Mukanda wa Thomo Gudi Enya gu Kolinto 2:1-16
2 An’etu, tangua ngajile gumbo dienu ha gumilongesa gisuegi gia gijila gia Nzambi, ngazuelelego n’enu mu mbimbi jidi gumibinda nga gukalegela ndunge jia athu.
2 Handaga ngazuelele* egi ngushigo naye gujiya nga ndaga imoshi mukatshi dienu, uvi phamba Yesu Klisto yago washiyiwe ha mutshi.
3 Tangua ngajile gumbo dienu, ngakhalele waguleba, ngakhalele muvua woma, ngakhalele nji mudigita mangololo.
4 Tangua ngakhalele muzuela nu ngakhalele mulongesa, ngazuelelego nu mbimbi jiabonga jinyi enya ndunge ana gukalegela. Uvi mbimbi jiami jiakhalele mumonesa ngolo jia nyuma ya Nzambi
5 hagula gutshigina guenu gukhadigo mu ndunge jia athu, uvi gukhale mu ngolo jia Nzambi.
6 Henyaha tudi muzuelela ndunge mukatshi dia athu adi agukula mu nyuma. Uvi tushigo muzuelela ndunge jia athu a ha mavu awa* nga jia mafumu a ha mavu awa, handaga ene adi naye gushiyiwa.
7 Uvi tudi muzuelela ndunge jia Nzambi jinyi jiasuegewe mu gisuegi gia gijila. Nzambi wadiangele gulonda ndunge jiene mukunda nu lutumbu luetu gutuama egi athu asendese gutshita ndaga.
8 Gushigo nga fumu mumoshi mukatshi dia mafumu a ha mavu awa* wajiyile ndunge jiene. Handaga gula nga ajiyile ndunge jiene, nga ashiyilego Fumu wa gutumbuga ha mutshi.*
9 Gifua luholo idi yagusonega egi: “Meso amonelego ndaga jialondele Nzambi mukunda nu athu ana gumuzumba. Matshui avuilego ndaga jiene, athu nji ajitangijilego mu mitshima yawo.”
10 Uvi Nzambi watumonesele ndaga jiene mu njila ya nyuma yenji, handaga nyuma yana gukamba muabonga ndaga jiagasue uu nu ndaga jia Nzambi jinyi jiasuegewe.
11 Muthu wajiya gujiya matangi a muthu muko ba? Ndo sha. Phamba mutshima* wa muthu muene udi mujiya. Luholo lumoshi nji, gushigo nu muthu wajiya gujiya matangi a Nzambi, phamba nyuma ya Nzambi idi mujiya.
12 Esue tuahetelego nyuma ya ha mavu awa. Uvi tuahetele nyuma ya Nzambi hagula tukotelese ima yatuhuile Nzambi mu khenda jienji.
13 Esue tuanago gulongesa ndaga eji nu mbimbi jidi mulongesa ndunge jia athu. Uvi tuana gujilongesa nu mbimbi jidi mulongesa nyuma ya Nzambi. Ngenyi tuana gukotelesela athu ndaga jia mu nyuma* nu mbimbi jia mu nyuma.
14 Uvi muthu udi nu nzala ya ima ya ha mavu awa, ganago gutshigina ndaga jia nyuma ya Nzambi, handaga wana gumona ndaga jiene gifua guheya. Muene gajiyilego gujikotelesa, handaga phamba nyuma ya Nzambi idi naye gumukuatesa ha gujikotelesa.
15 Uvi muthu udi mutuamezewa gudi nyuma ya Nzambi, wana gukamba muabonga ndaga jiagasue. Uvi gushigo nga muthu mumoshi udi nu ngolo jia gumusophesa.
16 Handaga “nanyi udi mujiya matangi a Yehowa hagula amulongese?” Uvi esue tudi nu matangi a Klisto.
Mbimbi goshi'a diyiji
^ Nga “ngazudile desizio.”
^ Nga “gindongo egi.” Tala Ukoteleshi wa Mbimbi.
^ Nga “gindongo egi.” Tala Ukoteleshi wa Mbimbi.
^ Nga “amukhokhelego ha mutshi.”
^ Mu Greke: “nyuma.”
^ Nga “tuana gubungisa ndaga jia mu nyuma.”
