Mukanda wa Thomo Gudi Enya gu Kolinto 11:1-34
11 Landulenu gifezegeselo giami, gifua luholo ame nji ngana landula gifezegeselo gia Klisto.
2 Aphangi, ngudi gumishimana handaga muana gungutangiza mu ndaga jiagasue, nu mudi mutumagela muabonga diago ndaga jiagasue gifua luholo ngamilongesele najio.
3 Uvi ngudi mutshigina mujiye egi fumu wa yala wagasue udi Klisto. Fumu wa mukhetu udi yala. Fumu wa Klisto udi Nzambi.
4 Yala wagasue udi mukombelela nga udi mulongesa mbimbi ya Nzambi muto wagutshuiga, udi muhana fumi’enji musonyi.
5 Uvi mukhetu wagasue udi mukombelela nga udi mulongesa mbimbi ya Nzambi uvi muto wenji ushigo wagutshuiga, udi muhana fumi’enji musonyi; handaga muene udi gifua mukhetu udi wagukulula sanga gu muto.
6 Gula mukhetu gatshuigilego muto wenji, udi naye gubunga sanga dienji. Uvi gula wamona egi idi ndaga ya musonyi ha gubunga nga gukulula sanga dienji, udi naye gutshuiga muto wenji.
7 Yala gashigo naye gutshuiga muto wenji handaga muene udi gifuanesa nu lutumbu lua Nzambi. Uvi mukhetu udi lutumbu lua yala.
8 Handaga yala gazogelego gudi mukhetu, uvi mukhetu wazogele gudi yala.
9 Luko, Nzambi gafugilego yala mukunda nu mukhetu, uvi wafugile mukhetu mukunda nu yala.
10 Gishina giene mukunda nu anjelo, mukhetu udi naye gutshuiga muto wenji ha gunemesa ufumu wa yala.
11 Uvi mukatshi dia alandudi a Fumu, mukhetu gashigo wagudikhaphumuna nu yala; yala nji gashigo wagudikhaphumuna nu mukhetu.
12 Handaga mukhetu wakatugile gudi yala, yala nji wakatugile gudi mukhetu. Uvi ima yagasue yakatugile gudi Nzambi.
13 Enue hakhenu zuelenu: Idi ndaga yabonga egi mukhetu akombelele Nzambi uvi muto wenji ushigo wagutshuiga ba?
14 Luholo Nzambi wafugile athu lushigo gumimonesa egi gula yala udi nu sanga dialeha, idi ndaga ya musonyi mukunda nu muene ba?
15 Uvi gula mukhetu udi nu sanga dialeha, idi lutumbu mukunda nu muene ba? Yadiago, Nzambi wamuhanele sanga mukunda nu gutshuiga muto wenji.
16 Uvi gula muthu udi mutshigina gusha giphapha mukunda nu ndaga eyi, ajiye egi nga esue nga mahungu a Nzambi, tushigo nu luholo luko lua gutshita ndaga.
17 Tangua ngudi gumiwambela ndaga eji, ngushigo gumishimana handaga tangua muana gudibungisa, muanago gudibungisa ha gulondega ndaga uvi muana gudibungisa ha gubolesa ndaga.
18 Thomo ngudi muvua egi tangua muana gudibungisa mu hungu, mudi nu gudikhaphumuna mukatshi dienu; ngatshigina hazonda egi ndaga yene idi ya giamatshidia.
19 Yadiago, gudikhaphumuna mbagukhala nji mukatshi dienu hagula enya gutshigina a giamatshidia amonege haphelo.
20 Tangua muana gudibungisa mukunda nu gudia Gudia gua Fumu gua mu Ngueze, muanago guyikalagala mu luholo luabonga.
21 Handaga gula tangua diatagana hagula mudie Gudia gua Fumu gua mu Ngueze, athu ako ana gudia thomo gumbo diawo. Ngenyi muthu muko udi nu nzala, uvi muko udi wagukuatewa matombe.
22 Enue mushigo nu jinzo ha gudia nu gunua ba? Mudi musegulula hungu dia Nzambi, mudi muhana nji musonyi gudi athu ashigo nu gima ba? Itshi mudi mutshigina egi ngumiwambele? Ngudi naye gumishimana ba? Ndo, ngushigo gumishimana.
23 Ame ngamilongesele ndaga ngavuile gudi Fumu. Ngamilezele egi mu phipha gutuama egi Fumu Yesu akuatewe nu amonesewe lamba, wazanguile dipha,
24 wahanele Nzambi mersi. Gungima wabatuile dipha diene, wazuelele egi: “Dipha edi didi mumonesa muila wami ngudi muhana mukunda nu enue. Landulenu gukalagala ngenyi ha gunguwunguluga.”*
25 Hamanesele ene gudia, wakalegele nji luholo lumoshi nu khopho. Wazuelele egi: “Khopho edi didi mumonesa gikotelo gihe-gihe giakotewa mu njila ya mahatshi ami. Tangua diagasue mudi munua khopho edi, landulenu gutshita ngenyi ha gunguwunguluga.”*
26 Tangua diagasue mudi mudia dipha edi nu mudi munua khopho edi, landulenu gulongesa gufua gua Fumu uu nu tangua mbadiza muene.
27 Hene muthu wagasue udi mudia dipha nu udi munua khopho dia Fumu mu luholo luabola, udi mutshita gubola mukunda nu muila nu mahatshi a Fumu.
28 Muthu wagasue udi naye thomo gutangiza muabonga diago ha gujiya gula ndaga idi mutshita muene idi yawaha. Gungima, wajiya giwa gudia dipha nu gunua khopho.
29 Handaga muthu wagasue udi mudia nu udi munua, uvi gashigo mukotelesa egi ima idi mudia nu idi munua muene, idi mumonesa muila wa Fumu, muene hakhenji udi gudifuisa milonga.
30 Gishina giene athu avula mukatshi dienu adi aguleba, ako adi nu misongo, uvi ako avula afuile gale.*
31 Uvi gula nga tuadiangele guditadila muabonga ha gujiya gula tudi athu a luholo lutshi, nga atusopheselego.
32 Uvi gula atusophesa, idi mumonesa egi Yehowa udi gutuhana ndola hagula tufuishiwago milonga hamoshi nu athu a ha mavu awa.
33 Hene an’etu, tangua mudi gudibungisa ha gudia, dinengenu.
34 Gula muthu udi nu nzala, adie gumbo dienji hagula musophesewago tangua mudi gudibungisa. Uvi milonga iko yinyi yasala, mbanguyitadila tangua mbanguza.
Mbimbi goshi'a diyiji
^ Nga “kunguyabuluka.”
^ Nga “kunguyabuluka.”
^ Yajiya gukhala egi gufua gua mu nyuma.
