumthelpa en eene Finjasproak-Vesaumlunk.

Aul miere Doag deeden doa Bommen oppdäwren. Oba dän Dach fluagen de Kjriejeszhets krakjt äwa de Staut un fungen aun, de Staut auntojriepen. En mau 30 Minuten pakt de Famielje daut needichste en un veleeten von doa. Petro un Liudmyla wieren en eene Koa. Dee äa Sän, Oleksii, un siene Fru, Maryna, wieren en eene aundre Koa. Liudmyla sajcht: “Wie fuaren delenjd de Gauss aus de Kjriejeszhets aunfungen, doa to scheeten. Aus de Bommen oppdäwaden, schockelt mau rajcht onse Koa sea.”

Petro, waut to dee Tiet 67 Joa oolt wia, wunk haustich met siene Koa no de Sied, om nich met Oleksii siene tooptoschucken, oba hee wort doawäajen sea velazt. Hee un Liudmyla worden nom Hospitol jebrocht, wua Petro lota storf. Liudmyla wort aum Been un aum Buck velazt von schoape Bietakjes von de Bommen, waut doa oppdäwaden. Oleksii un Maryna kjrieejen kjeenen Schoden. Dree Doag lota kunn Liudmyla vom Hospitol veloten, un dan wort see daut ieescht mol en, daut Petro jestorwen wia.

Liudmyla sajcht: “Je mea ekj doaräwa nodenkj, woo goot Jehova es un waut fa scheenet hee em Verhop haft fa ons, je mea kaun ekj ennalichen Fräd späaren. Ekj sie mie gaunz secha, daut ekj mienen Ehemaun enne niee Welt wada seenen woa, un ekj frei mie nu aul soo sea to dise scheene Tiet.”

Dmytro un Kateryna wieren acht Joa befriet. Daut latste, waut see met am räd, wia aus hee oppe Oabeit wia un säd: “Ekj woa meist boolt tus sennen.”

Een poa Stund lota, daut wia dän 8. Moaz 2022, fond een Oabeitspoatna Kateryna un vetald ar, daut Dmytro em Hospitol wia. Hee haud opp eene Bomm noppjestaupt, waut dan oppjedäwat wia. Hee wort opperieet, oba fief Stund lota storf hee.

Kateryna vetalt, woo see sikj feeld nodäm daut see hieed, daut Dmytro jestorwen wia. See sajcht: “Dee Nacht neem Jehova mie nich bloos aune Haunt, oba hee hilt mie en siene Oarms. Ekj kunn daut späaren, daut Jehova sea dicht bie mie wia.”

Dmytro wia 28 Joa un haud sikj aune 2006 loten deepen. Hee wia een Eltesta en de Jäajent von Donezk en de Ukraine.

Een Stootje no Dmytro sien Bejrafnis reisd Kateryna 12 Stund no eene sechre Jäajent von de Ukraine. See sajcht: “Breeda un Sestren von de gaunze Ukraine un uk von aundre Lenda haben mie väl Moot toojesproaken. Dee weesen mie soo väl Leew un daut muak mie daut een kjlien bät leichta, met mienen Trua foadich to woaren.”

See sajcht wieda: “Waut mie uk noch Troost jeft, es de Prädichtdeenst. . . . Wan mie aules too schwoa woat, dan saj ekj Bibelvarzhen opp, soo aus Filippa 4:6-7.”

Wie weeten neiw, daut Jehova uk wieda onse leewe Breeda un Sestren stoakjen un treesten woat, waut leewe Aunjehieeje haben must begrowen wäajens dän Kjrich en de Ukraine (Psalm 61:2-4).