Mukanda wa Thomo Phetelo 4:1-19
4 Luholo Klisto wamonele lamba mu muila, enue nji khalenu nu matangi a luholo lumoshi, handaga muthu wagasue udi mumona lamba mu muila wabembele gale gukalagala masumu,
2 hagula tangua diamusala ha gukhala nu monyo ha mavu, galandulago nzala jia athu, uvi akalagale gutshigina gua Nzambi.
3 Handaga muabalegesele tangua diavula ha gukalagala gutshigina gua enya ha mavu tangua muakhalele mukalagala ndaga jia musonyi,* nzala jiabola, gukuatewa matombe, gukalagala mawano abola, gunua matombe avula nu gukombelela isongo ya usala.
4 Adi gudihula handaga mushigo mukalagala luko nawo ndo ndaga jiabola jia musonyi, hene adi muzuela ndaga jiabola mukunda nu enue.
5 Uvi mbaasophesewa mukunda nu makalegelo awo gudi muthu munu udi hehi ha gusophesa athu adi nu monyo nu athu a gufua.
6 Gishina giene lukuma luabonga lua longesewe gudi athu a gufua, hagula ene ajiya guheta monyo mu gudivua nu nyuma ya gutshigina gua Nzambi, ikhale asophesewe luholo athu ana guatadila gu meso.
7 Uvi gisugishilo gia ndaga jiagasue giasuena hehi. Hene, khalenu mutangiza mu luholo luabonga, kangulenu meso* mu ndaga yatadila isambu.
8 Ndaga yabalega ndando idi egi khalenu gudizumba muavula, handaga guzumba guana tshuiga masumu avula.
9 Khalenu nu khadilo dia guyamba, muyimonyigo gifua ginemo.*
10 Mu luholo muthu nu muthu wahetele khapho gudi Nzambi, adikalegele ha gukuatesa athu ako gifua enya mudimo abonga anyi Nzambi wamonesele khenda jienji jiavula jidi mumonega mu maluholo avula.
11 Gula muthu udi muzuela, azuele gifua udi muzuela diago ndaga jidi mukatuga gudi Nzambi. Gula muthu udi mutshita midimo ha gukuatesa athu ako, ahage mutshima wenji gu ngolo jiana hana Nzambi, hagula Nzambi atumbuishiwe mu ima yagasue mu njila ya Yesu Klisto. Lutumbu nu ngolo jiana khala jia Nzambi ivo nu ivo. Amen.
12 Aphangi’ami ngana zumba muavula, mudihudigo mukunda nu malamba mudi mutagana nawo gifua muamona gima gia gushimana.
13 Uvi, khalenu nu gusuanguluga guavula diago, handaga mudi mumona malamba amonele Klisto. Ngenyi, muajiya gukhala nu gusuanguluga mu tangua dia gumonega gua lutumbu luenji.
14 Khalenu nu gusuanguluga gula mudi mushingiwa mukunda nu jina dia Klisto, handaga nyuma ya lutumbu, ayi nyuma ya Nzambi, idi nu enue.
15 Uvi nga muthu mumoshi mukatshi dienu gamonyigo lamba gifua muthu wana shiya athu, nga gifua nzangi, nga gifua muthu wana tshita ndaga jiabola, nga gifua muthu wana gudinginyisa mu ndaga jiangane.
16 Gula muthu udi mumona malamba handaga udi Muklisto, gavuigo musonyi, uvi alandule gutumbuisa Nzambi hadi mujinga muene mu gudivua nu jina diene.
17 Handaga idi tangua diatombewe hagula usopheshi usendese monzo ya Nzambi. Na itshi tuajiya guzuela mukunda nu athu anyi anago gutumagela lukuma luabonga lua Nzambi?
18 “Gula muthu wabonga udi muhuluishiwa mu lamba, itshi mbayibuila muthu wanago gunemesa Nzambi nu muenya masumu?”
19 Hene, athu anyi adi mumona lamba handaga adi mutshita gutshigina gua Nzambi, alandule gudihana gudi muene tangua adi mukalagala ndaga jiabonga, handaga muene udi Mufugi wetu nu tudi naye gumushila mutshima.
Mbimbi goshi'a diyiji
^ Mu Greke: aselgeya. Tala Ukoteleshi wa Mbimbi.
^ Nga “khalenu atema.”
^ Mu Greke: “mukhadigo muboguta.”
