Mukanda wa Thomo Gudi Enya gu Kolinto 4:1-21
4 Athu adi naye gutumona gifua enya mudimo wa Klisto nu abambi a gisuegi gia gijila gia Nzambi.
2 Luko, Fumu wana tshigina egi enya mudimo enji atshite mudimo wawo muabonga.
3 Ishigo nu ndando egi enue mungusophese nga ndo tribinale* ya athu a ha mavu awa ingusophese. Yadiago, ame hakhami nji nganago gudisophesa.
4 Handaga ngushigo mujiya nga gima gimoshi giabola ngakalagala. Uvi ishigo mukotelesa egi ngudi muthu watagana, handaga Yehowa wana gungusophesa.
5 Gishina giene, musophesago nga muthu mumoshi gutuama egi tangua diahagewe ditagane, uu nu mbahaza Fumu. Ndaga jidi jia gusuega mu phipha luenyelu, muene mbawujizola mu muanya. Mbawuzola nji ndaga jiana tangiza athu mu mitshima yawo. Gungima, Nzambi mbawuhana muthu wagasue lutumbu ludi naye muene guheta.
6 Aphangi, ngamisonegela ha gumiwambela ndaga jiami nu jia Apholo mukunda nu gubonga guenu, hagula mulandule gifezegeselo gietu nu muwende mu gudivua nu mbimbi eji: “Tshitenu phamba ndaga jidi jia gusonega mu mukanda wa Nzambi,” hagula egi muzadigo nu lulendo, nu mumonyigo muthu muko gifua udi nu ndando yavula gubalega athu ako.
7 Itshi udi nayo idi gugutuma ha gutangiza egi wabalega athu ako? Ishigo Nzambi waguhanele ima yagasue udi nayo ba? Gula muene waguhanele ima yagasue, mukunda natshi udi gudihala giwa gifua wayihetele mu ngolo jiaye hakhaye?
8 Muahetele gale ima yagasue mudi nayo funu ba? Muabuile gale amonyi ba? Muasendesele gale guhinyina gifua mafumu uvi esue ndo ba? Ngudi mutshigina diago egi musendese guhinyina gifua mafumu hagula esue nji tuhinyine n’enu hamoshi.
9 Handaga ngudi mumona gifua esue apostolo, Nzambi watuhagele gu gisugishilo hagula athu agasue atumone gifua athu afishiwa milonga adi naye gushiyiwa. Handaga tuabua gifua gima gidi mutalewa gudi enya ha mavu, nu gudi anjelo nu gudi athu.
10 Esue tudi athu aheya mukunda nu Klisto, uvi enue mudi athu atema mu Klisto. Esue tudi athu aguleba, uvi enue mudi enya ngolo. Athu adi gumitumbuisa, uvi esue athu adi gutusegulula.
11 Uu nu henyaha tudi nu nzala nu luhungu.* Tushigo lume nu milele;* tudi mubetewa,* tushigo nji nu fundo dia gukhala.
12 Tudi mutshita mudimo wakola nu mago etu. Gula athu atushingana, tuana gukombelela mukunda nu ene. Tangua ana gutumonesa lamba, tuana gukolesela nu guhuiminyina guagasue.
13 Tangua athu ana gutumbila mambo, tuana guavutuila nu guhuiminyina guagasue.* Uu nu henyaha athu adi gutumona gifua ima yawusala ya ha mavu, idi naye gubishidiwa ha shita.
14 Ngushigo gumisonegela ndaga eji ha gumikuatesa musonyi. Uvi ngudi gumisonegela najio ha gumitemesa handaga mudi an’ami ngana guzumba muavula.
15 Handaga ikhale mudi nu alongeshi* 10 000 ajiya gumilongesa luholo lua gulandula Klisto, mushigo nu atata avula ndo. Uvi ame ngabuile sh’enu handaga ngamilongesele lukuma luabonga luatadila Klisto Yesu.
16 Ngudi gumibubila ha gulandula gifezegeselo giami.
17 Gishina giene ngudi gumitumina Timote, handaga muene udi mun’ami ngana guzumba muavula, nu wana kalegela Fumu mudimo nu mutshima umoshi. Muene mbawumiwunguluisa* luholo ngana tshita ndaga* mu mudimo wa Klisto Yesu, gifua luholo ngana longesa mu mahungu agasue.
18 Athu ako adi aguzala pha nu lulendo, handaga adi mutangiza egi mbangushigo muza gumbo dienu.
19 Uvi gula Yehowa watshigina, gualeha ndo ngumuza gumbo dienu. Ngudi mutshigina guza mutala athu ene adi gudihala, hagula ngujiye gula adi nu ngolo jia Nzambi nga ndo. Uvi ngushigo muza ha gujiya mbimbi jiawo.
20 Handaga Ufumu wa Nzambi wanago gumuenega mu mbimbi, uvi wana gumuenega mu ngolo jia Nzambi.
21 Itshi mudi mutshigina? Mudi mutshigina egi nguze gumbo dienu nu fimbo, nga ndo nguze nu guzumba nu mutshima wa guhuiminyina?
Mbimbi goshi'a diyiji
^ Nga “gisopheselo.”
^ Nga “nu phuila.”
^ Mu Greke: “tudi thowa.”
^ Nga “mumonesewa lamba.”
^ Mu Greke: “tuana guabubila.”
^ Nga “iledi; ndeji.”
^ Nga “mbawumiyabuluisa.”
^ Mu Greke: “ba metode ami.”
