Vom 23. bat dän 31. Juli 2022 haben sikj bie dän Kongress “Sträw no Fräd” en de Ukraine un en aundre Lenda, wua dee han flichten deeden, Vekjindja deepen loten. Bat dän 2. August 2022 haben sikj 1 113 Menschen von de Ukraine deepen loten. Een Brooda en de Ukraine säd: “Nich mol de Kjrich kaun ons vom Jinja moaken aufhoolen. Daut es soo aus Jesus ons vespruak: ‘Ekj sie emma bie junt’” (Matäus 28:20, PB).

Hia sent eenje scheene Erfoarungen.

Natalia es 63 Joa un kjemt von Kreminna en de Luhansk-Jäajent. See un äare twee Dajchta fungen enne 1990ja Joaren aun, met Jehova siene Zeijen to studieren. Äare Dajchta kjeemen em jeisteljen goot veraun un leeten sikj deepen, oba see nich. Aus dan de Kjrich aunfunk, neem eene Famielje von Jehova siene Zeijen Natalia met no eene Jäajent, wua daut sechra wia. Dee kunnen en daut Vesaumlungshus enne Staut Iwano-Frankiwsk bliewen.

Natalia vetalt: “Wäajen ekj emma wada jehieet haud, woo Bommen oppdäwaden, späad sikj mie soo, daut ekj nich mea schaftich kjikjen kunn. De Breeda weesen mie woare Leew. Ekj funk wada aun Jehova to leewen. Ekj deed foaken de Bibel läsen un eene Sesta boot mie aun, wada de Bibel to studieren met daut Buak Een scheenet Läwen fa emma. De Sesta wia soo aus een Jeschenkj von Jehova fa mie. Ekj sie sea schaftich, daut ekj nu jedeept sie aus eene von Jehova siene Zeijen. Ekj well mie nu aun daut jratste Jeboot hoolen: Jehova Gott met mien gaunzet Hoat leewen, un met miene gaunze Seel, un met aul miene Jedanken” (Matäus 22:37).

Olia, waut von Tscherkassy kjemt, wia ojjedeepte Vekjindja aus de Kjrich aunfunk. Dän 6. Moaz 2022 deed see dan toop met äare Dochta un äa Grootkjint no Poolen flichten. See vetalt: “Aus wie aunkjeemen, haud wie bloos onse Nootfaultauschen met, oba onse Gloowesbreeda un Sestren neemen ons opp un kjemmaden sikj om ons. Derch aul dit, sie ekj mie nu gaunz secha, daut Jehova siene Organisazion veeent es un derch sienen heiljen Jeist jeleit woat. Ekj wia mie dan noch eenja, mie Jehova hantojäwen. Hee holp mie en dise schwieeje Tiet un ekj well am nu deenen un wiesen, daut ekj am dankboa sie.”

Yulia es 18 Joa un kjemt von de Donezk-Jäajent. Äare Elren sent Jehova siene Zeijen, oba see haud sikj nich deepen loten. See vetalt, waut see beläwd, aus de Kjrich aunfunk: “Ekj lieech oppe Flua un mie wort kloa, ekj kunn aulen Tiet stoawen. De Gauss, wua miene Famielje wond, wia gaunz twei. Oba wie haben äwaläft. Nodäm daut ekj dit beläft haud, bäd ekj to Jehova un docht äwa siene Ieejenschoften no, un doaderch lieed ekj am bäta kjanen. Ekj twieweld dan nich mea, aus ekj mie am hanjäwen wull. Jehova haft miene Jebäda jehieet un wees mie, daut hee opp miene Sied wia. Ekj wist aul väl von Jehova, oba nu leew ekj am.” Yulia leet sikj dän 23. Juli 2022 deepen.

David, waut alf Joa es, deed met siene Famielje toop no Dietschlaunt flichten aus de Kjrich aunfunk. Aus hee noch mau näajen Joa wia, wort hee aul ojjedeepta Vekjindja. Oba nu well hee noch mea fa Jehova doonen. Hee sajcht: “Ekj hab mie deepen loten, wiels ekj Jehova leew un sien Frint sennen well. Bie de Doop must ekj fa Freid roaren, wiels ekj nu Poat von Jehova siene Famielje sie. Ekj jleich daut, met Menschen äwa Jehova to räden un waut hee sikj fa de Menschen väajenomen haft. Doawäajen well ekj Pionia woaren. Ekj well uk de Breeda un Sestren vonne Vesaumlunk halpen un Deenstaumthelpa woaren. Oba von don aus ekj aune 2018 em Betel en Lwiw (ooda Lemberg) wia, es daut mien jratsta Wensch, em Betel to deenen.”

Oleana von Kiew es aune 2011 ojjedeepte Vekjindja jeworden. Fa 10 Joa jinkj see nich mea no de Toopkomes un deed nich mea prädjen. Aune 2020 deeden de Eltestasch met ar räden un jeewen ar daut Heft Komm zurück zu Jehova. See vetalt: “Ekj funk wada aun de Bibel to studieren un jinkj wada no de Toopkomes, oba een Stoot lota hieed ekj wada opp. Nu, en de Tiet von dän Kjrich, hab ekj kloa jeseenen, woo Jehova no miene Jebäda horcht un woo hee mie beschitzen deed. Hee wees mie siene Leew un ekj kjrieech ennalich Fräd. Ekj deed no Rumänien flichten un funk doa Jehova siene Zeijen. De Leew, waut dee mie weesen un woo dee om mie bekjemmat wieren, wia soo aus eene woame Dakj, waut Jehova äwa mie spreed.” Oleana haft sikj dän 24. Juli 2022 deepen loten. See sajcht noch: “Ekj sie Jehova sea dankboa, daut hee soo väl Jedult met mie haud. Nu weet ekj: ‘Fa aules sie ekj stoakj derch dän, dee mie de Krauft jeft’” (Filippa 4:13, NW).

Von de Ukraine hab wie bat dän 2. August 2022 de Zolen jekjräajen, waut unjen aunjejäft sent. Dee stetten sikj opp Berechten von Breeda, waut doa opp iernst wonen. Daut kunn oba doawäajen sennen, daut de Zolen hecha sent, wiels wie nich en aule Jäajenden em Launt met de Breeda räden kjennen.

• 43 Vekjindja sent jestorwen

• 97 Vekjindja worden velazt

• 22 568 Vekjindja haben must äare Hiesa veloten

• 586 Hiesa worden gaunz vestieet

• 613 Hiesa haben väl Schoden jekjräajen

• 1 632 Hiesa haben een bät Schoden jekjräajen

• 5 Vesaumlungshiesa worden gaunz vestieet

• 10 Vesaumlungshiesa haben väl Schoden jekjräajen

• 37 Vesaumlungshiesa haben een bät Schoden jekjräajen

• 27 Nootfaulkommitees sent en de Ukraine aunjestalt

• 53 836 Vekjindja kjrieejen Help von de Nootfaulkommitees, om Städen to finjen, waut sechra sent

• 24 867 Vekjindja sent no aundre Lenda jeflicht un kjrieen doa Help von äare Gloowesbreeda