Daut es sea schod, daut doa noch mea von onse Breeda un Sestren jestorwen sent, wäajens dän Kjrich en de Ukraine. Aules toop sent doa 28 von Jehova siene Zeijen jestorwen.

En de Norechten äwa de gaunze Welt weesen dee, daut daut en de ieeschte Wäakjen von dän Kjrich sea oajch wia doa en de Jäajent rom de Staut Kiew. Doa wonen rom 4 900 Vekjindja un äwa 3 500 von dee haben sikj aul no sechre Städen jebrocht.

De Berechten, waut wie nu seenen woaren, wiesen, daut onse Breeda von dee Omjäajent wieda eenen stoakjen Gloowen aun Jehova haben, wan dee uk grulich sea väl schwoaret beläwen.

Oleksandr, een Eltesta von de Staut Makariw, veleet von doa un brocht sikj en Sechaheit enne Medd-Ukraine. Oba hee muak sikj groote Sorjen, wäajen hee nuscht kunn rutfinjen äwa vea Vekjindja von siene Deenstgrupp. Doawäajen wort hee sikj eenich, trigjtogonen no dee to sieekjen, wan en dee Jäajent uk noch emma groota Kjrich wia. Hee vetald: “Ekj weet, daut Jehova siene Deena sea väl räakjent. . . . Aus ekj oppem Hoff von eent von de Vekjindja kjeem, kunn ekj seenen, daut doa wieren Bommen oppjedäwat. De Däa von dän Kjala von daut Hus wia toojeschloten un doa säd kjeena waut, aus ekj roopen deed. Ekj haud sea Angst.” Oleksandr bruak de Däa to dän Kjala op un hee sach doa eene Grupp Menschen un dee kjikjten no am. Hee haud de Vekjindja jefungen un doa wieren uk waut von äare Nobasch, waut nich Jehova siene Zeijen wieren, waut sikj doa hauden en Schutz jebrocht.

Yaroslav, eent von dise Vekjindja säd, daut see doa aul acht Doag en dän Kjala vestoaken wieren. Hee säd: “Jieda eena kunn bloos een poa Kuakjes dän Dach oppäten un een Glauss Wota utdrinkjen. Oba wie deeden enne Bibel läsen un uk en onse Bieekja. Wie deeden uk bäden un ons unjarenaunda Moot toospräakjen. Aus ekj hieed, daut Oleksandr mienen Nomen roopt, docht ekj, daut wieren Soldoten un daut dee mie faustnämen wullen. Ekj docht, nu wudd ekj motten stoawen. . . . Oba hee kjeem ons raden. Wie sent Jehova soo dankboa, daut hee ons haft Breeda un Sestren jejäft, waut ons leewen, waut fa ons bäden un waut soogoa äa Läwen opp Spell saten toom ons raden.”

Pylyp un een aundra Brooda worden sikj eenich, deejanje Äten to brinjen, waut doa en de Staut Borodjanka wieren. Aun dän 17. Moaz, aus see dan oppem Wajch wieren, neemen Soldoten äa Foatich wajch un uk daut Äten. Dee neemen an dan faust, bungen an de Uagen too un deeden an de Henj toopschluten. Un dan brochten see an no eene kjliene Stow en eenen Kjala, wua noch säwen aundre Mana bennen wieren. Twee Doag lota brochten see an no eene aundre Stow un dan vekjielden see an doa de Nacht. Pylyp säd: “Ekj wist nich, aus ekj dit äwaläwen wudd. Oba ekj bäd sea, daut ekj wudd kjennen tru bliewen.”

Eemol, aus see am doa soo vekjielden, bäd Pylyp opp ludes fa de elre Sestren, waut doa onen Äten jebläwen wieren, un daut siene Famielje en Sechaheit kunn sennen. Hee dankt Jehova uk doafäa, daut hee am aul dise Joaren haud kunt met Freiden deenen. Dan brocht de Woaka am wada trigj no de Stow un doa bäd hee wieda, daut de Soldoten vestonen sullen, daut de Breeda nich eene Jefoa fa an wieren. Beid Breeda fungen dan aun, de Woaka to prädjen. Fa twee Doag deeden see to aul de Woaka prädjen, waut doa oppausten. Eent von de Mana, waut doa uk faustjenomen wia, funk sikj aun, fa de Bibel to intressieren. Hee bedankt sikj bie de Breeda. Dän 27. Moaz worden dan de Breeda un uk de Maun, waut sikj fa de Bibel intressieed, friejeloten.

Svitlana, eene onbefriede Sesta von de Staut Butscha, kunn fa twee Wäakj nich von doa veloten, wäajen doa dan jroz Kjrich wia. See säd: “Ekj hab daut noch kjeenmol ea kunt soo sea vestonen, woo wichtich de Fräd es, waut Jehova eenem jeft. Wan wie uk dän Fräd haben von Gott, weet wie doawäajen nich emma krakjt, waut wie doonen sellen. Oba wan wie uk kjeene Däa seenen, ut onsen Trubbel ruttokomen, dan velot wie ons gaunz opp Jehova.”

Aus Svitlana dan flichten deed no eene sechre Städ en de Ukraine, deed see eene Fru prädjen un uk een Junkje von de Fru äa Jeschwista. Aus see dan bie de sechre Städ aunkjeemen, worden see von eene Famielje von Jehova siene Zeijen oppjenomen. Svitlana un de Fru un daut Junkje kunnen dan de Nacht doa bie dise Famielje bliewen. Dän näakjsten Dach fruach de Fru, aus see kunn no de Toopkomes komen, un see fruach uk no eene Bibel un no Bieekja. Svitlana un dise Fru vetalen wieda unjarenaunda.

Bat dän 12.  Aprell 2022 hab wie de Zolen, waut unjen aunjejäft sent, ut de Ukraine jekjräajen. Dee stetten sikj opp woarhauftje Berechten von Breeda, waut doa wonen. Daut kaun doawäajen sennen, daut de Zolen en Werkjlichkjeit hecha sent, wiels eena nich en aule Jäajenden em Launt met de Breeda räden kaun.

• 28 Vekjindja sent jestorwen

• 48 Vekjindja worden velazt

• 40 778 Vekjindja musten äare Hiesa veloten un sent no aundre Städen em Launt jeflicht, wua daut sechra es

• 278 Hiesa worden gaunz vestieet

• 268 Hiesa haben väl Schoden jekjräajen

• 746 Hiesa haben een bät Schoden jekjräajen

• 1 Vesaumlungshus wort gaunz vestieet

• 9 Vesaumlungshiesa haben väl Schoden jekjräajen

• 26 Vesaumlungshiesa haben een bät Schoden jekjräajen

• 27 Nootfaulkommitees sent en de Ukraine aunjestalt

• 41 974 Vekjindja kjrieejen Help von de Nootfaulkommitees, om Städen to finjen, waut sechra sent

• 18 097 Vekjindja sent no aundre Lenda jeflicht un kjrieen doa Help von äare Gloowesbreeda