Von dan aus de Kjrich en de Ukraine aunfunk en Feebawoa 2022, sent doa rom 3 000 Hiesa von Jehova siene Zeijen, waut entwäda Schoden jekjräajen haben ooda gaunz kaputt sent. En August fungen de Breeda en de Ukraine aun, Hiesa opptofiksen opp soone Städen, wua daut secha es. De Breeda von de Nootfaul-Aufdeelunk un de Aufdeelunk fa daut Buwoakj (LDC) wieren doafäa aunjestalt. Dee deeden Sachen oppfiksen, soo aus Däakja, Fenstren un aundre kjliene Sachen. Bie eenje Hiesa, waut gaunz kaputt wieren, kunnen dee de Garazh to een eefachet kjlienet Hus moaken. Bat nu haben dee 37 Hiesa gaunz foadich un dee schaufen aun 48 Hiesa.

En dise schwoare Tiet es daut nich leicht, met Buwoakjs to schaufen. Oba de Breeda hoolen sikj nich trigj, aundre em Nootfaul uttohalpen. Svitlana, es eene Sesta, waut 70 Joa oolt es un von de Staut Welyka Dymerka en de Kiew-Jäajent es. See sajcht: “Ekj haud nich Jelt toom mien Hus von buten un daut Dak oppfiksen. Oba Jehova deed mie sea äwarauschen. De Breeda kjeemen toom mien Hus oppfiksen un daut dieed mau 3 Doag, bat dee daut foadich hauden.”

Nadiia, eene Sesta von de Staut Horenka en de Kiew-Jäajent, vetald, daut daut em Deenst nu leichta es, wiels väle haben jeseenen, woo wie aundre em Nootfaul utholpen. See sajcht: “Daut de Breeda onse Hiesa oppfiksen, es een grootet Zeichnis fa aulem. Mau rajcht Menschen, waut ekj nich mol kjan, räden von de woare Leew mank Jehova siene Zeijen. Dee kjennen daut nich jleewen, daut onse Breeda mie halpen kjeemen.”

Mau rajcht dee, waut äa ieejnet Hus veloaren haben, doonen aundre uthalpen, soo aus Yevhen un Tetiana. Dise Lied äa Hus wia gaunz vebomt. Oba enne Städ daut see bloos aun daut denkjen, waut see veloaren haben, doonen see flietich äare Gloowesbreeda uthalpen. Yevhen sajcht: “Wie wieren aul emma doarom todoonen, aundre uttohalpen. Doaderch kjenn wie bäta met onse ieejne Trubbels foadich woaren.”

Soo wia daut uk bie eene Sesta, waut Lidiia heet un en de Staut Hostomel en de Kiew-Jäajent wont. Aus de Breeda äa Hus oppjefikst hauden, brocht ar daut bat doa, daut see sikj uk aunjeef toom doa em Nootfaul uthalpen. See sajcht: “Doa wieren 16 Breeda un Sestren, waut fa 2 Wäakj aun mien Hus schauften toom daut oppfiksen. Daut wia fa mie soo, aus wan ekj aul em Paradies wia. Nu well ekj aundre uk uthalpen.”

Korz kjeem een Brooda von daut Betelkommitee en de Ukraine no dee Städa, wua utjeholpen woat toom dee Moot toospräakjen, waut äare Hiesa veloaren haben. Dis Brooda säd: “De Breeda en de Ukraine haben sikj aul emma unjarenaunda Leew jewäsen. Oba wäajen disen Kjrich, feel wie ons noch dolla vebungen. Daut jeit ons sea to Hoaten to seenen, woo onse Breeda Help kjrieen un daut dee dan noch mea em Deenst doonen un ‘Gott danken’, soo aus daut en 2. Korinta 9:12 (PB) sajcht.”

Von de Ukraine hab wie bat dän 20. Dezamba 2022 de Zolen jekjräajen, waut unjen aunjejäft sent. Dee stetten sikj opp Berechten von Breeda, waut doa opp iernst wonen. Daut kunn oba doawäajen sennen, daut de Zolen hecha sent, wiels wie nich en aule Jäajenden em Launt met de Breeda räden kjennen.

• 47 Vekjindja sent jestorwen

• 97 Vekjindja worden velazt

• 11 477 Vekjindja haben must äare Hiesa veloten

• 590 Hiesa worden gaunz vestieet

• 645 Hiesa haben väl Schoden jekjräajen

• 1 722 Hiesa haben een bät Schoden jekjräajen

• 7 Vesaumlungshiesa worden gaunz vestieet

• 19 Vesaumlungshiesa haben väl Schoden jekjräajen

• 68 Vesaumlungshiesa haben een bät Schoden jekjräajen

• 26 Nootfaulkommitees sent en de Ukraine aunjestalt

• 54 212 Vekjindja kjrieejen Help von de Nootfaulkommitees, om Städen to finjen, waut sechra sent

• 26 892 Vekjindja sent no aundre Lenda jeflicht un kjrieen doa Help von äare Gloowesbreeda