Mukanda wa Thomo Gudi Enya gu Kolinto 14:1-40
14 Khalenu gudizumba. Tshitenu ngolo ha gukamba* guhana gua nyuma ya Nzambi. Uvi kambenu muavula luendu lua gulongesa mbimbi ya Nzambi.
2 Gushigo nga muthu wana guvua ima idi muzuela muthu wahetele ngolo jia Nzambi jia guzuela mu mazuelelo ako, phamba Nzambi wana gumuvua. Ikhale muene udi muzuela ndaga jia isuegi ya gijila mu njila ya nyuma ya Nzambi, gushigo nga nu muthu wana guvua ndaga jidi muzuela muene.
3 Uvi muthu udi mulongesa mbimbi ya Nzambi wana kolesa* athu ako, wana guakuatesa nu wana guahana ngolo mu mbimbi jienji.
4 Muthu udi muzuela mu mazuelelo angane udi gudikolesa muene hakhenji. Uvi muthu udi mulongesa, udi mukolesa aphangi mu hungu.
5 Ngudi mutshigina egi mukut’enu agasue muzuele mu mazuelelo angane. Uvi ngudi mutshigina muavula egi mulongese mbimbi ya Nzambi. Yadiago, muthu udi mulongesa mbimbi ya Nzambi wabalega muthu udi muzuela mu mazuelelo angane, handaga gula ndaga jidi muzuela muthu mu mazuelelo angane jiabalumuiwego, aphangi mu hungu ajiyilego guheta ukuateshi.
6 Aphangi, uvi henyaha gula ngaza gumitala, ngudi muzuela n’enu mu mazuelelo angane, luholo lutshi ngajiya gumikuatesa? Hene gula ngatshigina gumikuatesa, ngudi naye gumiwambela ndaga jiakatuga gudi Nzambi, nu ujiyi, nu mbimbi nu malongo ngahetele gudi muene.
7 Idi nji luholo lumoshi nu ima ya guyimbila gifua phungi nga gitare.* Gula ishigo mudila mu dijui diakola, luholo lutshi athu ajiya gukotelesa ima idi mushigiwa?
8 Gula phungi idi mudila nu dijui dila jiajiajia, nanyi wajiya gudilonda ha guya mulua ita?
9 Luholo lumoshi nji, gula mudi muzuela nu mbimbi jishigo jialeba ha gukotelesa, luholo lutshi athu ajiya gukotelesa ndaga mudi muzuela? Idi gifua mudi mulaba guzuela mu muhehe.
10 Yajiya gukhala egi mazuelelo adi avula ha mavu, uvi gushigo nga zuelelo dimoshi diajiyilego gukotelesewa.
11 Handaga gula ngushigo mukotelesa zuelelo dia muthu tudi muzuela n’enji, muthu muene mbawukhala ngenji gu meso ami, ame nji mbangukhala ngenji gu meso enji.
12 Enue nji luholo mudi nu nzala yakola ya guheta guhana tuana heta mu njila ya nyuma ya Nzambi, kambenu ha guheta guhana guene guavula mukunda nu gukolesa aphangi mu hungu.
13 Ngenyi muthu udi muzuela mu zuelelo diangane, atoge Nzambi hagula amukuatese ha gubalumuna ndaga jidi muene muzuela.
14 Uvi gula ngudi mukombelela mu zuelelo diangane, gima gidi muzuela gidi guhana nguanguhuiwe mu njila ya nyuma ya Nzambi. Uvi eme ngushigo mukotelesa ndaga ngudi muzuela.
15 Itshi ngutshita henyaha? Mbangukalegela guhana guanguhuiwe mu njila ya nyuma ya Nzambi ha gukombelela. Uvi mbangukombelela nji hagula athu akotelese ndaga ngudi muzuela. Mbangukalegela nji guhana guene ha guyimba ngimbo. Mbanguyimba nji hagula athu akotelese ndaga ngudi muyimba.
16 Nga ndo gula udi mukombelela nu guhana guaguhuiwe mu njila ya nyuma ya Nzambi, luholo lutshi muthu munu ganginyinego makhalasa udi gugutegelela wajiya guzuela egi “Amen” gu gisambu giaye giaguhana mersi, gula muene gashigo mukotelesa ndaga udi muzuela?
17 Yadiago, udi mutshita gaye gisambu mu luholo luabonga ha guhana Nzambi mersi. Uvi gisambu giene gishigo mukuatesa* muthu ganginyinego makhalasa.
18 Ngudi muhana Nzambi mersi handaga ngana zuela mazuelelo avula gumibalega mukut’enu agasue.
19 Uvi idi ndaga yabonga egi nguzuele mbimbi thano mu hungu nu ndunge jiami ha gulongesa athu ako, ha fundo dia guzuela mbimbi 10 000 mu mazuelelo angane anyi athu ako ashigo mukotelesa.
20 Aphangi, mukhadigo gifua ana azonda mu luholo luenu lua gukotelesa ndaga. Uvi khalenu gifua ana azonda mu ndaga jiabola. Khalenu nji gifua athu agukula mu luholo luenu lua gukotelesa ndaga.
21 Mukhuala wa Moize udi muzuela egi: “Yehowa udi muzuela gamba, ‘Mbanguzuela nu athu awa mu mazuelelo angane nu mu mbimbi jiangane. Uvi ene mbashigo gunguvuila.’”
22 Hene guzuela mu mazuelelo angane gudi mukunda nu gukuatesa athu anago gusha gutshigina gudi Yesu hagula ashe gutshigina gudi muene. Uvi gushigo mukunda nu gulongesa athu ana gusha gutshigina. Gulongesa mbimbi ya Nzambi gudi mukunda nu athu ana gusha gutshigina gudi Yesu, uvi gushigo mukunda nu athu anago gusha gutshigina.
23 Gula athu agasue a mu hungu adibungisa, mukut’awo agasue asendesa guzuela mu mazuelelo angane, uvi gula athu anginyilego makhalasa nga anyi ashigo aklisto angina nji, mbaashigo muzuela egi muasaluga ba?
24 Uvi gula mukut’enu agasue mudi mulongesa, gula muthu gashigo muklisto nu ganginyinego makhalasa wangina ha fundo mudi, mbawumona egi mudi gumubalela* nu mudi gumusophesa.
25 Ngenyi ndaga jidi jia gusuega mu mutshima wenji mbajisologa, muene mbawubua hashi phala mu mavu ha gukombelela Nzambi. Mbawuzuela egi: “Nzambi udi diago mukatshi dienu.”
26 An’etu, itshi tuajiya guzuela giwa? Tangua mudi gudibungisa, muthu muko ayimbe lungimbo, muko alongese, muthu muko azuele mbimbi jiahetele muene gudi Nzambi, muko azuele mu mazuelelo angane, uvi muthu muko abalumune ndaga jidi muzuelewa mu mazuelelo angane. Tshitenu ndaga jiagasue ha gukolesa aphangi mu hungu.
27 Gula athu ako adi muzuela mu mazuelelo angane, adi naye gukhala phamba mbadi nga thathu, uvi avula ndo. Uvi mukut’awo agasue ashigo naye guzuela mu tangua dimoshi. Muthu muko nji udi naye gukhala hene ha gukotelesela* athu ndaga jidi muzuela ene mu zuelelo diangane.
28 Uvi gula gushigo nu muthu wajiya gukotelesela* athu ndaga jidi ene muzuela, adi naye guhena tedie mu hungu. Adi naye guzuela mu mitshima yawo nu Nzambi.
29 Gula baprofete nji adi guene muyadi nga mutatu, azuele. Uvi athu ako akotelese ndaga jidi ene muzuela.
30 Uvi gula Nzambi wawambela muthu muko udi wagukhala hashi ndaga jia guzuela, muthu wa thomo wakhadi muzuela udi naye guhena tedie.
31 Handaga mukut’enu agasue muajiya gulongesa muthu nu muthu mu tangua dienji, hagula egi athu agasue ahete malongo nu ngolo.
32 Baprofete anyi ahetele luendu lua gulongesa mbimbi ya Nzambi, adi naye gukalegela luendu luawo mu luholo luabonga.
33 Handaga Nzambi gashigo Nzambi wa lumuamua, uvi udi Nzambi wa guhuima.
Gifua luholo idi mu mahungu agasue a athu agijila.
34 Akhetu adi naye guhena tedie mu hungu, handaga ahanewego njila ha guzuela. Uvi adi naye gutumaga gifua luholo Mukhuala wa Nzambi udi muzuela.
35 Uvi gula atshigina gujiya ndaga imoshi, adi naye guhula alumi’awo gu inzo, handaga idi ndaga ya musonyi gula mukhetu udi muzuela mu hungu.
36 Mbimbi ya Nzambi yasendesele nu enue ba? Nga ndo, yajile khuta gudi enue hakhenu ba?
37 Gula muthu mumoshi udi mutangiza egi muene udi profete nga ndo wahetele guhana gua nyuma ya Nzambi, udi naye gutshigina egi ndaga ngudi gumisonegela jidi mukhuala wa Fumu.
38 Uvi gula muthu watuna ndaga eyi, Nzambi nji mbawumutuna.*
39 Hene aphangi, tshitenu ngolo ha gulongesa mbimbi ya Nzambi. Uvi mutunyisago nga muthu mumoshi ha guzuela mu mazuelelo angane.
40 Uvi ndaga jiagasue jikalegewe mu luholo luatagana, lumuamua ndo.
Mbimbi goshi'a diyiji
^ Nga “kambenu nu gikhesa giagasue.”
^ Mu Greke: “gutunga.”
^ Gima gia gushigila miziki gia mu tangua dikulu. Giakhale gia gudisha nu gitare gia mangino.
^ Nga “mukolesa.”
^ Nga “gumudingila.”
^ Nga “gubalumuina.”
^ Nga “gubalumuina.”
^ Nga ndo yajiya gukhala egi, “gula muthu mumoshi gashigo mutshigina gukotelesa ndaga eyi, mbawulandula gukhala ngenyi guyikotelesa ndo.”
