Wie bäden wieda fa onse Breeda un Sestren en Mariupol, wiels doa noch emma jekjamft un jebomt woat. Truarich es, daut doa aul sas Breeda un Sestren wäajen de Bommen todood jekomen sent. Aules toop haben bat nu tieen Breeda un Sestren en de Ukraine äa Läwen veloaren. Soo aus eena haft kunt en de Norechten hieren, wort daut Teauta en Mariupol uk vebomt. Doa hauden 1 000 Menschen Schutz jesocht. Kjeena von onse Breeda kjeem todood, oba een poa worden een bät velazt.

Rom 750 Breeda sent von Mariupol jeflicht, un ojjefäa 1 600 sent noch doa. Väle von dee sent em Wasten von de Staut, waut nu unja de rusche Kontroll es.

Soo aus wie aul ea en eenen Berecht schreewen, haben rom 200 Breeda un Sestren en eenen Kjala von een Vesaumlungshus un Kongresshus Schutz jesocht. Aus se fa een Stootje haben kunt met dee räden, säden de Breeda dit:

“Aus doa jebomt wort, hauden een schoof Breeda un Sestren sea Angst. Eenje fungen aun to roaren. Aus wie de Bommen buten hieeden oppdäwren, docht wie, wie wudden stoawen; entwäda von de Bommen ooda von daut Fia. Eena von de Eltestasch rod too, Kjennichrikjsleeda to sinjen. Dan sung wie aulatoop 10 bat 15 Leeda, eent no daut aundre. Je luda de Bommen wieren un je dolla daut Jebied schedren deed, je luda sung wie. Dan laus wie dän 27. Psalm un räden doaräwa. No daut haft jieda eena von sienen leefsten Varsch ut de Schreft vetalt un woo dee am jestoakjt haft. . . . Dan hab wie daut kunt erfoaren, daut Jehova ‘een Voda [es], dee sikj erboarmt, un een Gott, dee onen Enj treesten deit’. Hee kaun ons en de schwanste Loagen berujen” (2. Korinta 1:3-4).

De Eltestasch nämen väl opp sikj un sieekjen toop met de Breeda vom Nootfaulkommitee no äare Gloowesbreeda. Dee brinjen dee Ätwoa un Medizien, mau rajcht wan see sikj doaderch selfst en Jefoa brinjen. Wan dee no äare Gloowesbreeda sieekjen, motten dise Breeda bieaun oppe Ieed krupen, daut dee nich tosplät komen, wan doa jeschoten woat. Wie sent brow met onse Breeda, wiels dee “äa Läwen . . . opp Spell” saten fa äare Gloowesbreeda (Reema 16:4).

Wiels daut en de gaunze Staut nich Gauss jeft un uk nich elektrischet Fia, doonen äwanämende Sestren aulawäajen en de Staut buten oppem Fia Äten moaken. Daut woat dan de elre un behindade Vekjindja jebrocht. Väle von onse Breeda doa haben äa Hus, äare Koa un aundret tieteljet veloaren, oba dee sent dankboa fa de Leew, waut äare Gloowesbreeda an wiesen.

Aul dee, waut irjentwua en de Ukraine Schutz jesocht haben, bliewen em jeisteljen waka. Dee läsen toop de Bibel, un wan daut mäajlich es, vetalen dee aundre von äare Hopninj.

Bat dän 22. Moaz 2022 hab wie de Zolen, waut unjen aunjejäft sent, ut de Ukraine jekjräajen. Dee stetten sikj opp woarhauftje Berechten von Breeda, waut doa wonen. Daut kaun doawäajen sennen, daut de Zolen en Werkjlichkjeit hecha sent, wiels eena nich en aule Jäajenden em Launt met de Breeda räden kaun.

• 10 Vekjindja sent jestorwen

• 27 Vekjindja worden velazt

• 33 180 Vekjindja musten äare Hiesa veloten un sent no aundre Städen em Launt jeflicht, wua daut sechra es

• 78 Hiesa worden gaunz vestieet

• 102 Hiesa haben väl Schoden jekjräajen

• 484 Hiesa haben een bät Schoden jekjräajen

• 1 Vesaumlungshus wort gaunz vestieet

• 4 Vesaumlungshiesa haben väl Schoden jekjräajen

• 18 Vesaumlungshiesa haben een bät Schoden jekjräajen

• 27 Nootfaulkommitees sent en de Ukraine aunjestalt

• 25 069 Vekjindja kjrieejen Help von de Nootfaulkommitees, om Städen to finjen, waut sechra sent

• 14 308 Vekjindja sent no aundre Lenda jeflicht un kjrieen doa Help von äare Gloowesbreeda