Mukanda wa Thomo Gudi Enya gu Kolinto 6:1-20
6 Gula muthu mumoshi mukatshi dienu udi nu mulonga nu phangi’enji, mukunda natshi muanago guya n’enji gutuama dia athu agijila, ha fundo dia gumufunda gudi manzuji anyi anago gutumagela mikhuala ya Nzambi?
2 Enue mushigo mujiya egi athu agijila mbaasophesa athu a ha mavu awa ba? Gula enue mbamusophesa athu a ha mavu awa, na mushigo atagana ha gusophesa tumilonga tuazonda ba?
3 Enue mushigo mujiya egi esue mbatusophesa anjelo ba? Gula mbatusophesa anjelo, mukunda natshi tuajiyilego gusophesa milonga idi mukalegewa ha mavu awa?
4 Hene gula mudi nu milonga ya ha mavu awa idi naye gusophesewa, mukunda natshi mudi mutomba ha guya nayo gudi manzuji anyi hungu diana gumona gifua athu a githuhu, hagula ayisophese?
5 Ngudi muzuela ngenyi ha gumikuatesa musonyi. Gushigo nga muthu mumoshi mukatshi dienu udi nu ungambi watagana ha gusophesa milonga mukatshi dia aphangi’enji ba?
6 Gula muthu udi nu mulonga nu phangi’enji, udi naye guya gumufunda phamba gudi athu ashigo enya gutshigina ba?
7 Yadiago, tangua mudi muya gudifunda gu tribinale, enue hakhenu muadifishi gale milonga. Ha fundo dia gudifunda, mukunda natshi mushigo mutshigina egi amitshite gubola? Mukunda natshi mushigo mutshigina egi amikuye?
8 Gula muatshitshilego ngenyi, idi mumonesa egi enue mudi mutshitshila aphangi’enu gubola, nu mudi guakuya.
9 Mushigo mujiya egi athu ana kalagala ndaga jiabola mbaashigo mungina mu Ufumu wa Nzambi ba? Mudihuigigo.* Athu ana gukalagala uthambi,* nu akombeledi a isongo, nu athu adizudile gale mu ulo uvi adi mubungisa muila nu akhetu ako nga nu mala ako, nu mala ana gubungisa muila nu mala n’ako,*
10 nu nzangi, nu athu adi nu nzala ya ima yavula, nu athu ana kuatewa matombe, nu athu ana gushingana,* nu athu ana tambula ima yangane mbaashigo mungina mu Ufumu wa Nzambi.
11 Athu ako mukatshi dienu akhalele mutshita ndaga eji. Uvi amiwevele, amibuishile nji athu agijila. Muabuishiwe athu abonga gu meso a Nzambi mu jina dia Fumu Yesu Klisto nu mu njila ya nyuma ya Nzambi wetu.
12 Ngajiya gutshita ndaga jiagasue,* uvi ndaga jiagasue jishigo nu ndando. Luko, ngajiya gutshita ndaga jiagasue, uvi mbangushigo mubemba nga gima gimoshi egi gingubuise* muhiga wagio.
13 Ima ya gudia idi mukunda nu vumo, vumo nji didi mukunda nu ima ya gudia. Uvi Nzambi mbawushiya ima eyi yagasue mbadi. Muila ushigo mukunda nu uthambi,* uvi udi mukunda nu Fumu. Fumu nji udi mukunda nu muila.
14 Uvi Nzambi wafuzumuine Fumu gu gufua, mbawutufuzumuna nu esue nji mu ngolo jienji.
15 Enue mushigo mujiya egi mila yenu idi itshinyi ya muila wa Klisto ba? Mudi mutangiza egi ngudi naye gukatula itshinyi ya muila wa Klisto ha guyibungisa nu mukhetu wa thambi ba? Ndo sha!
16 Enue mushigo mujiya egi muthu udi mubungisa muila nu mukhetu wa thambi, udi mubua n’enji muila umoshi ba? Handaga Nzambi udi muzuela egi “muyadi’ayo mbaabua muila umoshi.”
17 Uvi muthu udi gudibungisa nu Fumu, udi mubua n’enji muthu mumoshi mu nyuma.
18 Lengenu uthambi!* Gubola guagasue muthu wajiya gukalagala, gudi hanze ya muila wenji. Uvi muthu udi mukalagala uthambi, udi mutshitshila muila wenji gubola.
19 Enue mushigo mujiya egi muila wenu udi tempelo ya nyuma ya Nzambi idi mukatshi dienu, yakatugile gudi muene ba? Luko enue mudi athu a Nzambi
20 handaga muasumbiwe nu ndando yakola. Hene tumbuisenu Nzambi nu mila yenu.
Mbimbi goshi'a diyiji
^ Nga “mudibumbigo mambo.”
^ “Ndaga jia musonyi.” Tala Ukoteleshi wa Mbimbi.
^ Mu zuelelo dia Greke, ana gukalegela mbimbi mbadi jia gudisha. Mbimbi jiene jidi muzuelela yala munu watshigina egi yala n’a muko abungise n’enji muila. Jidi muzuelela nji yala udi mukamba gubungisa muila nu yala muko.
^ Nga “athu ana guzuela mbimbi jiabola.”
^ Nga “mukhuala udi gunguhana njila ya gutshita ndaga jiagasue.”
^ Nga “ginguhinyine.”
^ Mu Greke: porneya. Tala Ukoteleshi wa Mbimbi.
^ Mu Greke: porneya. Tala Ukoteleshi wa Mbimbi.
