Mukanda wa Thomo Gudi Enya gu Kolinto 1:1-31
-
Phaula udi mutumina aphangi a gu Kolinto moyo (1-3)
-
Phaula udi muhana Nzambi mersi mukunda nu enya gu Kolinto (4-9)
-
Phaula udi muwambela Aklisto a gu Kolinto ha gukhala nu gudivua guabonga mukatshi diawo (10-17)
-
Klisto udi ngolo nu ndunge jia Nzambi (18-25)
-
Disunzulenu phamba mukunda nu Yehowa (26-31)
1 Ame Phaula, ngatamegewe ha gukhala mupostolo wa Klisto Yesu mu gutshigina gua Nzambi. Ngudi nu phangi’etu Sosetene.
2 Tudi musonegela hungu dia Nzambi didi gu Kolinto, nu athu agasue adi mu mafundo agudisha, ana gusha gutshigina* mu jina dia Fumi’etu Yesu Klisto. Muene udi Fumu wawo, udi nji Fumi’etu. Nzambi wamikhaphumuine nu athu a ha mavu awa hagula mukhale mu gudivua nu Klisto Yesu. Wamitamegele nji ha gubua athu a gijila.
3 Nzambi Tata wetu nu Fumu Yesu Klisto, amivile khenda jiavula, amihane nji guhuima.
4 Ngana hana Nzambi wami mersi tangua diagasue mukunda nu enue luholo amividile khenda jiavula mu njila ya Klisto Yesu.
5 Handaga luholo mudi mu gudivua nu Klisto Yesu, Nzambi wamihuile umonyi mu ndaga jiagasue, wamihanele nji ndunge jiavula jia guzuela nu ujiyi wavula.
6 Handaga tangua amilongesele ndaga jiatadila Klisto, muajitshiginyile nu mutshima umoshi.
7 Ngenyi mudi nu ima yagasue mudi nayo funu hamudi munenga nu mitshima zagu-zagu, tangua Fumi’etu Yesu Klisto mbawumonesa ngolo jienji.
8 Nzambi mbawumihana nji ngolo uu nu gu gisugishilo, hagula nga muthu mumoshi ahetshigo ndaga ya gumifundjila mu lusugu lua Fumi’etu Yesu Klisto.
9 Nzambi yago wamitamegele ha gukhala mu gudivua guabonga nu Mun’enji Yesu Klisto Fumi’etu, udi Nzambi wa gujinginyina.
10 Aphangi, ngudi gumibubila mu jina dia Fumi’etu Yesu Klisto egi mukut’enu agasue khalenu nu gudivua guabonga mu ndaga mudi muzuela. Mukhadigo nu ukhaphumunyi mukatshi dienu. Uvi khalenu matangi amoshi.
11 Handaga athu ako a gumbo dia Klowe, anguwambela egi mushigo nu gudivua guabonga mukatshi dienu.
12 Ngudi muzuela ngenyi handaga athu ako mukatshi dienu adi muzuela egi: “Ame ngudi muthu wa Phaula.” Ako egi “Ame ngudi muthu wa Apholo.” Ako adi muzuela egi “Ame ngudi muthu wa Sefase.”* Uvi ako luko egi “Ame ngudi muthu wa Klisto.”
13 Klisto udi wa gudikhaphumuna ba? Phaula washiyiwe ha mutshi mukunda nu enue ba? Nga ndo, muabatijiwe mu jina dia Phaula ba?
14 Ngudi muhana Nzambi mersi handaga ngabatijilego nga muthu mumoshi mukatshi dienu, phamba Kilisiphe nu Gayuse.
15 Ngenyi gushigo nga muthu mumoshi wajiya guzuela egi muabatijiwe mu jina diami.
16 Ayi, ngabatijile nji Stefanase nu athu a monzo yenji. Uvi athu ako anyi asala ngushigo mujiya gula ngabatijile nji muthu muko.
17 Handaga Klisto gangutuminego ha gubatiza, uvi wangutumine ha gulongesa lukuma luabonga. Muene gangutuminego ha gulongesa lukuma luene nu ndunge jia athu.* Ngenyi athu ajiyilego gusegulula mutshi wa lamba* wa Klisto.
18 Handaga longo diatadila mutshi wa lamba* didi guheya mukunda nu athu anyi mbaashiyiwa. Uvi esue tudi muhuluishiwa, longo diene didi mumonesa ngolo jia Nzambi.
19 Handaga yasonegewe egi: “Mbangutotesa ndunge jia enya ndunge, mbangubishila nji gutema gua athu atema.”
20 Muenya ndunge udi gui? Mulongeshi wa mikhuala* udi gui? Muthu wana gusha giphapha ha mavu awa* udi gui? Nzambi gabuishilego ndunge jia ha mavu awa guheya ba?
21 Athu a ha mavu awa anago gujiya Nzambi handaga ana gusha mutshima mu ndunge jiawo. Athu ako ana mona ndaga tuana longesa gifua jidi guheya. Uvi Nzambi mu ndunge jienji, wana kalegela ndaga jiene jia guheya tudi mulongesa ha guhuluisa athu adi musha gutshigina.
22 Enya Yuda adi mutoga ijiyishilo, enya Greke adi mukamba ndunge.
23 Uvi esue tudi mulongesa egi Klisto washiyiwe ha mutshi. Enya Yuda adi mumona ndaga jiene tudi mulongesa gifua gima gidi mukhakhuisa. Uvi athu a ifutshi iko adi gujimona gifua guheya.
24 Uvi mukunda nu athu anyi atamegewe, ikhale enya Yuda nga enya Greke, Klisto udi ngolo jia Nzambi nu udi ndunge jia Nzambi.
25 Ndaga jiana katuga gudi Nzambi jinyi athu ana gumona gifua jidi guheya, jidi jiatema gubalega athu. Luko ndaga jiana katuga gudi Nzambi jinyi athu ana gumona gifua jidi jialeba, jidi nu ngolo jiavula gubalega athu.
26 Aphangi, mudi mujiya egi tangua diamitamegele Nzambi guakhalelego athu avula mukatshi dienu akhalele atema,* guakhalelego nji athu avula akhalele enya ngolo nga athu avula avualewe mu fami jia lukuma.*
27 Uvi Nzambi watombele ima athu a ha mavu awa ana mona egi yaheya, ha gukuatesa enya ndunge musonyi. Nzambi watombele nji ima athu a ha mavu awa ana mona egi idi ya guleba, ha gukuatesa enya ngolo musonyi.
28 Nzambi watombele ima inyi athu ana mona egi ishigo nu ndando, nu ima inyi athu ana segulula nu ima inyi athu ana gumona gifua idi ya githuhu, ha gubolesa ima yana gutangiza ene gifua idi nu ndando.
29 Ngenyi muthu* gajiyilego gudihala gu meso a Nzambi.
30 Uvi Nzambi wamikuatesele ha gukhala mu gudivua guabonga nu Klisto Yesu. Yesu watumonesele ndunge jia Nzambi, wamonesele nji luholo athu ajiya gubua athu abonga gu meso a Nzambi. Ngenyi mu njila ya Yesu athu ajiya gubua agijila, nu mu njila ya gibawu ajiya gukatudiwa mu uhiga wa gubola,
31 hagula ikhale gifua luholo yasonegewe egi: “Muthu udi gudisunzula, adisunzule mukunda nu Yehowa.”
Mbimbi goshi'a diyiji
^ Mu Greke: “ana gutamega.”
^ Wana tamegewa nji egi Phetelo.
^ Nga “nu mbimbi jia gutema.”
^ Tala Ukoteleshi wa Mbimbi.
^ Tala Ukoteleshi wa Mbimbi.
^ Yakotelesa egi, “muthu wajiya mikhuala muabonga.”
^ Nga “gindongo egi.” Tala Ukoteleshi wa Mbimbi.
^ Mu Greke: “atema gu meso a athu.”
^ Nga “mu fami jia manene.”
^ Mu Greke: “muila.”
