Wie sent froo, daut Jehova de Breeda un Sestren en de Ukraine jesäajent haft, soo daut dee en daut gaunze Launt kunnen daut Owentmol fieren toom aun Jesus sienen Doot denkjen. En miere Vesaumlungshiesa em Wasten von de Ukraine wieren Breeda un Sestren bie daut Owentmol, waut ea hauden must äa Tus veloten. De mieeschte Breeda hauden daut Owentmol en kjliene Gruppen. Un dee, waut doa musten tus bliewen, kunnen sikj met de aundre äwa Internet toopknekjen fa daut Owentmol.

Dän Dach von daut Owentmol wort meist aulawäajen en de Ukraine met een Jelud fa Bommen jewoarnt. Oba dan, aus daut zeowes wort, hieeden de Woarnungen opp. Sherhiy von de Staut Druschkiwka en de Donezk-Jäajent sajcht: “Wie hauden jebät, daut wie wudden kjennen daut Owentmol fieren, un daut doa wudd nuscht mankkomen wäajen de Bommen. Een Stootskje ea daut Owentmol aunfunk, hieed daut Jedäwa von de Bommen opp, un doa wia uk nich mea daut Jelud von de Woarnungen to hieren.”

En de Staut Nemischajewe, dicht bie Kiew, wia eene Grupp elre un kranke Breeda un Sestren, waut aul äwa eene Moonat nich hauden kunt bie een Toopkomen sennen. Dee hauden jebät, daut dee wudden kjennen bie daut Owentmol sennen. Een Eltesta, waut Vitaliy heet, holp dise Breeda, soo daut dee kunnen daut Owentmol haben. Hee säd: “Wie hauden nich ellektrischet Fia, soo wie fieeden daut Owentmol bloos met een Fleschlicht. Doa wia uk kjeene Hettinj. Un wiels wie nich Musikj hauden, späld miene Dochta de Fiddel, soo daut wie leichta kunnen de Leeda sinjen.”

Oleksandr es een Eltesta, waut en de Jäajent wont, wua Kjrich es. Hee säd: “Toom aundre fa daut Owentmol enloden, kunn wie nich Breew schriewen no de Menschen von onse Jäajent, wäajen de Hiesa wieren vebomt un ladich. Soo wie deeden Bekaunde enloden, un Menschen, waut sikj met ons toop hauden en Kjalasch vestoaken, un uk dee, waut met ons toop en Sechaheit jebrocht worden. Väle von dee, waut wie doa haben kjanen jelieet, hauden Jehova siene Zeijen kjeenmol ea toojehorcht. Oba väle von dee wieren met ons toop bie daut Owentmol.”

Bat nu hab wie noch nich aul de Zolen von aul de Vesaumlungen von de Ukraine. Oba wie weeten, daut doa äwa 210 000 Menschen bie daut Owentmol wieren.

Een Brooda en de Ukraine säd, woo hee sikj feeld äwa daut Owentmol. Hee säd: “Krakjt soo aus en Lichttorm biem Mäa de Scheppmana wiesen deit, daut de Kaunt Mäa dicht bie es, soo haft daut Owentmol mie jewäsen, daut Jehova sien Dach gaunz dicht bie es. Daut Owentmol dit Joa haft mienen Gloowen noch stoakja jemoakt.”

Bat dän 21. Aprell 2022 hab wie de Zolen, waut unjen aunjejäft sent, ut de Ukraine jekjräajen. Dee stetten sikj opp woarhauftje Berechten von Breeda, waut doa wonen. Daut kaun doawäajen sennen, daut de Zolen en Werkjlichkjeit hecha sent, wiels eena nich en aule Jäajenden em Launt met de Breeda räden kaun.

• 35 Vekjindja sent jestorwen

• 60 Vekjindja worden velazt

• 43 792 Vekjindja musten äare Hiesa veloten un sent no aundre Städen em Launt jeflicht, wua daut sechra es

• 374 Hiesa worden gaunz vestieet

• 347 Hiesa haben väl Schoden jekjräajen

• 874 Hiesa haben een bät Schoden jekjräajen

• 1 Vesaumlungshus wort gaunz vestieet

• 10 Vesaumlungshiesa haben väl Schoden jekjräajen

• 27 Vesaumlungshiesa haben een bät Schoden jekjräajen

• 27 Nootfaulkommitees sent en de Ukraine aunjestalt

• 44 971 Vekjindja kjrieejen Help von de Nootfaulkommitees, om Städen to finjen, waut sechra sent

• 19 961 Vekjindja sent no aundre Lenda jeflicht un kjrieen doa Help von äare Gloowesbreeda