Mukanda wa Thomo Gudi Enya gu Kolinto 12:1-31
12 Aphangi, ngudi mutshigina egi mukotelese muabonga ndaga yatadila guhana gua Nzambi.
2 Mudi mujiya egi tangua muakhalele athu a ifutshi,* akhalele gumihuiga nu gumishinjiga ha gukombelela isongo yanago guzuela. Muakhalele nji muya fundo diagasue akhalele gumituameza.
3 Henyaha ngudi mutshigina mujiye egi gushigo nga muthu mumoshi wajiya “guta Yesu mukumbu” gula udi muzuela mu ngolo jia nyuma ya Nzambi. Muthu gajiyilego nji guzuela egi: “Yesu udi Fumu!” gula gashigo mutuamezewa gudi nyuma ya Nzambi.
4 Guhana gua Nzambi guakhala mu maluholo agudisha, uvi nyuma idi phamba imoshi.
5 Midimo ya gutshita ha gukuatesa athu ako idi ya luholo nu luholo, uvi Fumu udi phamba mumoshi.
6 Midimo idi ya luholo nu luholo, uvi Nzambi udi phamba mumoshi; wana guyitshita yagasue gudi muthu wagasue.
7 Uvi nyuma yana monega gudi muthu wagasue mukunda nu gubonga gua athu agasue.
8 Handaga nyuma yene ya Nzambi yana kuatesa athu ako ha guzuela nu* ndunge, yana kuatesa athu ako ha guzuela nu ujiyi wagasue,
9 yana kuatesa athu ako ha gukhala nu gutshigina, yana kuatesa athu ako ha guheta ngolo jia gusaga athu,
10 yana kuatesa athu ako ha gutshita ndaga jia gushimana, yana kuatesa athu ako ha gulongesa mbimbi ya Nzambi, yana kuatesa athu ako ha gukotelesa mbimbi jiasonegewe mu ngolo jia Nzambi, yana kuatesa athu ako ha guzuela mazuelelo avula, yana kuatesa athu ako nji ha gubalumuna mu mazuelelo a luholo nu luholo.
11 Nyuma yene imoshi yene yana gutshita midimo eyi yagasue. Yana guhana muthu nu muthu gifua luholo yatshigina.
12 Muila udi umoshi, uvi wakhala nu itshinyi yavula. Ikhale itshinyi yene yagasue idi yavula, uvi yana gudibungisa ha gubua muila umoshi. Klisto nji udi ngenyi.
13 Ikhale tudi enya Yuda nga enya Greke nga ahiga, nga athu ashigo ahiga, mukut’etu agasue tuabatijiwe mu nyuma imoshi nu mu muila umoshi. Mukut’etu agasue nji tuahetele* nyuma imoshi.
14 Yadiago, muila wakhalago nu gitshinyi gimoshi, uvi wakhala nu itshinyi yavula.
15 Gula kulu diazuela egi, “Ame ngushigo koko, ngushigo gami gitshinyi gia muila,” idi mukotelesa egi diene dishigo gitshinyi gia muila ba?
16 Gula kutshui diazuela egi, “Ame ngushigo diso, ngushigo gami gitshinyi gia muila,” idi mukotelesa egi diene dishigo gitshinyi gia muila ba?
17 Gula nga muila wagasue wakhala diso, nga kutshui diakhala gui? Gula nga muila wagasue wakhala kutshui, nga muzulu wakhala gui?
18 Uvi Nzambi wahagele gitshinyi giagasue gia muila ha fundo dienji gifua luholo luatshiginyile muene.
19 Gula nga itshinyi yagasue yakhala gima gimoshi, nga muila wakhala gui?
20 Yadiago, itshinyi ya muila yakhala yavula, uvi muila udi umoshi.
21 Diso diajiyilego guwambela koko egi, “Ngushigo nu funu yaye.” Muto nji wajiyilego guwambela malu egi, “Ngushigo nu funu yenu.”
22 Itshinyi ya muila yinyi yana monega gifua yakhalago nu funu yavula, yakhala nu ndando.
23 Itshinyi ya muila yinyi tuana mona egi ishigo nu ndando yavula, tuana guyinemesa muavula gubalega. Itshinyi yetu ya muila yinyi tuana mona egi ishigo yabonga gu meso, tuana guyisuega.
24 Itshinyi yetu ya muila yinyi tuana mona egi idi yabonga gu meso, tuanago guyisuega. Uvi Nzambi wafugile muila ngenyi; wahanele itshinyi ya muila yinyi yana monega gifua ishigo nu ndando yavula lutumbu luavula gubalega,
25 hagula egi ukhaphumunyi ukhadigo mu muila, uvi itshinyi yagasue ya muila idikuatese.
26 Gula gitshinyi gimoshi gia muila gidi mukata, itshinyi iko yagasue yana guvua nji lamba. Gula gitshinyi gimoshi gia muila gidi mutumbuishiwa, itshinyi iko yagasue yana suanguluga hamoshi nagio.
27 Enue mudi muila wa Klisto. Muthu wagasue mukatshi dienu udi gitshinyi gia muila wene.
28 Nzambi wahanele athu inemo ya gudisha mu hungu. Thomo apostolo, ya mbadi profete, ya thathu alongeshi; gungima athu adi mutshita ndaga jia gushimana, athu ahetele ngolo jia gusaga enya misongo, athu adi mukuatesa athu ako, athu adi mutuameza, nu athu adi muzuela mu mazuelelo agudisha.
29 Athu agasue adi apostolo ba? Athu agasue adi baprofete ba? Athu agasue adi alongeshi ba? Athu agasue ana kalagala ndaga jia gushimana ba?
30 Athu agasue ahetele ngolo jia gusaga enya misongo ba? Athu agasue ana zuela mu mazuelelo agudisha ba? Athu agasue ana balumuna* ba?
31 Khalenu mutshita ngolo ha gukamba* guhana gua Nzambi guabalega gukoma. Uvi ame mbangumidijiga njila yabalega njila jiagasue.
Mbimbi goshi'a diyiji
^ Yakotelesa egi athu anyi anago gukombelela Nzambi wa giamatshidia.
^ Nga “guzuela mbimbi jia.”
^ Nga “tuanuile.”
^ Yakotelesa egi athu adi mubalumuna mu mazuelelo angane.
^ Nga “landulenu gukamba nu gikhesa giagasue.”
