Mukanda wa Thomo Gudi Enya gu Kolinto 8:1-13
8 Henyaha mukunda nu ima ya gudia yahanewe milambu gu isongo, tudi mujiya egi mukut’etu agasue tuakhala nu ujiyi. Ujiyi wana gutuma muthu ha gubua muenya lulendo, uvi guzumba guana gukolesa.
2 Gula muthu udi mutangiza egi udi mujiya ndaga, mu guzuela guabonga, khenji ayijiya galego gifua luholo ludi naye muene guyijiya.
3 Uvi gula muthu wazumba Nzambi, Nzambi wana gumujiya.
4 Henyaha tuzuelelenu gale ndaga yatadila gudia ima yahanewe milambu gu isongo. Tudi mujiya egi gisongo gidi gima gia githuhu,* uvi Nzambi udi phamba mumoshi.
5 Gudi nu ima yavula mu dilu nu ha mavu yinyi athu ana gutamega egi nzambi. Athu ana guzuela egi “nzambi” jiakhala jiavula, “mafumu” nji akhala avula.
6 Uvi esue tudi mujiya egi Nzambi wa giamatshidia udi phamba mumoshi, muene Tata wetu wa mu dilu wafugile ima yagasue. Watufugile nji ha gukalagala gutshigina guenji. Tudi mujiya luko egi Fumu udi phamba mumoshi, Yesu Klisto. Ima yagasue yafugiwe mu njila yenji, esue nji tuafugiwe mu njila yenji.
7 Uvi athu agasue anago gujiya ndaga eyi. Uvi athu ako anyi akhalele thomo mukombelela isongo ana tangiza egi, gula adia ima yahanewe milambu gu isongo, ana mona gifua adi mukombelela gisongo. Luholo mitshima yawo idi yaleba, yana gudisagesa* muavula.
8 Uvi ima ya gudia mbayishigo gutukuatesa ha gukhala nu ufuta wabonga nu Nzambi. Hene gula tuatuna guyidia, mbatushigo mutotesa nga gima; gula tuayidia nji, mbatushigo muheta nga gima.
9 Uvi temienu hagula luendu luenu lua gutomba ndaga mudi naye gutshita, lutumigo athu adi aguleba ha gubua mu gubola.
10 Handaga gula aye udi nu ujiyi, udi mudia mu tempelo ya isongo, muthu udi nu mutshima waleba wagumona, mutshima wenji mbawushigo gumutuma ha gudia nji ima yahanewe milambu gu isongo ba?
11 Klisto wafuile mukunda nu phangi’aye. Uvi ujiyi waye udi mubolesa gutshigina gua phangi’aye muene udi waguleba.
12 Gula mudi mukalegela aphangi’enu gubola gua luholo elu, nu mudi munamenesa* mitshima yawo idi yaguleba, idi mumonesa egi mudi mukalegela nji Klisto gubola.
13 Gishina giene, gula gima gia gudia gidi mutuma phangi’ami ha gubua mu gubola, mbangushigo mudia luko mbiji nga hazonda hagula ngutumigo phangi’ami ha gubua mu gubola.
Mbimbi goshi'a diyiji
^ Nga “gima gia githuhu ha mavu awa.”
^ Mu Greke: “yana gubua ya usala.”
^ Nga “mudi munemeka.”
