De Trubbels enne Ukraine gonen wieda. Oba daut Betel von doa sorcht doafäa, daut en daut gaunze Launt mea Hoadbesuchs jemoakt woaren. Dee schaufen sea doaropp, daut de dusende Breeda, waut äa Tus veloten musten, Moot kjrieen. Dise Hoadbesuchs halpen de Breeda un Sestren sea. Een Brooda vom Betelkommitee besocht Breeda un Sestren em Wasten von de Ukraine. Waut deed daut aun dee? Eene Sesta, waut nu jroz met 30 aundre en een Vesaumlungshus en de Staut Uschgorod blift, säd: “Fa mie wia daut soo, aus wan Jehova mie en siene Oarms neem un mie ompaken deed.”

De Breeda strenjen sikj uk sea aun, de äwanämende Breeda (rom 100) Moot tootospräakjen, waut en de 27 Nootfaulkommitees schaufen. Een Brooda, waut Ihor heet un en een Nootfaulkommitee schauft, sajcht: “Aus ekj de Oppgow kjrieech toom en een Nootfaulkommitee schaufen, hauden ekj un miene Fru aul must von ons Tus veloten un wie wieren aul en een aundret Hus. Een Brooda vom Betelkommitee, waut selfst sea drock es, neem sikj Tiet toom ons besieekjen un toom ons toohorchen, aus wie jroz sea mootloos wieren. Wie kunnen seenen, daut hee sea om ons bekjemmat wia.” Ihor sajcht wieda: “Daut jeft Loagen, wua wie ons soo feelen aus Kjinja, un wie haben kjeene Kontroll doaräwa, waut passieet, un haben uk kjeene Leesunk doafäa. Daut eensje, waut wie doonen kjennen, es to Jehova bäden, daut hee ons halpen woat. Un wie kjennen foaken seenen, woo hee ons biesteit.”

Woo steit daut met de Vesaumlungshiesa von dee Städen, wua groota Kjrich es? Bat nu sent 4 Vesaumlungshiesa gaunz vestieet, 8 haben väl Schoden jekjräajen un 33 haben een bät Schoden jekjräajen.

Bat dän 17. Mei 2022 hab wie de Zolen, waut unjen aunjejäft sent, ut de Ukraine jekjräajen. Dee stetten sikj opp woarhauftje Berechten von Breeda, waut doa wonen. Daut kaun doawäajen sennen, daut de Zolen en Werkjlichkjeit hecha sent, wiels eena nich en aule Jäajenden em Launt met de Breeda räden kaun.

• 37 Vekjindja sent jestorwen

• 74 Vekjindja worden velazt

• 45 253 Vekjindja musten äare Hiesa veloten un sent no aundre Städen em Launt jeflicht, wua daut sechra es

• 418 Hiesa worden gaunz vestieet

• 466 Hiesa haben väl Schoden jekjräajen

• 1 213 Hiesa haben een bät Schoden jekjräajen

• 4 Vesaumlungshiesa worden gaunz vestieet

• 8 Vesaumlungshiesa haben väl Schoden jekjräajen

• 33 Vesaumlungshiesa haben een bät Schoden jekjräajen

• 27 Nootfaulkommitees sent en de Ukraine aunjestalt

• 48 806 Vekjindja kjrieejen Help von de Nootfaulkommitees, om Städen to finjen, waut sechra sent

• 21 786 Vekjindja sent no aundre Lenda jeflicht un kjrieen doa Help von äare Gloowesbreeda