Mukanda wa Thomo Phetelo 3:1-22
3 Luholo lumoshi nji, enue akhetu tumagelenu alumi’enu hagula mala anyi ashigo mutumagela mbimbi ya Nzambi ajiya guyitumagela mukunda nu makalegelo enu ngatshima muawambelelego nga gima,
2 handaga ene mbaamona makalegelo enu abonga hamoshi nu ginemua giavula.
3 Gubonga guenu gukhadigo phamba gua gu meso, ha gutunga masanga, gusudiga misanga ya wolo, nga gusudiga milele yabonga,
4 uvi gukhale gubonga gua mu mutshima gunu guajiyilego gufukha, gubonga gudi nu mutshima watuluga nu wahuiminyina, unu udi nu ndando yavula gu meso a Nzambi.
5 Lulu luholo akhetu a gijila a mu tangua dikulu anyi akhalele muhaga gutshigina gudi Nzambi, akhalele gudilondega, akhalele mutumagela alumi’awo,
6 gifua luholo Sara wakhalele mutumagela Abalahama, wakhalele gumutamega egi fumu. Gula mudi mulandula gukalagala ndaga jiabonga, nu gula mushigo muvua woma, idi mumonesa egi mudi an’enji a akhetu.
7 Luholo lumoshi nji, enue mala jiyenu akaji’enu muabonga ha guakalegela ndaga mu luholo luabonga.* Khalenu muhana akhetu ginemua gifua bungu dialeba, handaga ene nji Nzambi waahanele felela dia guheta monyo gifua enue. Gula muatshitshilego ngenyi, Nzambi mbagashigo muvua isambu yenu.
8 Ha gusugisa, khalenu matangi amoshi,* dihagenu ha fundo dia athu ako, khalenu nu guzumba gua uphangi, vilenu athu ako khenda, khalenu nji nu gudibulumuisa.
9 Muvutulago gubola mu gubola, muvutulago nji mashingo mu mashingo. Uvi wambelenu athu ako ndaga mu luholo luabonga, handaga Nzambi wamitamegele mukunda nu ndaga eyi hagula mbamuhete gubonga.
10 Handaga “muthu wagasue udi mutshigina gukhala nu monyo, udi mutshigina gumona masugu abonga, udi naye gukanda ludimi luenji hagula gazuedigo ndaga jiabola, udi naye nji gukanda kano dienji hagula gambigo mambo.
11 Muene atune ndaga jiabola, akalagale ndaga jiabonga; akambe guhuima, alandule gukhala mu guhuima.
12 Meso a Yehowa* ana tala athu abonga, matshui enji ana vua gudila guawo. Uvi Yehowa wana vua khabu mukunda nu athu ana kalagala ndaga jiabola.”
13 Hene, nanyi mbawumitshita gubola gula mudi nu gikhesa gia gukalagala ndaga jiabonga?
14 Suangulugenu gula mudi mumona lamba mukunda nu ndaga jiabonga. Uvi muvigo woma wa ndaga idi muvila ene woma,* mukhadigo nji gudisagesa.
15 Uvi nemesenu Klisto gifua Fumu mu mitshima yenu. Tangua diagasue khalenu hehi ha guhana mvutu gudi muthu udi gumihula muhu mukunda nu felela dienu. Uvi ikalagalenu nu gutuluga nu ginemua giagasue.
16 Khalenu nu mutshima waphelegeta, ngenyi gula azuela ndaga jiabola mukunda nu enue, athu anyi adi gumifunda avue musonyi, handaga mudi alandudi a Klisto anyi adi nu makalegelo abonga.
17 Idi ndaga yabonga gula mudi mumona lamba handaga mudi mukalagala ndaga jiabonga, gula idi gutshigina gua Nzambi, uvi ishigo ndaga yabonga gula mudi mumona lamba handaga mudi mukalagala gubola.
18 Handaga Klisto wafile mbala imoshi mukunda nu masumu, muthu wabonga wafile mukunda nu athu abola hagula amituameze gudi Nzambi. Washiyiwe mu muila uvi wafuzumuiwe mu nyuma.
19 Wayile mulongesa nyuma jidi mu bologo,
20 jinyi jialumbugile tangua Nzambi wakhalele munengena nu guhuiminyina guagasue mu masugu a Nowa, hakhalele mutungiwa masuwa anyi ahuluishile athu* phamba 8 mu meya.
21 Ndaga eyi idi gifuanesa gia gubatijiwa gudi gumihuluisa luenyelu mu njila ya gufuzumuga gua Yesu Klisto. Gubatijiwa guene gushigo mukunda nu gukatula mvindu ya mu muila, uvi mukunda nu gutoga Nzambi ha gukhala nu mutshima waphelegeta.
22 Muene udi gu koko dia madia dia Nzambi, handaga wakandugile mu dilu. Nzambi wamukanduishile hagula anjelo nu mafumu nu ngolo amutumagele.
Mbimbi goshi'a diyiji
^ Nga “ahanenu ginemua, akotelesenu muabonga.”
^ Nga “khalenu gudivua.”
^ Nga “phala ya Yehowa.”
^ Nga ndo yajiya gukhala egi, “muvuigo woma wa usageshi wawo.”
^ Nga “mionyo.”
