Mukanda wa Thomo Phetelo 1:1-25
1 Ame Phetelo mupostolo wa Yesu Klisto, ngudi gumisonegela enue mudi mujinga mukunda nu tangua diazonda ha mavu awa, mudi ya gumuangagana mu mafundo agasue gu Phonte, gu Galatiya, gu Kaphadosia, gu Azi nu gu Bitinia nu gudi athu atombewe,
2 gifua muadiangele gulonda Tata Nzambi, muabuishiwe athu a gijila mu njila ya nyuma. Watshitshile ngenyi hagula mumutumagele, muphelegetesewe mu njila ya mahatshi a Yesu Klisto.
Ngudi musamba egi Tata Nzambi amivile khenda jienji jiavula nu amikuatese ha gukhala mu guhuima.
3 Nzambi Tata wa Fumu wetu Yesu Klisto atumbuishiwe. Handaga mukunda nu khenda jienji jiavula, watukuatesele ha guvalewa luko mukunda nu felela dia monyo mu njila ya gufuzumuga gua Yesu Klisto
4 nu mukunda nu umonyi unu wanago gufukha, wanago gukuata usala nu wanago gubola. Umonyi wene wana bambewa mu dilu mukunda nu enue
5 athu adi mubambewa gu ngolo jia Nzambi mukunda nu gutshigina. Nzambi udi gumibamba mukunda nu guhuluga gudi hehi ha gumonesewa mu tangua dia gisugishilo.
6 Gishina giene mudi nu gusuanguluga guavula, ngatshima idi nu ndando egi muvue gikenene mukunda nu malamba avula mudi mutagana nawo mu tangua diazonda,
7 hagula gutshigina guenu gualolewe gumikuatese ha guheta lutumbu nu ginemua tangua mbadimonega Yesu Klisto. Gutshigina gua luholo elu mudi nago gudi nu ndando gubalega wolo, unu wana bola ngatshima wana lolewa mu tshuya.
8 Muana gumuzumba ngatshima khenji muamumonele gale ndo. Muana sha gutshigina gudi muene, ngatshima mushigo gumumona. Mudi diago nu gusuanguluga guavula gunu athu ajiyilego gukotelesa,
9 handaga mudi muheta lufuto lua gutshigina guenu, lufuto luene ludi guhuluishiwa guenu.*
10 Mukunda nu guhuluishiwa guene, baprofete anyi alongesele ndaga yatadila khenda jiavula jia Nzambi jinyi amividile, atogele nu akambele gujiya ndaga yatadila guhuluga guene.
11 Nzambi wadiangele guawambela mu njila ya nyuma yenji egi Klisto mbawumona lamba, gungima mbawutumbuishiwa. Gishina giene akhalele mukamba gujiya tangua nu sungi ndaga jiene mbajibuila Klisto.
12 Nzambi waamonesele egi ndaga akhalele mulongesa jiakhalelego guatadila, uvi jiakhalele gumitadila enue. Ndaga jialongesele ene, jiene jiamiwambelele athu akhalele gumilongesa lukuma luabonga mu njila ya nyuma ya Nzambi yakatugile mu dilu. Anjelo nji adi nu nzala yakola ya gujiya ndaga jiene.
13 Londegenu matangi enu ha gukalagala mudimo wakola, tshitenu ndaga jiagasue nu matangi abonga. Hagenu felela dienu gu khenda jiavula jia Nzambi jinyi mbaamimonesela tangua mbadimonega Yesu Klisto.
14 Luholo mudi ana atumaga, bembenu gulandula nzala jienu muakhalele najio ha thomo, hamuakhalele khenji mujiya galego Nzambi.
15 Muthu wamitamegele udi wa Gijila, enue nji khalenu athu a gijila mu makalegelo enu agasue gifua muene,
16 handaga mukanda wa Nzambi udi muzuela egi: “Mudi naye gukhala athu a gijila, handaga ame ngudi wa gijila.”
17 Tangua mudi musamba Tata munu wana gusophesa mu luholo luabonga, ha gutadila makalegelo a muthu nu muthu, monesenu mu makalegelo enu egi muana vila Nzambi woma, tangua mudi nu monyo mukunda nu tangua diazonda ha mavu awa.
18 Handaga mudi mujiya muabonga ndando yafutshile Nzambi ha gumikula gu ndaga jiabola jiamibembele akhakh’enu. Muene gamikudilego* nu ima yana bola gifua utadi wa siliva nga utadi wa wolo.
19 Uvi wamikudile nu mahatshi a ndando a Klisto, gifua mahatshi a mun’a gimeme ushigo nu gubola, ushigo nu ditona.
20 Idi ya giamatshidia egi Nzambi wadiangele gumutomba gutuama egi mavu afugiwe, uvi wamonesewe gu gisugishilo gia matangua mukunda nu enue.
21 Mu njila yenji, enue muana sha gutshigina gudi Nzambi wamufuzumuine gu gufua nu wamuhanele lutumbu, hagula gutshigina guenu nu felela dienu dikhale gudi Nzambi.
22 Henyaha muaphelegetesewe handaga muatumagele giamatshidia, mudi nu guzumba gua uphangi gushigo nu mambo. Hene, zumbenu athu ako mangololo nu mutshima umoshi.
23 Enue muavualewe luko, muavualewego gu lumbale luajiya gufukha, uvi gu lumbale lunu luajiyilego gufukha,* mu njila ya mbimbi ya Nzambi wa mayilago udi nu monyo.
24 Handaga “athu agasue adi gifua muangu, lutumbu luawo ludi gifua yaji ya mu temu. Muangu wana migina, iyaji yana bua,
25 uvi mbimbi ya Yehowa yana sala mayilago.” Nu “mbimbi” yene idi lukuma luabonga lunu amilongesele.
Mbimbi goshi'a diyiji
^ Nga “guhuluga gua mionyo yenu.”
^ Mu Greke: “muakudiwe mu njila ya mulambu.”
^ Yakotelesa egi, mbale jiajiya guzola mbuto nga guhaga mabundu.
