Mukanda wa Thomo Gudi Enya gu Kolinto 3:1-23
3 Aphangi, tangua ngazuelele n’enu, ngazuelelego n’enu gifua athu adi mutuamezewa gudi nyuma ya Nzambi. Uvi ngazuelele n’enu gifua athu a ha mavu awa, gifua ana azonda mu Klisto.
2 Ngamihanele mele, uvi ngamihanelego ima ya gudia yakola handaga mu tangua diene muakhalelego agukula mu nyuma. Uu nu henyaha khenji mukula genugo mu nyuma,
3 handaga mudi mulandula matangi a ha mavu awa. Luholo mudi nu ginjiongo nu khadilo dia gumana mukatshi dienu, ishigo mumonesa egi mudi nu matangi a athu a ha mavu awa nu mudi mulandula khadilo diawo ba?
4 Handaga gula muthu muko mukatshi dienu udi muzuela egi: “Ame ngudi muthu wa Phaula,” uvi muko egi “Ame ngudi muthu wa Apholo,” ishigo mumonesa egi mudi mutshita ndaga gifua luholo luana kalagala athu a ha mavu awa ba?
5 Apholo udi nanyi? Phaula nji udi nanyi? Ene adi enya mudimo anyi amikuatesele ha gubua alandudi a Yesu, gifua luholo luahanele Fumu muthu wagasue mudimo.
6 Ame ngakunyile mbuto, Apholo wayimbidile meya, uvi Nzambi wayikudishile.
7 Hene, muthu wakunyine nu muthu wayimbidile meya, ashigo nu ndando. Uvi muthu udi nu ndando udi Nzambi udi mukudisa mbuto yene.
8 Muthu udi mukuna mbuto nu muthu udi guyimbila meya, adi nu felela dimoshi.* Uvi muthu nu muthu mbawuheta gishimbigo gienji gifua mudi mudimo udi muene mukalagala.
9 Handaga tudi mafuta a Nzambi a mudimo. Enue mudi dihia dia Nzambi didi muene mukuna. Luko, mudi inzo ya Nzambi.
10 Nzambi wanguvidile khenda jiavula, hene ngahagele fondasio gifua mutungi wabonga.* Uvi muthu muko udi mutunga holu dia fondasio yene. Muthu wagasue alandule gumonesa gutema luholo ludi muene mutunga holu dia fondasio yene.
11 Handaga gushigo nga muthu mumoshi wajiya guhaga fondasio iko holu dia fondasio yinyi yatungiwe, yakotelesa egi Yesu Klisto.
12 Henyaha gula muthu wazangula wolo, nu utadi wa siliva, nu maseso a ndando ha gutunga holu dia fondasio yene, uvi muthu muko watunga nu mitshi, nu mayiji nga muangu,
13 mudimo wa muthu nu muthu mbawumuenega haphelo* mu lusugu lua gulolewa, handaga mu lusugu luene, tshuya mbatumonesa gula mudimo wa muthu wagasue wakhalele wabonga nga wabola.
14 Gula tshuya tuakondelego* mudimo watungile muthu holu dia fondasio yene, muthu muene mbawuheta gishimbigo.
15 Gula mudimo wa muthu wambiwa tshuya, ima yenji yagasue mbayitota, uvi muene hakhenji mbawuhuluishiwa. Ikhale ngenyi, muene mbawuhuluishiwa gifua muthu wabalegela mukatshi dia tshuya.
16 Enue mushigo mujiya egi mudi tempelo ya Nzambi, nu nyuma ya Nzambi yakhala mukatshi dienu ba?
17 Gula muthu washiya tempelo ya Nzambi, Nzambi mbawumushiya, handaga tempelo ya Nzambi yakhala ya gijila. Enue mudi tempelo yene.
18 Muthu gadihuigigo: Gula muthu mumoshi mukatshi dienu udi mutangiza egi udi muthu watema ha mavu awa,* muabonga abue genji muthu waheya hagula wajiya gubua muthu watema.
19 Gu meso a Nzambi ndunge jia ha mavu awa jidi guheya, handaga yasonegewe egi: “Muene wana gukuata enya ndunge mu masunga awo.”*
20 Yasonegewe nji egi: “Yehowa udi mujiya egi matangi a enya ndunge adi a githuhu.”
21 Gishina giene, nga muthu mumoshi gadisunzulago mukunda nu ndaga jidi mukalagala athu, handaga ima yagasue idi yenu.
22 Nga ame Phaula, nga Apholo, nga Sefase,* nga mavu awa nga monyo nga gufua, nga ima idi guene mangino, nga ima mbayiza mu masugu adi muza, yagasue idi yenu.
23 Enue mudi athu a Klisto. Uvi Klisto udi muthu wa Nzambi.
Mbimbi goshi'a diyiji
^ Nga “adi muthu mumoshi.”
^ Nga “gifua mutuameji watema wa midimo.”
^ Mu Greke: “mbawujiyiwa.”
^ Nga “tuahishilego.”
^ Nga “gindongo egi.” Tala Ukoteleshi wa Mbimbi.
^ Nga ”ndunge jiawo jiabola.”
^ Wana gutamegewa nji egi Phetelo.
