Daut moakt ons truarich, daut twee von onse Sestren todood kjeemen, aus en Mariupol jebomt wort. Doa sent noch emma äwa 2 000 Breeda un Sestren en dise Staut, waut doa nich veloten kjennen, wiels doa soo oajch jekjamft woat. En de latste poa Doag kunnen rom 150 Zeijen flichten. Breeda von een Nootfaulkommitee, waut doa wullen Ätwoa un aundret hanfieren, musten trigjfoaren, aus no an un uk no aundre Helpa jeschoten wort. Eene Bomm troff opp dän Hoff von een Jebied met een Vesaumlungshus un Kongresshus. Krakjt dan wieren en dän Kjala von daut Vesaumlungshus ojjefäa 200 Breeda un Sestren, waut doa Schutz sochten. Kjeenem von dee es waut jeworden, oba wiels dee äare Foatieja dan gaunz kaputt wieren, es daut fa dee nu noch schwanda, ut dise Staut to flichten.

Een Eltesta (unjen opp daut Bilt to seenen), waut de Staut Mariupol met siene Famielje toop veloten kunn, vetalt: “Wie haben onse Woninj un onse Oabeit veloaren un kjennen nich mea met onse Frind räden. Onse Reis dieed sas Doag, wan dee unja jeweenelje Omstend uk bloos haud eenen Dach jedieet. Opp onsen Wajch [ut de Staut rut] sag wie oppe Gaussen Patroonen un Bommen, waut rieekjren deeden, wiels dee nich oppjedäwat wieren. Oppem gaunzen Wajch kjrieej wie emma wada Help von onse Breeda, om to Nacht to bliewen. Wie beläwen daut, woo Jehova sikj om ons kjemmat aus een Voda . . . Doawäajen well wie am gaunz un goa vetruen.”

Onse Breeda, waut jeflicht sent, haben en veschiedne Lenda en Europa Schutz jefungen. Een Deenstaumthelpa biejlikj, deed met siene Fru un siene dree Kjinja toop (7, 11 un 16 Joa oolt) no Portugal reisen, wua dee Frintschoft haben, waut uk Zeijen sent. Nodäm daut see musten 11 Stund aune Jrens luaren, reisd de Famielje 4 000 Kilomeeta (2 485 Miel), bat see bie äa Frintschoft aunkjeemen. Korz nodäm daut see doa aunkjeemen, funk doa daut Toopkomen aun. Wan dee uk nich Portugiesisch räden, haben see sikj doawäajen met de Breeda doa toopjekjnekjt. De Breeda doa en dee Vesaumlunk bewundaden de Famielje, wiels dee schaftich wia, wan dee uk schwoaret derchjegonen wieren.

Eene aundre Sesta es no Dietschlaunt jeflicht, un see sajcht: “De Bibel to läsen, daut goode to seenen un äwa onse wundascheene Hopninj notodenkjen jeft ons werkjlich väl Krauft un Moot. . . . Derch de Help von de Breeda kunn wie Jehova siene Haunt seenen. Dee haben ons soo sea en de Ukraine un Ungarn jeholpen un nu hia en Dietschlaunt!”

Daut es dietlich to seenen, woo Jehova de Breeda un Sestren en de Ukraine opprajcht helt (Psalm 145:14).

Bat dän 16. Moaz 2022 hab wie de Zolen, waut unjen aunjejäft sent, ut de Ukraine jekjräajen. Dee stetten sikj opp woarhauftje Berechten von Breeda, waut doa wonen. Daut kaun doawäajen sennen, daut de Zolen en Werkjlichkjeit hecha sent, wiels eena nich en aule Jäajenden em Launt met de Breeda räden kaun:

• 4 Vekjindja sent jestorwen

• 19 Vekjindja worden velazt

• 29 789 Vekjindja musten äare Hiesa veloten un sent no aundre Städen em Launt jeflicht, wua daut sechra es

• 45 Hiesa worden gaunz vestieet

• 84 Hiesa haben väl Schoden jekjräajen

• 366 Hiesa haben een bät Schoden jekjräajen

• 16 Vesaumlungshiesa haben Schoden jekjräajen

• 27 Nootfaulkommitees sent en de Ukraine aunjestalt

• 20 981 Vekjindja kjrieejen Help von de Nootfaulkommitees, om Städen to finjen, waut sechra sent

• 11 973 Vekjindja sent no aundre Lenda jeflicht un kjrieen doa Help von äare Gloowesbreeda