Mukanda wa Thomo Phetelo 2:1-25
2 Bembenu ndaga jiabola jia maluholo agasue: Mambo nu mulebo nu fuwa nu lufueto lua maluholo agasue.
2 Khalenu nu nzala yakola ya mele abonga* a mbimbi ya Nzambi gifua ana a gitebe hagula ajiya gumikuatesa ha gukula nu ha guhuluga.
3 Tshitenu ngenyi handaga mudi mujiya egi Fumu wana khala nu mutshima wabonga.
4 Tangua mudi musuena hehi n’enji, muthu udi seso dia monyo dinyi athu abishidile, uvi Nzambi waditombele, wadimonele egi didi nu ndando,
5 enue nji mudi gifua maseso a monyo adi mukuatesa ha gutunga inzo ya mu nyuma ha gukhala hunji dia nganga-nzambi jidi muhana milambu ya mu nyuma inyi Nzambi wajiya gutshigina mu njila ya Yesu Klisto.
6 Handaga Mukanda wa Nzambi udi muzuela egi: “Tala! Ngudi muhaga seso diatombewe gu Siona, didi seso dia ndando dia ha khomo mukunda nu fondasio. Muthu wagasue wahaga gutshigina gu seso diene, mbagavishiwago musonyi.”
7 Muene udi nu ndando mukunda nu enue handaga muana sha gutshigina gudi muene. Uvi gudi athu anyi anago gusha gutshigina gudi muene, muene udi “seso atungi abishidile, uvi diabuile seso dia thomo dia ha khomo,”
8 wabuile nji “seso diana khakhuisa nu diana buisa athu.” Ene ana khakhuga handaga ana tumagela ndo mbimbi. Eyi ndaga yatombewe mukunda nu ene.
9 Uvi enue mudi “giphuta giatombewe, mudi nganga-nzambi nu mudi mafumu, mudi gifutshi gia gijila, mudi athu alondewe ha gukhala khapho dia Nzambi, hagula mulongese makalegelo abonga”* a muthu wamikatudile mu phipha ha guminginyisa mu muanya wenji watagana.
10 Handaga thomo muakhalelego giphuta, uvi henyaha mudi giphuta gia Nzambi. Thomo amividilego nji khenda, uvi luenyelu amivila khenda.
11 Aphangi’ami ngana zumba muavula, mudi gifua ngenji ha mavu awa mukunda nu tangua diazonda. Ngudi gumitoga ha gutuna gulandula nzala jia muila jidi gumiluisa.
12 Khalenu nu makalegelo abonga mukatshi dia enya a ha mavu, handaga gula amifunda egi mudi nu makalegelo abola, ene hakhawo mbaamona makalegelo enu abonga nu mbaatumbuisa Nzambi mu lusugu mbaluza muene musophesa.
13 Mukunda nu Fumu, tumagelenu uhinyinyi wagasue wa athu, muthu udi fumu mutumagelenu handaga wamibalega gukoma
14 nga baguvelenele atumagelenu, handaga adi athu atumiwe ha guhana ndola gudi athu adi mukalagala ndaga jiabola, uvi ha gutumbuisa athu adi mutshita ndaga jiabonga.
15 Nzambi udi mutshigina egi ha mudi mutshita ndaga jiabonga, mukange makano a athu aheya adi muzuela ndaga jia githuhu.
16 Khalenu gifua athu ashigo mu uhiga. Mukalegelago diphanda dienu ha gutshuiga ndaga jiabola mudi mukalagala, uvi dikalegelenu gifua ahiga a Nzambi.
17 Nemesenu athu a maluholo agasue, zumbenu aphangi agasue, vilenu Nzambi woma, nemesenu fumu.
18 Enya mudimo atumagele mafumu awo nu woma wagasue. Akhadigo mutumagela phamba mafumu anyi adi mukalagala ndaga jiabonga nu adi nu gisemo, uvi atumagele nji anyi adi guasagesa.
19 Handaga idi ndaga yabonga gula muthu udi mukolesela mu malamba* nu udi mumonesewa lamba ngatshima gakalegelego nga ndaga yabola mukunda nu mutshima wenji waphelegeta gutuama dia Nzambi.
20 Gubonga gutshi muajiya guheta gula mudi mukolesela gu fimbo jidi gumikhuphudiwa handaga muatshitshi gubola? Uvi gula mudi mukolesela mu malamba handaga mudi mukalagala ndaga jiabonga, idi ndaga yabonga gu meso a Nzambi.
21 Enue muatamegewe mukunda nu ndaga eyi, handaga Klisto wamonele lamba mukunda nu enue. Wamibembele gifezegeselo hagula muajiya gulandula nganyo jienji* muabonga.
22 Muene gatshitshilego gubola, gazuelelego nga mbimbi imoshi ya mambo mukano dienji.
23 Tangua akhalele gumushinga, muene gavutudilego mashingo. Tangua diakhalele muene mumona lamba, gakambelego guvutula gubola, uvi wahagele mutshima gudi muthu wana sophesa mu luholo luabonga.
24 Muene wabatele gubola guetu mu muila wenji ha mutshi hagula tuajiya gufua mu ndaga yatadila masumu nu tukhale nu monyo ha gukalagala ndaga jiabonga. “Enue muasagewe mu njila ya phuta jienji.”
25 Handaga muakhalele gifua imeme idi muwungagana, uvi henyaha muavutuga gudi mubambi wa imeme wana bamba mionyo yenu.
Mbimbi goshi'a diyiji
^ Nga “aphelegeta.”
^ Yakotelesa egi: makalegelo nu midimo inyi athu ajiya gutumbuisa.
^ Nga “gikenene.”
^ Nga “njila jienji.”
