Mukanda wa Thomo Gudi Enya gu Kolinto 5:1-13
5 Ngavui egi gudi nu muthu mumoshi mukatshi dienu udi mukalagala uthambi.* Wana gubungisa muila* nu mukaji’a sh’enji. Khenji tuamonele galego ndaga ya luholo elu nga gudi athu a ifutshi iko.
2 Mudi gudihala mukunda nu ndaga ya luholo elu? Muakhalele naye gudila nu gukatula muthu udi mutshita ndaga jia luholo elu mukatshi dienu.
3 Ikhale ngushigo n’enu mu muila, uvi ngudi n’enu mu nyuma. Muthu wakalagala ndaga jia luholo elu, ngamufuishi gale milonga gifua ngudi n’enu diago fundo dimoshi.
4 Tangua mbamudibungisa mu jina dia Fumi’etu Yesu, jiyenu egi ame nji ngudi n’enu mu nyuma, mu ngolo jia Fumi’etu Yesu.
5 Mudi naye guhana muthu wa luholo elu gudi Satana hagula muila ushiyiwe. Ngenyi nyuma yajiya guhuluishiwa mu lusugu lua Fumu.
6 Gudihala guenu gushigo guabonga. Enue mushigo mujiya egi levire yazonda yana gujimbisa pate yagasue ba?
7 Katulenu levire ikulu hagula mubue pate ihe-ihe, handaga mudi gifua pate ishigo nu levire. Yadiago, Klisto wahanele monyo wenji gifua mulambu, ngenyi wabuile mun’a gimeme wetu wa Pake.
8 Hene tukalagalago wano nu levire ikulu nga nu levire ya ndaga jiabola nu jia shidi. Uvi tukalagalenu wano nu mapha ashigo nu levire, mapha abonga nu a giamatshidia.
9 Mu mukanda ngamisonegele, ngamiwambelele egi mukuatshigo ufuta* nu enya uthambi.*
10 Ngazuelelego mukunda nu athu agasue a ha mavu awa ana guwenda uthambi,* nga athu akhala nu nzala ya ima yavula, nga nzangi* nga akombeledi a isongo. Handaga gula nga ngazuelele ngenyi, nga mudi naye gukatuga ha mavu awa.
11 Uvi henyaha ngudi gumisonegela egi mukuatshigo ufuta* nu muthu udi mutamegewa egi udi Muklisto, uvi muene udi mukalagala uthambi,* udi nu nzala ya ima yavula, udi mukombeledi wa isongo, udi muenya mashingo,* nga mukuatewi wa matombe nga nzangi.* Mushigo naye nji gudia nu muthu wa luholo elu.
12 Ishigo ame ngudi naye gusophesa athu adi hanze dia hungu. Uvi enue mudi naye gusophesa athu adi mukatshi dia hungu.
13 Nzambi wana gusophesa athu adi hanze ya hungu. “Katulenu muthu wabola mukatshi dienu.”
Mbimbi goshi'a diyiji
^ Mu Greke: porneya. Tala Ukoteleshi wa Mbimbi.
^ Nga “wana gujinga.”
^ Nga “mudibungisago.”
^ “Ndaga jia musonyi.” Tala Ukoteleshi wa Mbimbi.
^ “Ndaga jia musonyi.” Tala Ukoteleshi wa Mbimbi.
^ Nga “athu ana gutambula ima yangane gu ngolo.”
^ Nga “mudibungisago.”
^ “Ndaga jia musonyi.” Tala Ukoteleshi wa Mbimbi.
^ Nga “muthu wana guzuela mbimbi jiabola.”
^ Nga “muthu wana gutambula ima yangane gu ngolo.”
