Von dän 26. Dezamba 2022 aun kunnen Pionieren un Sondapionieren en de Ukraine wada de Pioniadeenst-School haben, opp soone Städen, wua daut sechra wia. Doano woo de Omstend doa sent, kjennen eenje Pionieren perseenlich bie de Pioniadeenst-School sennen un aundre äwa Zoom. Onse Breeda un Sestren motten met väl Schwierichkjeiten foadich woaren: Doa woat jebomt, daut Fia jeit foaken ut, dee haben daut em tieteljen knaup un daut Internet ritt foaken auf. Oba doawäajen doonen dee aules, waut dee kjennen, toom bie dise besondre School sennen. Doaderch es dee äare Leew fa Jehova noch jrata jeworden un äa Gloowen stoakja.

Natalia von de Staut Krywyj Rih sajcht: “De School wia fa mie soo aus eene Radunks-Reif em deepen Wota. Dee holp mie, nich unjatogonen, wan ekj uk väl Sorjen un Angst hab.” Anastasia von de Staut Tschernowitz (ooda uk Tscherniwzi) feeld sikj uk soo un see sajcht: “En daut latste Joa wia väl schlemmet passieet, oba de School wia krakjt daut, waut mie fäld. Derch de School wia ekj mie secha, daut Jehova mie werkjlich sea leeft. Ekj sie mie gaunz eenich, daut ekj well wieda Jehova mien bastet jäwen, soo daut hee mie säajnen kaun.”

Aus Svitlana, eene Pionia-Sesta von de Staut Kizman, de Enlodunk kjrieech fa de Pioniadeenst-School, muak see sikj ieeschtlich Sorjen doaräwa. See sajcht: “Ekj vetald Jehova aul miene Sorjen, uk dee, waut ekj em tieteljen haud. Mie es daut nich een mol schod jewast, daut ekj mie gaunz opp Jehova veleet, wäajen doaderch späad ekj, woo sea Jehova mie leeft un woo sea hee om mie bekjemmat es.” Wiels Svitlana sikj soo sea aunstrenjd, funk äa Maun, waut nich eent von Jehova siene Zeijen es, uk aun, met no de Toopkomes to komen.

Bie de Pioniadeenst-School en de Staut Schytomyr musten dee twee mol en eenen Schutz-Kjala nenn, wiels doa wort jewoarnt, daut dee wudden en dee Jäajent bommen. Dee woamden dän Schutz-Kjala met eenen Holt-Owen opp un soo kunnen dee wiedamoaken met de School. Wan doa uk väl Schwierichkjeiten wieren, sajcht Valentyna, waut korz no de Staut Schytomyr jetrocken wia: “Ekj woa dise School kjeenmol vejäten. Ekj feeld mie soo aus wan Jehova mie unja siene Flichten neem.”

Soo aus en väl aundre Lenda, wieren de Pionieren en de Ukraine uk sea schaftich, aus dee hieeden, daut von de Pionieren nu nich mea soo väl Stunden velangt woaren. Nodäm daut Yulia dise Bekauntmoakunk hieed, säd see: “Mien Hoat es voll Leew fa Jehova. Aus ekj zemorjes to am bäden deed, prachad ekj to Jehova, daut ekj kunn wieda em Pioniadeenst bliewen. Ekj wist nich, woo Jehova mien Jebäd wudd beauntwuaten, oba ekj wist, daut hee opp irjenteene Wajch wudd. Nodäm aus ekj de Bekauntmoakunk hieed, daut sikj daut Stundenziel jeendat haud, wia ekj noch dankboara fa aul daut, waut Jehova fa mie deit. Dise Bekauntmoakunk wia fa mie soo, aus wan ekj aum Enj von de Pioniadeenst-School noch waut scheenet seetet toom äten kjrieech.”

Von de Ukraine hab wie bat dän 24. Jaunewoa 2023 de Zolen jekjräajen, waut unjen aunjejäft sent. Dee stetten sikj opp Berechten von Breeda, waut doa opp iernst wonen. Daut kunn oba doawäajen sennen, daut de Zolen hecha sent, wiels wie nich en aule Jäajenden em Launt met de Breeda räden kjennen.

• 47 Vekjindja sent jestorwen

• 97 Vekjindja worden velazt

• 8 953 Vekjindja haben must äare Hiesa veloten

• 590 Hiesa worden gaunz vestieet

• 645 Hiesa haben väl Schoden jekjräajen

• 1 722 Hiesa haben een bät Schoden jekjräajen

• 8 Vesaumlungshiesa worden gaunz vestieet

• 17 Vesaumlungshiesa haben väl Schoden jekjräajen

• 76 Vesaumlungshiesa haben een bät Schoden jekjräajen

• 26 Nootfaulkommitees sent en de Ukraine aunjestalt

• 46 Hiesa worden oppjefikst

• 5 Vesaumlungshiesa worden oppjefikst

• 54 445 Vekjindja kjrieejen Help von de Nootfaulkommitees, om Städen to finjen, waut sechra sent

• 27 655 Vekjindja sent no aundre Lenda jeflicht un kjrieen doa Help von äare Gloowesbreeda