Mukanda wa Thomo Gudi Enya gu Kolinto 9:1-27
9 Ngushigo luko muhiga. Ame ngushigo mupostolo ba? Ngamonelego Fumi’etu Yesu ba? Enue mushigo mbuto ya mudimo wami mu Fumu ba?
2 Ikhale ngushigo mupostolo wa athu ako, uvi ngudi diago mupostolo wenu, handaga enue mudi gifua njimbu idi mumonesa egi ngudi mupostolo wa mudimo wa Fumu.
3 Ngudi muwambela athu adi gungusophesa egi:
4 Esue tushigo atagana* ha gudia nga ha gunua ba?
5 Esue tushigo nu luholo lua gudizula mu ulo nu mukhetu udi mulandudi wa Yesu nu ha guya nu guwenda n’enji gifua muana tshita apostolo ako nu aphangi a Fumu nu Sefase* ba?
6 Phamba ame nu Barnabase tudi naye gutshita mudimo wajiya gutukuatesa ha guheta ima ya gudia ba?
7 Suta mutshi wana gudifuta makuta hakhenji mukunda nu mudimo udi muene mutshita? Nanyi wana gukuna mutshi wa mabundu a vinyo uvi muene gudia ndo mabundu a mutshi wene? Muthu mutshi wana gufuga shitu uvi muene gunua ndo ndambu ya mele a shitu jiene?
8 Ndaga eji ngudi muzuela, jidi phamba matangi a athu ba? Mukhuala nji wanago guzuela ndaga eji ba?
9 Handaga idi yagusonega mu Mukhuala wa Moize egi: “Ushigo naye gujitshiga ngombe gu bonzo tangua idi mudiata mbuto ha gujisuwa.” Nzambi wana gudisagesa mukunda nu ngombe ba?
10 Nzambi udi muzuela ngenyi mukunda nu esue ba? Yadiago, yasonegewe mukunda nu esue, handaga muthu udi mudima nu muthu udi musuwa mbuto adi naye gutshita mudimo wawo nu felela egi mbaaheta gishimbigo giawo.
11 Gula esue tuakunyine ima ya mu nyuma mu mitshima yenu, gubola gudi gui gula muatukuatesa ha gutuhana ima tudi nayo funu?
12 Gula athu ako adi nu ufumu wa guheta ukuateshi wenu, esue tushigo nu ufumu wene wavula guabalega ba? Ikhale tudi nu ufumu wene, uvi tuamitogelego nga gima gimoshi. Uvi tudi mukolesela mu ndaga jiagasue hagula tukangigo athu njila ha gutshigina lukuma luabonga luatadila Klisto.
13 Enue mushigo mujiya egi athu ana kalagala mudimo mu tempelo, ana gudia ima ya mu tempelo ba? Mushigo mujiya luko egi athu ana kalagala mudimo tangua diagasue gu giwotshielo, ana guahana nji ndambu ya ima yahanewe milambu ha giwotshielo ba?
14 Luholo lumoshi nji, Fumu wazuelele egi athu adi mulongesa lukuma luabonga adi naye guheta ima adi nayo funu mu njila ya lukuma luabonga.
15 Uvi ame ngahetelego gubonga gua ndaga eji jiagasue. Ngushigo gumisonegela ndaga eji ha gumitoga egi mungukuatese nu ima eyi, handaga ngajiya gutshigina egi ngufue gami. Gushigo nga muthu mumoshi mbawungukatula luendu lua gudisunzula!
16 Hene gula ngudi mulongesa lukuma luabonga, ishigo mukunda nu gudihala. Uvi ngana guwutshita handaga udi mudimo ngudi naye gukalagala. Hene lamba diami gula ngalongeselego lukuma luabonga!
17 Gula ngatshita mudimo owu nu mutshima umoshi, mbanguheta gishimbigo. Uvi gula ngatshitshilego mudimo wene nu mutshima umoshi, udi khuta mudimo wanguhuile Nzambi.
18 Gishimbigo giami gidi itshi? Gidi egi tangua ngana longesa athu lukuma luabonga, nganago guatoga nga gima. Ngenyi ngajiyilego gubolesa luendu luami lua gulongesa lukuma luabonga.
19 Handaga gu meso a athu agasue, ngushigo luko muhiga. Uvi ame hakhami ngadibuishile gale muhiga wa athu agasue hagula ngajiya gukuatesa athu avula ha gubua alandudi a Yesu.
20 Mukunda nu enya Yuda, ngabuile gifua muenya Yuda ha guakuatesa abue alandudi a Yesu. Ngana tumagelago mikhuala ya Moize, uvi mukunda nu athu ana tumagela mikhuala yene, ngabuile gifua muthu udi mutumagela mikhuala ya Moize, ha guakuatesa abue alandudi a Yesu.
21 Mukunda nu athu ashigo mujiya mikhuala ya Moize, ngabuile gifua ngushigo mujiya mikhuala yene, hagula ngajiya guakuatesa ha gubua alandudi a Yesu. Uvi ame ngana tumagela mukhuala wa Nzambi nu ngudi mutumagela nji mukhuala wa Klisto.
22 Mukunda nu athu adi aguleba, ngabuile gifua ngudi muthu waguleba hagula ngajiya guakuatesa ha gubua alandudi a Yesu. Ngabuile ndaga jiagasue mukunda nu athu a maluholo agasue hagula ngajiya guhuluisa athu ako mukatshi diawo mu maluholo agasue.
23 Uvi ngudi mutshita ndaga eji jiagasue mukunda nu lukuma luabonga, hagula ngajiya gulongesa athu ako lukuma luene.
24 Mushigo mujiya egi athu avula ana zula phushi ha guheta gishimbigo, uvi phamba mumoshi wana gugiheta ba? Zulenu phushi hagula mubinge.
25 Muthu wagasue udi muzula phushi* ha gubinga, wana gudikanda mu ndaga jiagasue. Yadiago, ene ana gutshita ngenyi ha guheta gishimbigo* ginyi giajiya gutota. Uvi esue tuana guyitshita ha guheta gishimbigo ginyi giajiyilego gutota.
26 Gishina giene, ame ngushigo mulaba gulenga phushi handaga ngudi mujiya fundo ngudi muya. Ngushigo mulua gifua muthu udi mulua nu muhehe.
27 Uvi ngudi mubeta muila wami* makhome nu ngudi guwubata gifua muhiga handaga gula ngatshitshilego ngenyi, ikhale ngudi mulongesa athu ako lukuma luabonga, Nzambi wajiya gungutuna.
Mbimbi goshi'a diyiji
^ Mu Greke: “tushigo nu ufumu.”
^ Wana tamegewa nji egi Phetelo.
^ Mbimbi ya Greke akalegela haha ishigo mutadila phamba guzula phushi, uvi idi mutadila nji gubinga mu ndaga jiko.
^ Mu Greke: “gifulu; gipho.”
^ Nga “ngudi musagesa muila wami; ngudi guwuhana ndola yakola.”
